Kar katakin jān Jetōb KWOJARJAR EO
Jodikdik rein rekar kōpopo n̄an aer katak jān Jetōb m̧okta jān kweilo̧k eo eļap. Erkein men ko rekar ekkatak jān kweilo̧k eo ļo̧k im ta eo rej kōm̧m̧ane eoktakļo̧k kōn wōt men in.
Kōmeļeļe ko Reim̧we
Pija ejjeļo̧k armej ie jān Getty Images
Kar im̧we eō jān kweilo̧k eo eļap. Ke ij ron̄jake kōmeļeļe ko jān ritōl ro n̄an jipan̄ ro jet, lōke Kraist, im dāpdep wōt ilo aen in dāpdep eo, ikar en̄jake Jetōb Kwojarjar ej kam̧ool n̄an eō bwe gospel in em̧ool im bwe jemaron̄ bōk mour indeeo n̄e jej kōjparok kien ko im ļoor naan ko an Anij. Ikar kōm̧m̧ani jet aō kōttōbar bwe en ļapļo̧k aō jipan̄ ilo jukjukin pād eo aō im n̄an kōkajoorļo̧k naan in kam̧ool eo aō ilo aō jar aolep iien im ekkatak jān jeje ko rekwojarjar. Ijeļā bwe n̄aij juon jiron̄ nejin Jemedwōj Ilan̄. Ej mour im ej iakwe eō aolep iien im n̄an indeeo.
Madelyn B., iiō 16, Delaware, USA
Uwaak ko n̄an Kajjitōk ko
Mokta jān Kweilo̧k eo Eļap ekar wōr ruo aō kajjitōk: (1) Elmen ad dāpij m̧wil em̧m̧an im jipan̄ ro m̧ōtta n̄e rej kōm̧m̧ani kālet ko renana? im (2) Ewi wāween aō kam̧ool kōn Kabun̄ in ilo aer kōm̧m̧an kōjak kōn n̄a? Ilo iien kweilo̧k eo, Jetōb ekar kam̧ool n̄an eō bwe ijjab make iaaō. Kiiō ijeļā ilo aō ekkatak jeje ko rekwojarjar kōn aolepān buruōd, inaaj bōk uwaak n̄an kajjitōk ko kōn ro m̧ōtta. Ijeļā bwe Jema Ilan̄ ej ron̄jake jar ko aō, im inaaj kajjieon̄ bwe in em̧m̧anļo̧k kajjojo raan.
Isaak R., 13 an iiō, Pichincha, Ecuador
Ikdelel n̄an Ekkatak
Ij en̄jake an Jetōb kajoor ilo kweilo̧k eo eļap. Jān iien eo ikar jinoe kōpooj kajjitōk ko im kōpooj eō make ilo mour in jetōb n̄an iien kweilo̧k eo, ekar kōm̧m̧an juon oktak eļap ilo mour eo aō, im ikar maron̄ ekkatak eļap jān ekōnono ko kajjojo. Eļap aō kam̧m̧oolol kōn rikanaan im rijilōk ro, im ijeļā bwe kar jilkintok er jān Jemedwōj Ilan̄ n̄an tōl kōj ilo mour ko ad!
Ben H., 17 an iiō, Kentucky, USA
Kar Kōņaan bwe in kajoorļo̧k
Kweilo̧k eo Eļap ekar kōkajoor eō kōn juon ikdeleel bwe in ļoor iaļan gospel eo an Jisōs Kraist. Ekar jipan̄ eō jeļā im meļeļe bwe en̄in ej Kabun̄ eo em̧ool, eo ej bōktok n̄an kōj meram im m̧ōņōņō. Ikar en̄jake an Jetōb kōņaan bwe in kajoorļo̧k kajjojo raan im riiti Bok in Mormon n̄an bōk juon naan in kam̧ool ekajoor an gospel eo. Ij tōmak bwe Jemedwōj Ilan̄ ekar kōņaan bwe in ron̄jake enaan kein reim̧we.
Vicente A., 16 an iiō, Metropolitan Region, Chile
Kappukōt Meram eo
Iiō eo m̧okta jān iiō eo ej jem̧ļo̧k ekar lukkuun pen n̄an n̄a. Jema ekar en̄taan kōn nan̄inmej in kāānjer, im ekar wōr jet rinana rekar kajjieon̄ kakkure jikin eo kōmij jokwe ie. Ekar ļap aō ikūmļo̧k, im ikar ļōmņak wāween aō maron̄ en̄jake aenōm̧m̧an n̄e ij mijak kōn jokņe eo aō ilo mour in jetōb im kanniōk. Jān kweilo̧k eo eļap ikar ekkatak bwe jemaron̄ lo aenōm̧m̧an n̄e jej mour erreo, kobrak buruōd kōn tōmak, im dāpij wōt ļōmņak in kōn mour indeeo. Ikar en̄jake im̧we bwe in oktak n̄an Kraist ilo iien ko reppen ijjeļo̧kin aō pedped ioon jeļā eo aō make. Ijeļā bwe imaron̄ eļļā jān kareel ko an marok n̄an kappukōt meram eo an Kraist emeram tata.
Olivia H., 17 an iiō, Belgium