Mga Investigator Mahulog gikan sa mga Kahoy
Yamila Caminos
Buenos Aires, Argentina
Paghulagway pinaagi ni Robert Crawford
Ngadto sa batan-ong mga misyonaryo nga nag-tracting sa kadalanan sa Buenos Aires, Argentina, niadtong 1995, ang saad nga ilang nadawat gikan sa usa ka sakop sa Kapangulohan sa Area ingon og makapatingala: “Kon motrabaho mo og maayo ug hingpit nga masulundon, ang mga investigator [mahulog gikan sa mga kahoy] aron mabunyagan.” Nahibaloan namo ang mahitungod niana nga saad sa wala madugay.
Ang akong papa namutol sa usa sa mga kahoy daplin sa sidewalk atubangan sa among balay. Samtang didto siya sa itaas sa kahoy namutol, nakamatikod siya og duha ka batan-ong mga lalaki nga naglakaw paingon kaniya diha sa dalan. Sa ilang paglabay ilawom sa kahoy, gitawag niya sila sa Iningles.
Ang akong papa dili gayud makasulti og Iningles, apan nakahibalo siya og pipila ka mga pulong, ug siya nakuryuso. Kinsa kining batan-ong mga lalaki, ug unsay ilang gibuhat sa among kasilinganan?
Ang mga misyonaryo nanghunong, natingala diin gikan ang tingog. Ang akong papa nanaog gikan sa kahoy aron makigsulti kanila. Nadani sa ilang mensahe ug kinaiya, gidapit niya sila ngadto sa iyang balay.
Ang nangagi nga kasinatian sa akong amahan sa relihiyon nakapasamok kaniya, apan ang mensahe sa gipahiuli nga ebanghelyo mituhop sa iyang kasingkasing. Nagpuyo siya sa pipila ka malisud nga mga panahon, ug nasayud siya nga kinahanglan siyang mag-usab. Naminaw siya pag-ayo samtang nagtudlo ang mga misyonaryo kaniya, sa akong inahan, sa akong lola, ug kanako.
11 anyos pa lang ako niadto, apan ang mga kamatuoran nga ilang gitudlo nakadasig kanako—ug sa akong mama ug lola. Isip resulta, kaming tanan nabunyagan paglabay sa pipila ka bulan, niadtong Septyembre 1995.
Ang mga binhi sa hugot nga pagtuo nga gitanom sa mga misyonaryo sa among mga kasingkasing giamumahan pinaagi sa pagpakigdait gikan sa mga higala sa simbahan, dugang pagtudlo sa ebanghelyo, ug maayong mga kasinatian uban sa lig-on nga mga lider sa Simbahan. Tungod sa mainiton nga pag-abi-abi nga among nadawat, ang mga binhi sa among hugot nga pagtuo “nahulog sa maayong yuta ug mitubo, ug namungag usa ka gatus ka pilo” (Lucas 8:8).
Ang mga bunga sa among hugot nga pagtuo nga among natagamtaman karon—dul-an sa 25 ka tuig ang milabay—naglakip sa lig-on nga pasalig ngadto sa gipahiuli nga ebanghelyo ni Jesukristo, sa mga panalangin sa templo, ug puno ug malipayon nga kinabuhi uban sa bag-ong henerasyon sa mga sakop sa pamilya nga nagkahiusa hangtud sa tibuok kahangturan.
Mapasalamaton kami kanunay tungod sa duha ka matinud-anong misyonaryo kinsa misulay sa dinasig nga saad.