Pagkat-on sa Pag-atubang sa mga Problema

Imahe

woman with skunk following

Kon ako maghunahuna mahitungod sa pagpaningkamot sa kaugalingon, ang mga pulong nga gikan sa akong presidente sa misyon mosulod sa akong hunahuna: “Atubanga ang imong kaugalingong mga problema.” Oo, usa kini ka dili kasagaran nga pamahayag, apan adunay daghang kamatuoran sa ideya nga adunay malisud nga mga butang sa atong kinabuhi nga dili kita makahangyo sa uban sa pag-atubang niini alang kanato.

Mao nga unsaon nato sa “pag-atubang sa atong kaugalingong mga problema” kabahin sa emosyonal nga pagpaningkamot sa kaugalingon? Unsaon nato sa pagdumala sa mga kahigawad ug makat-on nga makasugakod sa atong tanang mga emosyon?

Magpasalamat ta, wala kita pasagdi—adunay daghang mga kapanguhaan. Makita nato ang pipila niini sa “14 ka Paagi aron Mahibalik ang Inyong Emosyonal nga Kahimsog.” Ang mas importante, mapayano nato ang mga problema samtang kita motuman sa mga sugo (tan-awa sa pahina 44).

Ang pagkat-on sa pagtubag sa tanan nga atong masinati sa kinabuhi mao ang usa ka proseso. Ang pagpaningkamot sa kaugalingon sa emosyonal nga paagi wala magpasabut nga kita kanunay nga mobati sa gusto nato nga bation. Kini nagpasabut nga, pinaagi sa grasya ni Jesukristo ug sa atong kaugalingong mga paningkamot, makahimo kita sa pagdumala sa mga emosyon sa himsog ug mabungahong paagi. Si Presidente M. Russell Ballard mihatag nato og pipila ka praktikal nga tambag sa pagkab-ot niini nga pagbalanse (tan-awa sa pahina 48).

Samtang kita maningkamot alang sa pagpaningkamot sa kaugalingon sa emosyonal nga paagi, tingali kita mobati sama sa huyang nga gamay nga goryon (tan-awa sa pahina 46), apan kon kita maningkamot ug makig-uban sa Langitnong Amahan, makasalig kita nga moabut ang adlaw nga kita “manlupad pinaagi sa mga pako ingon sa mga agila” (Isaias 40:31), nga mao ang laing paagi sa pagsulti nga kita adunay kusog sa pag-atubang sa atong kaugalingong mga problema.

Manghinaut ko sa inyong kaayohan,

Heather J. Johnson

Maayo nga Tambag …

Ang mga young adult nagpakigbahin sa labing maayong tambag nga ilang nadawat mahitungod sa pag-atiman sa ilang kahimsog sa emosyon ug pangisip:

“Paggahin sa imong kaugalingon sa pag-ehersisyo, hunong sa pagkabalaka, ug kuhaa ang bisan unsa nga makadaot nimong mga hunahuna ug mga pagbati.”

—Brianna Forrester, Washington, USA

“Ayaw kahadlok sa pagpakigkita og therapist. Uban sa sakto nga kombinasyon sa espiritwal ug temporal nga mga pagtambal, nakahimo ko sa pagpuyo sa malampusong kinabuhi ug naghulat ko sa tawag sa misyon aron makaserbisyo ko sa Ginoo.”

—Nate Seal, Utah, USA

“Himoa nga ang tanang maayong mga butang igo-igo lang samtang nagsentro sa imong kinabuhi diha kang Kristo.”

—Nan Crews, Louisiana, USA

“Hinumdumi sa pagkatulog og sakto. Kataw-anan, apan importante kaayo kana!”

—Sydney Smith, California, USA

Unsa ang labing maayong tambag ang inyong nadawat sukad mahitungod sa dili kaayo paglisud-lisud sa inyong kaugalingon? Isumiter ang inyong tubag sa liahona.lds.org sa Enero 31, 2019.