Digital Wōt
An Jako ijo am̧ro Ļaddik eo jera ekar juon iaan kōjeram̧m̧an ko aō reļļap
Jet iien jej lo unin im̧we ko im jet iien jejjab. Wāween kein jimor, jej aikuj kōjerbal tōmak.
Ikar kōjem̧ļo̧k ijo am̧ro ļaddik eo jera jinointata ilo juon jōm̧ar aibojooj.
Jinoin raan eo, Carter (em̧ōj ukōt etan) im n̄a kōm̧ro kar akweel—eo me ekar jab kāāl n̄an kōm̧ro ilowaan iiō ko jilu, jemjerā eo ej em̧m̧an im bar nana. Jej akweel kōn aolep kain—jān ta eo jej kan̄n̄e n̄an būlāān ko an ilju im jekļaj. Kar jinoin, Iaar kōjekdoon okoktak ko am̧ro jān doon kōn jabōn kōnnaan in ke kōm̧ro “oktak jān doon.” Ak ilo iien am̧ro kōm̧m̧an kōjak ko ekkein oktak n̄an akweel.
Joteenin jōm̧ar eo, kōm̧ro kar bōk juon telescope n̄an juon āne jamden im alooje ijo ko ilan̄. Ak jej lo bwe meram in allōn̄ ekar penjak kōn marok ekar jab alikkar am̧ro alooji. kōm̧ro kar illu, kōm̧ro kar jino bar—akweel.
Ikar etal jān ijo bwe in kamed buruō. “Ejjab n̄a in,” Iaar ļōmņak. Aolep im jeļā ke n̄an rikōm̧m̧an aeņōm̧m̧an ilubwiljin ro jeiū im jatū, im ejouj aō kōnono n̄an ro jet m̧ōtta. Kōn menin etke ij lamōj n̄an ļaddik in me ij watōke aō riakwe?
Iaar reilōn̄ļo̧k n̄an ijo emarok im ikar jar bwe in jeļā wāween aō kōkm̧anm̧anļo̧k jemjerā eo aō ippān Carter. Ejjab to, aenōm̧m̧an ekar kapenjak illu eo aō, im ikar bwilōn̄ ke men eo em̧m̧an tata imaron̄ kar kōm̧m̧an n̄an kōm̧ro jim̧or ej kōjem̧ļo̧k jem̧jerā am̧ro.
Aeņōm̧m̧an ekar bōk jikin. Ekar wōr jejjo iien ko ikar kajejtokjen im̧we n̄an kamōje ijo am̧ro Carter kōnke ikar lukkun oon̄ kōn am̧ro kar lukkun jeļā buruōn doon. Jet iien ikar inepata ippān Anij, ikar tōmak bwe Ekar kōjem̧ļo̧k iien ko aō rem̧m̧an ilo an jab bar letok kōjeraam̧m̧an. Men̄e kar āindein, ikar dāpdep wōt kōn naan in rojan̄ eo an Elder Jeffrey R. Holland jān Doulul eo an Rijilōk ro Jon̄oulruo : “Ilo iien mijak ak pere ak iien jorrāān … kōjparok wōt n̄an ta eo emōj am jeļā kadede im jutak pen m̧ae iien jeļāļo̧kjeņ ej bar itok” (“Irooj, Ij Tōmak,” Liaona, Māe 2013, 93–94).
Ikar jab bōk “eļapļo̧k jeļāļo̧kjeņ” iumin elōn̄ allōn̄ ko, im ikar kōļmenļo̧kjeņ eļan̄n̄e inaaj bōke. Ālkin juon iien jar kōn juon bōro erup, Jetōb ekar un̄ūr buruō, im ba n̄an eō bwe im̧we ko an Jemedwōj Ilan̄ rej n̄an em̧m̧anļo̧k eo an ajri ro Nejin. Unin men otemjej ej litok ejjab ļapļo̧k an aorōk jān tōmak eo aō ilo E.
Kōn jeļā in aō ke Jemedwōj Ilan̄ ekar wōr juon an būļāān n̄an eō im ekar letok n̄an eō kōjatdikdik kōn ilju im jekļaj im ekar jipan̄ eō bwe in jino jerāiki bar juon. Juon jibbon̄, Ikar riiti Katak im Bujen Ko 88:40, ijo Irooj ej katakin bwe “meram ej eddāp n̄an meram.” Ikar kajju kile bwe katak in emaron̄ bar iookļo̧k menin jarā. Ikar jeļā bwe inaaj m̧ōņōņō ippān juon eo me ej mour kōn jon̄ak ko aō im aō meram.
Āliktata ikar iioone Austin. Ekar mōkaj am̧ro jeļā buruōn doon, jān am̧ro jimor kajoor kōņaan m̧ōn̄ā tacos im bwebwenato kōn jikin mission ko am̧ro. Jetōb eo an em̧m̧an ikar en̄jake an āinwōt jetōb eo aō, im āliktata ikar m̧areiki. Jemjerā eo am̧ro ekar jab lukkun āinwōt ami ļōmņake me komaron̄ watōke āinwōt pād ilo jikin alooj pija ko rebun̄bun̄ kōn iakwe an ruo rijerā. Em̧m̧an im elur—juon men ij tōmak bwe enaaj n̄an indeeo.
Elōn̄ iaad jej kōņaan bōk kōmeļeļe ko n̄e epen ad en̄jake im̧we ko. Jān en̄jake in aō, Iaar ekkatak bwe tōmak ilo Irooj emaron̄ jipan̄ kōj bwe jen pokake aolep iien men̄e jejjab jeļā etke. Ilo ad ļōke aolep jeļā ko an Anij, jemaron̄ en̄jake aeņōm̧m̧an ilo kālet ko ad n̄an mour ekkar n̄an im̧we ko m̧ae iien jej bōk “eļapļo̧k jeļāļo̧kjeņ” eo me Emōj an kar kalim̧m̧uri ro retiljek.