Rūm̧m̧an Ded ro
Bun̄tōn eo Im̧aan n̄an Ukweļo̧k
Rijeje eo ej jokwe ilo Ouest, Haiti.
Ikar en̄jake bwe ekar marok mour eo aō. Innem ikar kile bwe ikar aikuj kōnono ippān bisop eo aō.
Kōm̧eļeļe jān Joshua Dennis
Ij keememej raan eo ikar peptaij ippān mijenede ro. Rekar kajjitōkin eō eļan̄n̄e ikar pojak n̄an kōm̧m̧ane bujen in ippān Jemedwōj Ilan̄. Ilo aō kar jab lukkuun ļōmņake menin im kōn juon bōro eborak kōn lan̄lōn̄, ikar ba, “Aeet!” Ikar kōņaan bōk menin letok eo ejeņoļo̧k eo Jemedwōj Ilan̄ ekar letok n̄an eō, im ikar jeļā bwe iban kar m̧ōņōņō n̄e ejako Rilo̧mo̧o̧r ilo mour eo aō. Ak ikar jab lukkuun jeļā ta im̧aan ilo ilju im jekļaj eo aō.
Āliktata, raan eo eļap eaar itok. Ikar jab meļo̧kļo̧ke, im ikar lukkuun m̧ōņōņō.
Raan ko Remarok
Ālkin iien peptaij im kapen eo aō, raan ko rekar lukkuun marok ilo kalimjōkļo̧k. Ikar jelm̧ae būrabōlōm ko an baam̧le eo aō, im ekar pen aō pokake aolepān kakien ko an Anij. Ikar jab jeļā ta eo in kōm̧m̧ane, im ikar kōņaan bōjrak jān aō kōm̧m̧an jabdewōt men. Ilo aō kar kalimjōkļo̧k āinwōt ejjeļo̧k remeļeļe kōn mour eo aō.
Eļap an kar em̧m̧an ippa riiti Bok in Mormon, ak ilo tōre eo ikar kōjejtokjen. Juon raan, ke ikar pād m̧weo make iaaō, ikar en̄jake em̧m̧an in an Jetōb im̧we eō n̄an riiti Bok in Mormon. Ikar jar m̧okta, kōņaan pukōt juon uwaak eo me emaron̄ letok aeņōm̧m̧an n̄an en̄taan ko aō. Ikar kajju kōpeļļo̧k n̄an Alma jebta 5. Eoon 27 ej riit āinwōt in: “Kom̧ ar etetal, im kōjparok ami erreo im̧aan Anij? Kom̧in ba ke, n̄e kar kūr kom̧ n̄an mej ilo iien in, ilo kom̧ make, bwe ebwe ami kar ettā? Bwe nuknuk ko ballemi kar karreoiki im remouj kōn bōtōktōkin Kraist, eo Enaaj itok n̄an lo̧mo̧o̧ren armej ro An jān jero̧wiwi ko aer?
Āliktata, ikar en̄jake an naan kein rekar un̄ūr buruō. Ikar jeļā bwe ij aikuj ukweļo̧k, kōn menin ikar kōjeņoļo̧k juon iien n̄an loļo̧k bisop eo aō. Ikar lukkuun mijak, ak ikar make iuunļo̧k eō bwe in etal im loļo̧k e.
Meļeļe Kalim̧m̧ur eo an Anij.
Ke ikar tōparļo̧k ilo opiij eo an bisop, ikar en̄jake bōd ko aō jon̄an ikar kōņaan bar rool likļo̧k. Ak ikar jar kōn peran n̄an ba aolep men ko ikar aikuj kwaļo̧k. Bisop in ekar karuwaineneiki eō n̄an opiij eo an, innem ekar jar n̄an bōk jipan̄ an Anij. Ekar kōnono n̄an eō āinwōt juon Nejin im ekar kwaļo̧k an iakwe eō ilo naan ko an. Ekar letok n̄an eō naan in kapilōk ko im kar kajjitōk bwe in kōm̧m̧an jet men n̄an bōk joļo̧k bōd jān Anij innem bar roolļo̧k im loļo̧k e.
Ikar lukkuun m̧ōņōņō kōn iien eo em̧m̧an. Ikar ļoor naan in rojan̄ im āliktata ikar meļeļe kōn kalim̧m̧ur eo an Anij n̄an joļo̧k an Alma bōd: “Eļan̄n̄e e ej kwaļo̧k bōro kōn jero̧wiwi ko an im̧aam̧ im Im̧aō, im ukeļo̧k ilo m̧ool in būruōn, e kwōnaaj jeorļo̧k ruōn, im Inaaj jeorļo̧k an bōd barāinwōt” (Mosaia 26:29). Ālkin aō kar ukweļo̧k, ikar jeļā bwe Anij ekar joļo̧k aō bōd. Āliktata ikar maron̄ en̄jake iakwe eo an Jemedwōj Ilan̄ ilo buruō, im ekar jako aō pād ilo marok. Ikar m̧ōņōņō kōn mour eo aō make.
Bisop eo ej Pojak Ijeņ n̄an Jipan̄
Bisop eo ej bōk jikin Irooj ilo ward eo. Jeļā bwe ej pojak n̄an jipan̄ eok pukōt m̧ōņōņō eo em̧ool me Anij em̧ōj an kōpooj n̄an eok. Lōke E Eļan̄n̄e ewōr am̧ būrabūlōm ak aikuj n̄an ukweļo̧k, etal im loļo̧k e. Enaaj Jipan̄ eok.
Ijeļā bwe menin ejjab pidodo n̄an etal im loļo̧k e jet iien. Ak Būreejtōn Lorenzo Snow (1814–1901) ekar kōm̧eļeļe kōn karōk eo an Jemedwōj Ilan̄ indeeo: “Ij ba n̄an kom̧ juon men kiiō bwe ilo [mour eo m̧okta] laļ an jetōb ko, ke rej kwaļo̧k karōk in n̄an kōj … bwe jen itok im idajon̄jon̄e mour in me kiiō jepād ie, jekar aolep m̧ōņōņō im errā kake. … Ak ejjeļo̧k pere ke jekar loe im kar lukkuun meļeļe ilo mour eo m̧okta ke, bwe jen maron̄ tōpar mour eo ilōn̄tata im aibojooj, emenin aikuj bwe jen idajon̄jon̄e mour in.” Ekar wōnm̧aanļo̧k wōt im ba, “jekar kōņaan ļoor ankilaan Anij, im āliktata jepād ijin” (Teachings of Presidents of the Church: Lorenzo Snow [2012], 110).
Ukweļo̧k ej m̧ōttan eo n̄an ļoor ankilaan Anij. Kōn menin ijeļo̧kin am̧ mijak bisop eo, kōm̧m̧an bwe en m̧ōttam. E ekar kūr jān Anij, im emaron̄ jipan̄ eok ukweļo̧k im kōmour jetōb eo am̧ ilo am̧ itok n̄an Jisōs Kraist. Irooj ekōņaan jipan̄ kōj, ak jej aikuj bōk bun̄tōn eo kein kajuon n̄an ukweļo̧k. Ilo wāween in jemaron̄ lo kalim̧m̧ur in ilo Aiseia 1:18 bwe em̧ōj an kūrm̧ool: “Men̄e bōd ko ami rej āinwōt būrōrō, renaaj mouj āinwōt sno.” Im kōn menin, bisop eo ej pojak ijeņ n̄an jipan̄.
Ij kam̧ool bwe Anij emour im bwe Jisōs Kraist ej ad Rilo̧mo̧o̧r. Eļap Aer jimor iakwe kōj aolep!