Rūm̧m̧an Ded ro
Ad Ellowetak n̄an Mour kake Gospel eo
Enaaj aolep iien wōr “katak ko pen meļeļe kaki.” Ak enaaj aolep iien wōr ļōmņak n̄an kālet tōmak ilōn̄ in jabdewōt pere ak jab jeļā.
Iaļ eo an juon rikaļooraņ ej obrak kōn kōjeraam̧m̧an ko—ko jim̧or “loi im jab loi.”1 Ak ewōr iien ko n̄e iaļ jab in, mekarta kōjeraam̧m̧an ko an, ejjab pidodo ak ekkar. Erom̧ juon rikaļooraņ Jisōs Kraist ej aikuji jerbal im kaarmejete, im jet iien epen n̄an lo ellowetak eo n̄an mour kōn kien ko im kōm̧m̧ani kaarmejete ko.
Āinwōt juon rūm̧m̧an ded, bōlen kwoj barāinwōt boub in kajieon̄ kōm̧m̧ani eddo ko rekāāl, kōm̧m̧ani jokālet ko enaaj ļap kilaer ilo mour eo kiiō m̧aanļo̧k, ak pukot iaļ in rikaļoor eo an make enaaj ewi jekjek in ilo aolepān mour eo am̧. Ilōn̄ in men jab in, emaron̄ wōr men ko ilo kakien ko an Kabun̄ in ak bwebwenato eo ak ilo katak an gospel eo me kwojjan̄in de jeļā im kapo ko kwoj kakkōt ippāer, barāinwōt kōjeraam̧m̧an ko kwoj kab de kōttari im kajjitōk ko kōn karōk eo an Anij n̄an eok.
Jet iaad remaron̄ in kōļmenļo̧kjeņ ilo iien ko eļan̄n̄e mour kōn gospel eaorōk kōn kōjeraam̧m̧an ko kar kallim̧uri kake n̄an kōj. Jemaron̄ ba bwe jejjab ekkar n̄ani, ekanooj ļap jerbal, ak bwe kajjitōk ko reinwōt elōn̄ kajjitōk ko jān uwaak ko. Bōtaab men eo aorōk tata ej pedped ioon ej ellowetak. Etke kwoj kōm̧m̧ane ta eo kwoj kōm̧m̧ane im mour ilo jekjek eo kwoj mour ie? Etke kwoj kōjparok wōt kien ko, men̄e ejjeļo̧k juon ej pād iturum̧ n̄an kile eļan̄n̄e kwoj kōjparoki?
Jekdo̧o̧n wōn kwe im ta tōre in iien an mour kwoj pād ie, kālet eo n̄an pukot ellowetak eo am̧ kōn kōkajoorlo̧k tōmak eo am̧ ilo Rilo̧mo̧o̧r eo im gospel eo An ej am̧ pepe.
Kōm Naaj Ilo̧k N̄an Wōn?
Kappukot im dāpij wōt ellowetak eo n̄an mour kake gospel eo ejjab juon idajon̄jon̄ ejej uwaan ilo tōre in ad. Men̄e Rilo̧mo̧o̧r eo eaar pād ioon laļ in, eaar pen an armej ro meļeļe im kōn menin pokake pedped ko Eaar katakin. Jet iaan rikaļoor ro An raar ron̄jake ke Eaar kōmeļeļeik juon katak me emaron̄ kōmetak er—jerbal eo An āinwōt “bred in mour” (lale Jon 6:35–58). Raar uwaak ilo pere, ba “Naan in naan e pen; wōn e maron̄ in ron̄jake?” (Jon 6:60).
Kraist, eaar lo bwe ekar pen aer tōmak ak bōk katak in, Eba, “Men in ej ļōkatipe kom̧ ke?” (Jon 6:61). Ijeļo̧kin likūt aer tōmak ilōn̄ in pere ko aer, elōn̄ iaan iaar ro Rikaļooran “rej jepļaak, im jab bar etetal ippān” (Jon 6:66).
Ak ke Kraist ej kajjitōk ippān rikaļoor ro An eļan̄n̄e rej barāinwōt kōņaan bar “ilo̧k,” Piter eaar leļo̧k uwaak eo wōt: “Kōm Naaj Ilo̧k N̄an Wōn? Ippam̧ naan ko naan in mour indeeo” (Jon 6:67–68).
Wūnjen Ellowetak eo Ad
Piter eaar jeļā wūnjen ellowetak eo an. Eaar pedped wōt ioon pedped eo aorōk tata kōn etke jej kōm̧m̧ane ilo gospel eo: ad naan in kam̧ool im tōmak ilo Jisōs Kraist. “Kōm ar tōmak im jeļā,” Piter eaar ba, “bwe kwe Kraist eo, Nejin Anij emour” (Jon 6:69; kakkobaba in katak). N̄an bōk ejja kam̧ool in epen kōn Jisōs Kraist, An kwojarjar, im An jerbal, jemaron̄ bar lo ellowetak eo n̄an wōnm̧aanļo̧k wōt n̄an mour kōn gospel eo—men̄e emaron̄ pen, men̄e ejjeļo̧k enaaj jeļā, im men̄e jejjab jeļā jekōņaan.
Enaaj aolep iien wōr “men ko reppen.” Ak aolep iien enaaj wōr ļōmņak n̄an kālet tōmak ioon jabdewōt pere ak jab jeļā. Āinwōt an Elder L. Whitney Clayton jān Būreejtōnji eo an Jiljilimjuonn̄oul eo kar ba, “Jokālet eo n̄an tōmak ej make wōt kālet eo eaorōk tata jaar kōm̧m̧ane.”2
Kōn menin ta eo jej kōm̧m̧ane eļan̄n̄e jej lo kōj make ilo tūrājet eo juon an juon iaan “katak ko reppan n̄an būki”?
1. Ļoor waanjon̄ok eo an Piter im rikaļoor ro jet ro raar tiljek wōt men̄e en kar pidodo n̄an “ilo̧k.” Ron̄jake kapilōk an rikanaan ro, rijilōk ro, im ritōl ro jet:
“Ilo iien mijak ak pere ak iien ko renana, dāpij wōt ijo em̧ōj am̧ tōpare. … Jirōk likattōtōt ilo ijo em̧ōj am de jeļā im jutak kajoor m̧ae ebar itok juon jeļāļo̧kjeņ.”3
“Ekar maron̄ bōk juon bun̄tōn m̧aanļo̧k ilo tōmak—im bar juon. … Ekar maron̄ pedped wōt ilo m̧ool ko kwar tōmaki im [kōm̧m̧an] bwe m̧ool kein ren kobrak am̧ [ļōmņak] im būruwōn. …
“… Jino m̧ool ko an gospel eo.”4
2. Emakijkij riiti jeje ko rekwojarjar im ļoor katak ko aer:
“Ekkatak im kejōkļo̧kjeņ kōn Bok in Mormon kajjojo raan.”5
“Eļan̄n̄e jabdewōt armej e kōņaan kōm̧anm̧an ankilaan, e naaj jeļā kōn naan in katak eo, eļan̄n̄e e jān Anij, ak Ij kōnono kōn N̄a wōt” (Jon 7:17).
“A koṃwin ri kōṃanṃan naan eo, im jab ri ron̄jake wōt”Jemes 1:22).
3. Kōjparok wōt kien ko.
“Uwaak ko n̄an kajjitōk ko ad rem̧ool rej itok n̄e jej m̧ool in pukōti im n̄e jej mour kōn kien ko. … Ad tōmak enaaj jipan̄ kōj tōpar men ko rejjab lukkuun m̧ool.”6
“Ami wōnm̧aanļo̧k im pokake, … kom̧ naaj bōk jeļāļo̧kjeņ eo im meļeļe eo kom̧ij pukote.”7
Ilo jem̧ļo̧kin, ad ellowetak ej pedped ioon ta eo Piter eaar ba. Jej ke tōmak bwe Jisōs ej RiKraist eo, bwe Ej tōl Kabun̄ eo An im epād ie naan ko naan in mour indeeo? Ad tōmak ilo E eļapļo̧k jān “katak ko epen meļeļe kaki jān elōn̄” jejjab maron̄ meļeļe ilo iien eo?
Kōjeraam̧m̧an ko kōn Mour kōn Gospel eo
N̄e jej ļōmņak n̄an iakwe im ļoor Anij im Jisōs Kraist im kōjparok kien ko men̄e jejjab lukkuun meļeļe kaki, eļļap kōjeraam̧m̧an. Lukkuun piktokin armej ej kajjitōk, “Ta eo ij bōk jān kōm̧m̧ane menin?” Katak ko an gospel eo rej uwaak: “Aenōm̧m̧an ilo laļ in, im mour indeeo ilo laļ eo ej itok”; juon jikin kar kepooje n̄an kwe ilo im̧ōko im̧ōn Anij; men eo ewōr ippān Jemedwōj Ilan̄; “lem̧ōņōņō eo ejjeļo̧k jem̧ļo̧kin” (lale K&B 59:23; Ether 12:34; K&B 84:38; Mosaia 2:41); im āinwōt an Elder Dieter F. Uchtdorf jān Doulul eo an Jon̄oulruo Rijilōk ro kar ba: “Ijin [ilo Kabun̄ in] kwonaaj lo ta eo em̧m̧antata. … Ijin kwonaaj lo naan ko naan in mour indeeo, kallim̧ur eo an kōjeram̧m̧an eo an pinmuur eo, im iaļ eo n̄an aeņōm̧m̧an im m̧ōņōņō.”8 Baj kōlaajraki jet iaan kōjeraam̧m̧an ko.
N̄e jej wujlepļo̧k kōj make n̄an ļoor Kraist im pokake kien ko An, kar kallim̧uri kōj ilōn̄ in men kein otemjeļo̧k im elōn̄ļo̧k. Ejjab meļeļe in bwe iaļ eo enaaj aolep iien pidodo ak meļeļe kake, bōtaab kōjeraam̧m̧an ko kar kallim̧uri kōj kake jān jutak pen naaj wōnm̧aanļok wōt n̄an aer waļo̧k ilo aolepān mour ko ad im jekdo̧o̧n tokālik.
Ijoke, men̄e kallim̧ur kein rekabwilōn̄lōn̄, rejjab aikuj in ellowetak eo ad eļaptata n̄an mour kake gospel eo. Jekdo̧o̧n ta kajjitōk ko am̧, jekdo̧o̧n ta katak ta eo kwojjab meļeļek, am̧ tōmak ilo Jisōs Kraist im Pinmuur eo An enaaj kii eo n̄an ellowetak eo am̧ n̄an mour kōn gospel eo An, ejja āinwōt kar n̄an Piter im ro jet.
Elder Uchtdoft eaar ba, “Ellowetak im ļōmņak ko ad āliktata rej kareel m̧akūtkūt ko ad.” “Naan in kam̧ool eo kōn tarlep in gospel eo kar kajepļaaktok an Jisōs Kraist ej kajoor in kōllowetak eo eļap tata ilo mour ko ad. Jisōs eaar āliji kajoor eo an ļōmņak ko rem̧m̧an im ellowetak ko rejejjet: ‘Reitok n̄an Eō ilo ļōmņak otemjeļo̧k; jab pere; jab mijak’ (K&B 6:36).
“Naan in kam̧ool eo an Jisōs Kraist im gospel eo kar kōjepļaaktok enaaj jipan̄ kōj ilo mour ko ad n̄an jeļā pepe eo ekkar an Anij n̄an kōj im mour ekkar kake. Ej letok n̄an kōj lōke eo em̧ool m̧ool eo, im em̧m̧an eo an Anij, kōn katak ko im Pinmuur eo an Jisōs Kraist, im kōn kūr eo ekwojarjar an rikanaan ro raan ko āliktata.”9
Ak n̄a, inaaj kajjieon̄ wōt, jekdo̧o̧n en̄jake in epen. Inaaj kajjieon̄ wōt kōm̧m̧ani jar ko aō im ekkatak jeje ko aō rekwojarjar. Inaaj kajjieon̄ kōm̧m̧ane juon kijejeto n̄an kōkajoorļo̧k naan in kam̧ool eo kōn Rilo̧mo̧o̧r eo aolep raan. Im inaaj kajjieon̄ wōt n̄an mour āinwōt n̄e Eaar kōņaan bwe in mour im pedped ioon naan ko An im rikanaan ro im rijilōk ro An n̄an katakin eō ekōjkan, pedped ioon ellowetak eo me ejjab kōn wōt tōprak eo jān aō tōmak ilo im iakwe E ak barāinwōt jān en̄taan indeeo eo An im iakwe eo n̄an eō.