Ang Hingpit nga Bahandi nga Ipakigbahin
“Ugma espesyal kaayo,” matud sa magtutudlo ni Diego. “Aduna kitay programa nga Ipakita ug Isulti!”
Mipahiyom si Diego. Ganahan siya sa Ipakita ug Isulti! Dili na siya makahulat nga ipakita sa iyang mga higala ang butang nga espesyal.
Human sa eskwela, si Diego misulti ni Mama sa maayong mga balita.
“Unsay akong dad-on?” nangutana siya.
“Kanang espesyal nimo,” miingon si Mama.
“Dad-on nako si Lobo!”
“Morag dili ta makadala og iro ngadto sa eskwelahan,” miingon si Mama. “Apan adunay ubang espesyal nga mga bahandi nga mahimo nimong ipakigbahin.”
Sa wala madugay nagsugod si Diego sa pagpangita sa bahandi! Nakakita siya sa stuffed monkey. Dad-on ba niya kini? Apan nagpadayon sa pagpangita si Diego.
Gitan-aw niya ang luyo sa mga lingkuranan sa kusina. Gitan-aw niya ang butangan sa libro. Dili siya mohunong hangtud makit-an niya ang butang nga sakto.
Dayon gitan-aw niya ang iyang higdaanan. Nakit-an niya ang perpekto nga butang!
Midagan si Diego aron ipakita ni Mama. Gigunitan niya pag-ayo ang bahandi.
“Mama!” miingon siya. “Tan-awa! Nakit-an nako ang labing maayong butang.”
Iyang gipataas ang gamay nga litrato aron makita ni Mama. Litrato kini ni Jesus nga usa ka gamay nga bata. Nindot ang gibati ni Diego sa dihang iyang gitan-aw ang litrato. Gusto siya nga ang iyang mga higala sa eskwelahan mobati usab og nindot.
“Espesyal kana nga butang alang sa Ipakita ug Isulti,” miingon si Mama. “Unsay imong isulti sa imong klase mahitungod ni Jesus?”
“Nga ang tanan mahimong magmalipayon,” miingon siya. “Tungod kay si Jesus nahigugma sa tanan!”