Ang Among Hudno [Furnace] Miandar Pinaagi sa Hugot nga Pagtuo
Lois Mansius
Texas, USA
Paghulagway pinaagi ni Kopp Illustration
Sa dihang ang akong bana, nga si Mark, ug ako nagpuyo uban sa among lima ka gagmay nga mga anak sa silangang kabaybayunan sa Estados Unidos, nagpuyo mi sa usa ka balay nga adunay hudno sa lana. Sa pagsusi sa gidaghanon sa lana, among isulod ang measuring stick ngadto sa tangke. Ug kon ang lana ubos na, tawagon namo ang kompaniya sa lana nga moanha aron sudlan ang tangke.
Atol sa dili kasagaran nga mabugnaw nga Enero, kami adunay mga problema sa kwarta. Gani nagtrabaho ko og part-time sa mga gabii sa usa ka restawran aron madugangan ang among kinitaan, apan wala lang gihapoy igong kwarta sa among panginahanglan. Sa katapusan miabut ang pagpili sa pagbayad sa ikapulo o pagbayad aron mainitan ang among balay. Gisukod namo ang lana ug kini duha na lang ka pulgada (5 cm). Kana molungtad lamang sa usa o duha ka adlaw. Apan nakahukom kami sa pagbutang sa among hugot nga pagtuo sa Ginoo ug sa pagbayad sa among ikapulo.
Pagkasunod adlaw, si Mark misukod pag-usab sa lana. Duha gihapon ka pulgada. Gisukod pag-usab ni Mark pagkasunod adlaw, ug duha gihapon ka pulgada. Ang kainit pirme, apan ang lana wala moubos. Sa misunod nga duha ka adlaw, ang lana nagpabilin sa duha ka pulgada. Nakahinumdom ko nga naghilak sa kalipay sa gabii kon makadungog ko nga ang kainit migawas. Ang among hudno wala mag-andar sa lana, nag-andar kini pinaagi sa hugot nga pagtuo.
Gibati nako sama sa biyuda kinsa mipakaon ni propeta Elijah ug nakakaplag nga ang iyang “tadyaw sa harina wala makulangi, ni mahutdan ang tibud-tibud sa lana” (1 Mga Hari 17:16). Sa dihang miabut ang ting-sweldo, si Mark sa makausa misukod sa lana pag-usab. Niining higayuna nasukod kini nga usa ka pulgada (2.5 cm). Karon ang lana miubos na, apan kami aduna nay kwarta aron masudlan ang tangke.
Ang among pamilya misulay sa saad sa Ginoo nga makita sa Malaquias 3:10: “Sulayi ninyo ako karon, nagaingon ang Ginoo sa mga panon, kon dili ba buksan ko kaninyo ang mga tamboanan sa langit, ug bu-boan ko kamo sa panalangin, sa pagkaagi nga wala na unyay dapit nga igong kabutangan sa pagdawat niini.”
Ngadto ni bisan kinsa nga nagduha-duha sa mga panalangin sa pagbayad sa ikapulo, awhagon nako sila sa pagdawat sa imbitasyon sa Ginoo sa “pagsulay kaniya karon.” Ang pagbayad sa ikapulo nag-abli sa mga tamboanan sa langit, ug pinaagi sa pagkamasulundon ug pagkamatinud-anon ngadto sa mga balaod ug mga sugo sa Ginoo, mapanalanginan kita sa daghang mga paagi.
Ang among pamilya dili gayud makalimot sa dihang ang among lana sa hudno miandar pinaagi sa hugot nga pagtuo imbis sa lana.