Usa ka Giya sa Weightlifter nga Magbarug nga Lig-on
Ang tagsulat nagpuyo sa California, USA.
Ang usa ka kasulatan makahimo og dakong kalainan—bisan sa kompetisyon sa weightlifting.
Sa dihang ako usa pa ka freshman sa high school, ang coach sa weightlifting mihangyo nako nga moapil sa weightlifting.
“Mmm … dili ko salamat,” miingon ko. “Dili nako hilig.”
Apan nagpadayon siya sa paghangyo nako. Sa daghang semana.
Sa katapusan, gisulayan nako kini. Sakto siya: ganahan kaayo ko og weightlifting. Lain gayud kaayo sa sinugdanan, ang akong lawas wala sukad makahimo og bisan unsa nga sama niini kaniadto. Apan giganahan ko sa pagbati nga mag-ehersisyo. Ganahan usab ko sa akong mga kauban sa team ug sa mga kompetisyon. Ug nagsugod ko nga nindot na ang akong agi!
Karon ang weightlifting usa na ka dako nga bahin sa akong kinabuhi. Magbansay ko kada adlaw nga dili mominus og duha o tulo ka oras, mag-back squat, clean ug jerks, ug snatches. (Ug kon ikaw wala makahibalo unsa kanang mga butanga, ayaw kabalaka—wala sad ko kahibalo!)
Sama sa daghang mga butang, ang weightlifting magkinahanglan og panahon ug pailub, ug usahay kini lisud. Maayo na lang, ang akong pamilya anaa kanunay nag-awhag kanako, bisan kon ako magbagulbol unsa ka sakit sa akong lawas, (kanunay ra ba). Ang akong papa adunay mga ice pack ug maawhagon nga mga pulong nga giandam alang nako kon makauli na ko gikan sa pagbansay. Ug ang akong mama pirme nga nagsakripisyo aron ako makaadto sa mga kompetisyon.
Pipila ka tuig na ang milabay, miadto ko sa usa sa mga kompetisyon didto sa Philadelphia, Pennsylvania, USA. Nadasig kaayo ko nga makigsangka batok sa mga weightlifter gikan sa tibuok nasud, apan medyo nabalaka ko nga mahilayo gikan sa akong pamilya. Aron mahimo kining mas sayon, ang akong mama misaad nga motext nako og mga kasulatan ug maanindot nga mga mensahe kada adlaw.
Ang gabii sa wala pa ang kompetisyon, pipila ka mga batan-on nag-party. Naghunahuna ko nga mahimo kaming inila kon moadto, mao nga ang akong kauban sa kwarto ug ako nagpakisusi. Apan diha-diha nasayud ko nga kini dili mao ang klase nga party alang kanako. Dihay mga tin-edyer nga nag-inom, nanigarilyo, nagbinastos og sulti, ug nagsayaw og dili maayo. Nasayud ko nga dili ko angayan didto, apan nabalaka ko unsay ikasulti sa akong kauban sa kwarto. O unsa ang mahunahuna sa ubang mga competitor.
Apan dihay miabut dayon sa akong hunahuna:
“Barug diha sa balaan nga dapit.”
Kana mao ang akong paborito nga kasulatan, ug usa sa gipadala sa akong mama nianang buntaga: Doktrina ug mga Pakigsaad 87:8: “Busa, barug kamo sa balaan nga mga dapit, ug ayaw pagbalhin, hangtud ang adlaw sa Ginoo moabut; kay tan-awa, kini moabut sa labing madali, nag-ingon ang Ginoo. Amen.”
Wala ko makahibalo ngano nga ang akong mama mipadala niana nga kasulatan nianang adlawa, apan mao kini nga akong ganahan sa akong tibuok kinabuhi. Nasag-ulo kini nako sukad sa otso anyos pa ko, ug kini pirme nga nagpahinumdom nako nga magbaton og kaisug, magmasulundon, ug mobarug unsay akong gituohan.
“Barug diha sa balaan nga dapit.”
“Mobiya na ko,” giingnan nako ang akong kauban sa kwarto. Gipasabut nako ang kasulatan nga gipadala sa akong mama nianang buntaga. “Dili kini ang angay nga dapit nga akong baruganan.”
Ang akong kauban sa kwarto misulti usab nako nga dili siya gusto nga naa diha. Dili usab siya komportable apan dili gusto nga mobiya nga siya ra ug makita nga anti-sosyal. Nagpasalamat siya nako sa pagsulti niini, ug kami mibiya.
Pagkasunod buntag, nahibaloan namo nga human sa among pagbiya, ang mga batan-on nga didto sa party nasakpan ug wala na paapila sa kompetisyon tungod sa pag-inom ug paggamit og drugas.
Kon wala pa ako maaghat nga mahinumdom sa bersikulo ni mama, tingali apil usab unta ako sa wala na paapila sa kompetisyon. Nahimo hinoon ko nga mananaog sa unang dapit, mao nga mapasalamaton kaayo ko nga nakaapil sa kompetisyon. (Nagpasalamat ko sa akong mama nga nag-text nako kada adlaw.)
Ang pagdaog og kompetisyon sa weightlifting usa ka klaro ug diha-diha nga panalangin tungod sa pagtuman sa mga sugo. Apan ang Doktrina ug mga Pakigsaad 87:8 wala mag-ingon, “Barug sa balaan nga dapit aron ikaw makadaog sa kompetisyon sa weightlifting.” Ug ang Juan 14:15 wala magpasabut, “Kon ikaw gusto og diha-diha nga mga panalangin, tumana ang akong mga sugo.” Ang Manluluwas mopanalangin nato tungod kay Siya nahigugma kanato. Ug maningkamot kita nga mahimong balaan ug magmasulundon tungod kay kita misalig ug nahigugma sa Ginoo.