Elder Ulisses Soares: Juon Maan ejjeļo̧k an M̧oņ
Ilo raan ko jinoin jerbal in karejar eo An, ilo an Jisōs kar kālet Rijilōk ro An, Ekar loe Nathanael an itok n̄an E. Em̧ōkaj an kile em̧m̧an eo an Nathanael, kwaļo̧k, “Lo, ri Israel e m̧ool, ejjeļo̧k m̧oņ ippān!”1
Jisōs ekar jeļā bwe Nathaneal ekar juon m̧aan erreo būruwōn, em̧ool ilo kōņaan ko an, im ejjeļo̧k jeļā m̧oņ ak m̧oņ ippān. Irooj ej iakwe m̧wil rot in an m̧ool ewāppen, im Ekar kūr Nathanael bwe en juon Rijilōk.2
Ulisses Soares ej āinwōt Nathanael eo etto, im Rilo̧mo̧o̧r eo ekar kūr e barāinwōt.
“Meram eo an Jinō im Jema”
Ulisses, ej diktata iaan ļaddik ro emān jein, ekar ļotak ilo Sāo-Paulo, Brazil, ilo Oktoba 2, 1958 eo. Ekar itok jān ijjino ko rettā ilo mour, bōtaab ro jinen im jemān, Apparecide im Mercedes Carecho Soares, rekar kautiej, armej ro rekūtare ilo jerbal ro raar m̧ool in ron̄jake mijenede ro. Rekar kobatok ilo Kabun̄ in ilo 1965 ke Ulisses ekar 6 iiō rūttoen.
“Ij jan̄in kar lo an Brother Apparecideo likjab jān juon kweilo̧k,” Osiris Cabral, eo ekar jerbal āinwōt stake būreejtōn eo ke Ulisses ekar juon ļaddik. “Mercedes ekar barāinwōt lukkuun tiljek. Ulisses ekar jolet e wūjlepļo̧k eo an jinen im jemān.”
Ulisses Soares “ekar rūttoļo̧k ilo Kabun̄ ļoor meram eo” an jinen im jemān, Apparecideo im Mercedes Soares (tuanmiin̄). Ilo an Ulisses lōke ilo Irooj mekarta jum̧ae, ekar ekkatak āinwōt juon ļaddik n̄an dapdāp wōt n̄an Rilo̧mo̧o̧r eo im gospel eo An.
Piktokin bōro eo em̧m̧an an Ulises ekar ebbōl ke ekar katak wāween ko an Irooj. “Ikar rūttoļo̧k ilo Kabun̄ in ļoor meram eo an jinō im jema,” Elder Soares ej ba. Ilo an kar ļoor meram in, naan in kam̧ool eo an ekar kajoorļo̧k mekarta ekar jelm̧ae jum̧ae.
“N̄a ikar make wōt membōr in Kabun̄ in ilo jikuuļ eo aō, im ļaddik ro jet rekar aolep iien kajjieon̄ kanōkļo̧k eō im iuunļo̧k eō n̄an men ko me rebōd,” ej ba. “Ikar aikuj in katak jojomar e n̄a make ilo apan̄ kein, ak aolep iien ij lōke ilo Irooj kōn aolepān būruwō n̄an jipan̄ eō tōprak. Ikar katak āinwōt juon ļaddik edik bwe eļan̄n̄e kwoj kōm̧m̧ane ijo koņaam̧, Irooj enaaj kōm̧m̧ane ijo koņaan. Bōtaab kwoj aikuj in buuļ dāpij wōt Pein im gospel eo An.”
Ke Ulisses ekar 15, bisop eo an ekar kajjitōk ippān n̄an katakin juon kūlaaj in Jabōt Jikuuļ an jodikdik ro. Juon iaan katak ko ekar katakin ekar pedped ioon bōk juon naan in kam̧ool an gospel eo. Ulisses ekar ekkatak kōn Bok in Mormon, aolep iien ej en̄jake bwe Kabun̄ in ej m̧ool, im tōmak ilo Rilo̧mo̧o̧r Jisōs Kraist.
Ilo an kōpooje katak in an, ekar kōņaan bwen kajoor an kam̧ool n̄an kūlaaj eo an kōn m̧ool eo an gospel eo. “Ikar ekkatak im jab jakwad ilo jar,” Elder Soares ej keememej. “Ālkin aō būkwelōlō, ekar itok n̄an būruwō juon en̄jake elukkuun em̧m̧an, juon ainikien edik ekar kapen n̄an n̄a bwe ikar pād ilo iaļ eo ejim̧we. Ekar kanooj kajoor jon̄an iaar jab maron̄ n̄an jidik ba bwe iaar jab jeļā.”
Ilo an Ulisses ekekeļo̧k, ekar katak bwe eļan̄n̄e enej kōm̧m̧ane eļapļo̧k jān jon̄an eo kar kōtmāne ak kajjitōk ippān n̄an kōm̧m̧ane, Irooj enej jouj im kōjeraam̧m̧an e. Juon baj katak ekar itok n̄an e ke ekar m̧aanjabpopo n̄an juon mijen. Ilo iien intōrpiu ko ippān Ulisses, bisop eo an ekar kōmejajaiki aorōk in pokake kien ko im mour erreo. Ekar barāinwōt kwaļo̧k kōn m̧aanjabpopo kōn jāān.
Rainin aolep mijenede ro jān Brazil rej jipan̄ n̄an wōņāān mijen ko aer, im elōn̄ baam̧le ko rej jipan̄ leļo̧k wōņāān aolepān mijen eo aer. Ke Ulisses ekar epaake an jejjet iiō in mijen eo an, ekar pepe ippān bwe enaaj jerbal im bōk eddo in aolep jāān ko nej aikuji n̄an mijen eo an. An kōjerbal kajoor ilo tōmak aorōk in jerbal, ekar katak jerbal ilo pejnej jidikdik eo an jemān im kar kōjerbal maron̄ in an m̧ōkaj an jeje ilo computer, Ulisses ekar loe juon jerbal enej jipan̄ kom̧bani eo kōm̧m̧ani kōļļā ko an.
Ālkin an em̧m̧an an kōm̧m̧an juon teej epen n̄an deļo̧n̄, ekar jino ekkatak kōn accounting ilo juon high jikuuļ in jota. Kajjojo allōn̄, ālkin kōļļā juon m̧ōttan jon̄oul eo, ej kakkonkon jāān n̄an mijen eo an. Ālkin juon iiō, ekar em̧m̧akūtļo̧k n̄an accounting department eo an kom̧bani eo an.
“En̄ņe kar wāween aō kakkonkon jāān n̄an kōļļāik mijen eo aō,” Elder Soares ej ba. “Im kajjojo allōn̄ ilo iiō ko jilu m̧okta jān aō kar etal, inej wia juon men eo me inej aikuji—juon jōōt, juon pea in jero̧jij, juon pea in takin, juon tae, juon kōban̄.” Ekar barāinwōt aikuji, im bōk, iakwe eo ekajoor im jipan̄ eo jān jinen im jemān im ritōl ro an ijo jikin.
Ulisses kar kūri n̄an Brazil Rio de Janeiro Mission. Ekar jerbal m̧ōttan eo im̧aan an mijen eo an ium̧win tōl eo an Būreejtōn Helio da Rocha Camargo, eo ekar tokālik erom̧ Ritōl eo Eutiej kein kajuon kar kūr jān Brazil. Ulisses ekar jino mijen eo an ilo jinoin 1978 eo. Tampeļ eo kein kajuon ilo Latin America kar aje tokālik ilo ejja in eo wōt ilo São Paulo jān Būreejtōn Spencer W. Kimball (1895–1985).
Ilo Jānwōde 1980, Ulisses im kōm̧pānien eo an, eo me ekar jan̄in bōk menin letok kwojarjar eo an, rekar iuwe ioon juon baj ilo Rio de Janeiro ilo juon tūrāāp ruwalitōk awa n̄an São Paulo Brazil Temple. Jinen im jemān Ulisses im ajri ro jein rekar ioon e ijo, im baam̧le eo an Soares rekar liāp n̄an iien im n̄an indeeo. Ulisses ejjab meļo̧kļo̧k ļalem awa ko aer ippān doon ilo São Paulo Temple. Tokālik raan eo, e im kōm̧pānien eo an rekar ro̧o̧lļo̧k n̄an jikin jerbal eo aerro.
Likūt Anij Im̧aan
Ulisses ekar lan̄lōn̄ kōn juon mijen eo em̧m̧an, eo ekar kōkajoorļo̧k naan in kam̧ool eo an. Ke ekar ro̧o̧l n̄an m̧weo imōn, ekar loe juon jerbal im kar jino ekkatak accounting im economics ilo juon university ilo ijo ej jokwe ie.
Ekar mootļo̧k enan̄in jiljilimjuon allōn̄ ko jān ke ekar ro̧o̧ltok jān mijen ke ekar ioon “Sister Morgado” ilo juon eb an elōn̄ļo̧k jān juon stake ko. Ulisses ekar jerbal āinwōt an kar zone leader ium̧win juon tōre, im rein ruo rekar bwebwenato joteen eo kakeememej doon im kwaļo̧k bwebwenato in mijen ko aer. Jilu wiik tokālik, rekar jino jerā.
Rosana Fernandes Morgado ekar ruwalitok an iiō ke leddik eo jein, Margareth, ekar jino ān̄ini ippān n̄an jar. Āliktata, rūkkatak rein ruo reddik im tiljek rekar bōk mālim jān jemāer n̄an peptaij, ak erro kajjojo rekar aikuj in kōttar m̧ae leddik eo eaar 17 an iiō. Rosana ekar etal im jar ium̧win ratimjuon iiō ko m̧okta jān an bōk mālim n̄an peptaij.
Ulisses ekar jokwe ilo turear in São Paulo, im Rosana ekar jokwe ippān jinen im jemān ilo turōk in bukwōn eo. Ito itak ikōtaan jikin kweilo̧k in ekilep ebōk ruo n̄an jilu awa ilo baj ak tūreen. Ilo m̧ool, Margareth im ļeo pāleen, Claudio, rekar jokwe epaake m̧weo imōn jinen im jemān.
“N̄e Ulisses ekar itok ilo weekend ko n̄an bwebwenato ippān Rosana, ekar pen n̄an e n̄an an jepļaak n̄an m̧weo imōn ilo bon̄,” Elder Claudio R. M. Costa ej keememej, Ritōl eo Eutiej ej Jiljilimjuonn̄oul, ilju im jekļaj nej an brother. Kōn menin, e im Margareth rekar kauwaineneik Ulisses bwen pād ippāer bon̄ōn ko ilo m̧weo m̧weer ālkin an bwebwenato. “Kōm kar kōkkaajririki ium̧win jidik iien,” Elder Costa ej ba.
“Ej kijon̄ kiki ioon kawij eo ilo ettōņaak eo,” Sister Costa ej ba. “Ej kab m̧ōjļo̧k am m̧are, kōn menin ejjeļo̧k bar būļan̄kōj ippem̧. Ak ej kijon̄ kōko̧jooj e make kōn juon am kar katiin̄ em̧oor. Ekar em̧m̧an im m̧ōņōņō bwe emaron̄ in loe Rosana raan eo juon. Ekar em̧m̧an n̄an leddik eo jatū, im jinō im jema rekar barāinwōt kōņaan e.”
Ulisses im Rosana rekar m̧are ilo São Paulo Brazil Temple eo ilo Oktoba 30, 1982.
Eļan̄n̄e kwonej joļo̧k jejjo minit ippān Elder im Sister Soares, aer iakwe, nōbar, kautiej n̄an doon m̧ōkaj an waļo̧k. N̄an Elder Soares, Rosana “Ekar juon waanjon̄ak eo kōn em̧m̧an, iakwe, im lukkuun wūjlepļo̧k n̄an Irooj im n̄an n̄a im baam̧le eo aō.”3 N̄an Sister Soares, Ulisses ej “juon menin letok an lan̄.”
Sister Soares ej kakkobaba: “Ekar aolep iien lukkuun bōk eddo im wāppen, ekar aolep iien bōk eddo in kōjparok baam̧le eo am, im ekar aolep iien kōm̧m̧an em̧m̧an n̄an n̄a. Ilo aolepān kūr ko an, ekar kōm̧m̧ane jon̄an eo em̧m̧an emaron̄ kōm̧m̧ane. Ej etal im ej kōm̧m̧ane. Aolep iien ej likūt men ko an Anij im̧aan ilo mour eo an. Ikar iakwe im bar iakwe kōnke ijeļā eļan̄n̄e ej likūt men ko an Anij m̧okta, enaaj barāinwōt likūt n̄a m̧okta.”
Kōn kōrā eo pāleen, Elder Soares ej ba: “Ej juon ribun̄bun̄ em̧ool im im̧we n̄an baam̧le eo am. Ej iakwe, jouj, im kijenmej ippān aolep armej. Ej kobaik baam̧le eo am, im ej loe em̧m̧an ippān aolep armej. Ekar lukkuun ļap jipan̄ eo an n̄an ta eo em̧ōj an waļo̧k ilo mour eo aō. Kōn kūr eo aō n̄an Doulul eo an Jon̄oulruo Rijilōk ro, ij kōm̧m̧an kōjak n̄an e, ‘Ij jekpen ņae eok kōn menin kōnke kwaar kakūrm̧ool eļap kajoor an gospel ilo mour eo Aō.’”
Juon Bōro Ekilep
Gustavo, rūttotata eo nejin baam̧le in Soares, ej keememej juon bon̄ ke, āinwōt juon ļaddik, ekar jab pokake jinen im jemān im kar ko bwen alooje juon bade ej kōm̧m̧an kajjojo iiō ņaetan Festa Junina ilo turin m̧ōko im̧ōn ilo São Paulo.
“Ikar pād ilubwilijin juon jarelpju kileplep bōk aō iien ke ikar ron̄ juon rikōjjeļļā ej kūr eta bwe in etal n̄an ijo im̧aan ippān,” ej ba. “Iien eo ņe ikar loe jema.”
Jinen im jemān rekar lukkuun inepata, ijjelo̧kin ad kajook Gustavo, Ulisses ekar keenļo̧k im atbakwōj e.
“Kōm kar lukkuun bwebwenato kōn aō kar jebwābwe, ak jinō im jema rekar kōm̧m̧an em̧m̧an n̄an n̄a ilo kautiej,” Gustavo ej keememej. “Ikar en̄jake aō kōjparok, im ikar jeļā bwe rekar lukkuun iakwe eō.”
Ulisses ekar wūjlepļo̧k e n̄an baam̧le eo an. Mekarta jerbal eo an eboub im an ito itak elōn̄ iiō ko, ekar kōm̧m̧an an iien n̄an kalōk jem̧jerā ko ippān ajri ro nejin.
Ke Elder Soares ekar rejtak n̄an Doulul eo an Jon̄oulruo Rijilōk ro ilo M̧aaj 31, 2018, bōlen ejjeļo̧k juon ekar ļapļo̧k an bwilōn̄ jān Gustavo im leddik ro ruo jatin, im Lethicia Caravello im Nathalia Soares Avila. Ak eļan̄n̄e iakwe, kije ilo jerbal, tūriamo̧, im ettā bōro ej kōkare juon armej n̄an ritōl āinwōt rijilōk, rej ba, rej maron̄ meļeļe etke Irooj ekar kūr jemāer.
“Ke Jisōs ekar kūr Rijilōk ro An, Ekar jab kālet Riparisee ro remāletlet tata, Ekar kālet rieon̄ōd ro,” Lethicia ej ba. “Jema im jinō rej āinwōt menin. Relukkuun lōke Irooj, im Ej kōjerbal er n̄an kakūrm̧ool jerbal ko An kōnke Ejeļā rejouj, rem̧ōņōņō in buuļ jerbal, im rettā n̄an bōk kajim̧we ko.”
“Bōro kileplep” eo an jemāer enaaj jipan̄ e wōnm̧aanļo̧k wōt āinwōt juon rikam̧ool em̧ool an Rilo̧mo̧o̧r eo, Nathalia ej kakkobaba. “Būruwōn epād menin ie,” ej ba. “Ej en̄jake kareel ko an lan̄, im ej iakwe aolep armej im ekōņaan kōm̧m̧ane men eo ejim̧we.”
“Men Otemjej Renaaj Jerbal”
Ke Elder Soares ekar jerbal āinwōt juon būreejtōn an Portugal Porto Mission jān 2000 n̄an 2003, ekar erom̧ bun̄bun̄ kōn kōjerbal naan in Portuguese in “Tudo vai da certo”—men otemjej renaaj jerbal.
“Ekar katakin kōm menin,” Ty Bennett ej keememej, juon iaan mijenede ro an. “Ej mour kōn tōmak im laudin̄din̄ bwe eļan̄n̄e jej kōm̧m̧ane ta eo Irooj ekōņaan bwe jen kōm̧m̧ane, men otemjej renaaj jerbal.”
Ekar barāinwōt katakin mijenede ro an n̄an jab kōjerbale naan kein pen ak eban maron̄, Richard Shields, bar juon iaan mijenede ro an ej ba. “Kōmij kōnono kōn men kein āinwōt ‘idajon̄jon̄ ko.’ Naan in kapilōk in ekar jipan̄ kajim̧we mour eo aō ilo aō kalimjōk men ko āinwōt ‘idajon̄jon̄ ko’ n̄an anjo̧ jāni ijjelo̧kin āinwōt ‘pen’ ak ‘eban maron̄.”
Āinwōt tōmak im laudin̄din̄ rejjab itok jān juon mour epidodo. Elder im Sister Soares rejeļā inepata eo ej waļo̧k jān ad wōnm̧aanļo̧k wōt ilo an jab waļo̧k mōk jān raan ko raitok ilo jerbal im ekkatak, apan̄ ko kōn nan̄inmej, im rub bōro waļo̧k jān jab tiljek, mej nin̄nin̄ ilo an ļotak, im jako an ro jeid im jatid im ro jined im jemād.
Bōtaab jān ito itak in aer ilo mour in, rekar likūt aer tōmak ilo naan ko an Elder Soares jān eoon in em̧m̧an ippān: “Kwōn kōttāik eok; im Irooj am Anij enaaj tōl eok kōn peim, im lewōj n̄an eok uwaak n̄an jar ko am.”4
“Apan̄ ko rej m̧ōttan wōt eddōkļo̧k eo ad,” Elder Soares ej ba. “Ak n̄e kwoj kijenmej ilo en̄taan, n̄e kwoj ekkatak kilen mour jān apan̄ ko, n̄e kwoj tōmak wōt, Irooj ej dāpij wōt kōj ilo iakwe eo an eutiej im ej kōjeraam̧m̧an kōj kōn kōjeraam̧m̧an ko Ekar kallim̧ur kaki.”
Im n̄e jej dāpdep wōt n̄an aen in dāpdep eo, ej ba, Irooj ej jāmin nej kōmakeļo̧k kōj iaad.
“Aolep iien dabdāb wōt n̄an kien ko, n̄an gospel eo, n̄an jeje ko rekwojarjar, im n̄an Irooj Jisōs Kraist ej jipan̄ kōj anjo jān apan̄ ko an mour,” Elder Soares ej kam̧ool. “N̄e jej būkwelōlō im jar, Enaaj pād ippād im Enaaj tōl kōj. Enaaj im̧we kōj kōn ia eo n̄an etal im ta n̄an kōm̧m̧ane. N̄e jej pokake im kōttāik kōj make, Irooj ej uwaake jar ko ad.”
Rikaļoor Ewijlepļo̧k
Ulisses Soares ej juon m̧aan maron̄ im m̧aanjabpopo. Jeļāļo̧kjeņ eo an, ekoba juon master degree kōn business administration, ekar kōpooj eō n̄an jerbal āinwōt juon accountant im rietale jerbal in jāān n̄an elōn̄ corporation ko ilo Brazil. Imminene in ekar kōpooj e n̄an jerbal ilo finance department eo an Kabun̄ in, eo ekar kōpooje e ke ej 31 an iiō n̄an erom juon iaan tōreektōr ro reddiktata an Kabun̄ in an temporal affairs. Maanjabpopo in ekar lukkuun kōpooje āinwōt juon mijen būreejtōn im ilo kūr eo an āinwōt Ritōl Eutiej ilo Jiljilimjuonn̄oul ilo Eprōļ 2, 2015.
M̧okta jān an kūr n̄an Būreejtōnji eo an Jiljilimjuonn̄oul eo ilo Jānwōde 6, 2013 eo, Elder Soares ekar jerbal āinwōt juon rikakpilōklōk ilo im innām āinwōt Būreejtōn eo an Brazil Area Būreejtōnji im āinwōt juon rikakpilōklōk ilo Africa Southeast Area. Ijeņ, ekar jerbal āinwōt juon rikakpilōklōk n̄an Dale G. Renlund, innām juon Ritōl Eutiej ilo Jiljilimjuonn̄oul. Elder Renlund, kiiō ej juon uwaan Doulul eo an Jon̄oulruo Rijilōk ro, ej lan̄lōn̄ kōn iien ko aerro ippān doon.
“Elder Soares ej juon eo emourur, rikallim̧ur, rikaļoor ewūjlepļo̧k an Jisōs Kraist,” Elder Renlund ej ba. “Ijjab jeļā bar juon armej eļapļo̧k an en̄jake m̧ōņōņō n̄e ej pād ilo ijjelōk an Irooj. Eļan̄n̄e kwoj kajjitōk ippān n̄an kōm̧m̧ane juon men, ej kōm̧m̧ane kōn aolepān an maron̄.”
Men̄e ilubwilijin Armej ro Rekwojarjar ilo Peru (tuanmiin̄), Ghana (itulal), ak laļ ko jet ijoko ekar jerbal im jerbal in karejar ie, Elder Soares “epidodo an iakwe armej ro,” Elder Claudio R. M. Costa ej ba.
Ekar ba Elder Soares em̧ōj an “iakwe” Armej ro Rekwojarjar ilo Africa. Juon iaan jerbal ko an im̧aantata ilo eria in ekar tōl juon kweilo̧k eļap an stake ilo Kananga, Democratic Republic of Congo. “Ke ekar ro̧o̧l, ekar jab maron̄ bōjrak an kōnono kōn em̧m̧an im wūjlepļo̧k eo an armej ro ekar ioon er,” Elder Renlund ej ba.
Elder L. Whitney Clayton, eo ekar jerbal ippān Elder Soares ium̧win ļalem iiō im jimettan ilo Būreejtōnji eo an Jiljilimjuonn̄oul, ej kūr Elder Soares juon rikōm̧m̧an koņ. “Ej ron̄jake im jon̄e ļōmņak ko an. Ej lukkuun kōjparok ilo wāween an m̧akūtkūt ilo kweilo̧k ko bwe ainikien ko am rej ejaake juon kuwaer, ijjelo̧kin riaļ ro rej jiāeik.”
Elder Soares ej lukkuun jeraam̧m̧an kōn maron̄ eo an n̄an kōnono ilo kajin Portuguese, English, Spanish, im French. Bōtaab menin letok in, eo ej aikuji eļapļo̧k leļo̧k an, ej juon kōjeraam̧m̧an n̄an Kabun̄ in, Elder Clayton ej ba. Elder Soares emaron̄ kōnono n̄an enan̄in aolep membōr ro an Kabun̄ in ilo kajin ko aer make.
“Ulisses ekar juon ritōl jān ke ekar juon ļaddik,” lale an Elder Claudio Costa brother in law eo an. “E elukkuun māletlet im ekeke, im ej en̄jake eddo in n̄an aolep iien leļo̧k ijo em̧m̧antata emaron̄e. Epidodo an iakwe armej ro ipeļaakin. Ewōr juon būruwōn juon rijilōk em̧ool an Rilo̧mo̧o̧r eo ippān, im ewōr juon an kam̧ool epen bwe Jisōs ej RiKraist eo. Ij iakwe e im kam̧ool kōn e im rejtake e āinwōt juon Rijilōk an Irooj.”
Im Elder David A. Bednar, ej kōnono kōn Doulul eo an Jon̄oulruo Rijilōk ro, ej ba: “Elder Soares ej juon rikaļoor an Rilo̧mo̧o̧r eo erreo, ejjeļo̧k an m̧oņ, im ejjeļo̧k an bōd. Jān meram in paotokin, an ettōn̄ dikdik, im m̧wil eo m̧wilin em̧m̧an, armej ro ban bwini im baam̧le ko rekar, rej, im renaaj bōk im̧we kōn juon kōņaan eļapļo̧k n̄an ļoor Rilo̧mo̧o̧r eo im mour kōn katak ko an gospel eo An.”
Pija ippān kōrā eo pāleen, Rosana, im̧aan Salt Lake Temple jān Kristin Murphy, Deseret News
Ilo epepen in ad, Irooj ekar kōn Edward Partridge, “Būruōn ej erreo Im̧aō, bwe e ej āinwōt Natanael in etto, eo ilo e ekar ejjeļo̧k m̧oņ.”5 Jān Hyrum Smith, Irooj ekar ba, “N̄a, Irooj, Ij iakwe e kōnke m̧ool eo an būruōn, im kōnke e ej iakwe men eo me ejim̧we Im̧aō, Irooj ej ba.”6
Kōn Ulisses Soares, Irooj enaaj ba ejja menin wōt.