M̧ae iien Jenaaj Bar Lo Doon
Rejtak in Rie ko Ad
Jān juon kar ekōnono ilo Oktoba 2005 kweilo̧k eo eļap.
Tōl an jetōb ej lukkuun pedped wōt ilo ad inem̧m̧an ippān … rikanaan ro, rilolo ro, im ribōk revelesōn.
Ewōr aō ikdelel n̄an kōnono kōn opiij ko rekwojarjar an ritōl ro me ewōr aer priesthood ro em̧ōj kar “kūr im kālet er” (K&B 55:1) n̄an tōl Kabun̄ ilo raan kein. …
… Em̧m̧aan ro m̧ōtta [ilo Doulul eo an Rijilōk ro Jon̄oulruo], ekitbuuj aolep, rem̧m̧an, retiljek, im em̧m̧aan ro jemaron̄ lōke er. Ijeļā būruōer. Rijilōk ro rej rikarejeran Irooj. Ikdelel eo aer ej n̄an madmōd ilo kūr ko reļļap im kaļōk aelōn̄ in kiin̄ eo an Anij ioon laļ in. Em̧m̧aan raņ ro rej jerbal ilo raan kein im ilo aer kam̧ool iien, kajjieon̄, im Buruōer reerreo, im iminene ko aer reļļap, ekajoor kōļmenļo̧kjeņ ko aer, im jeļāļo̧kjeņ ko aer ilo jetōb rem̧ūlaļ me ej menin kaenōm̧m̧an ilo ad pād iturier.
… [Ke rekar kūr eō, ikar bōk kapilōk] bwe men eo eaorōk tata ij aikuj kōm̧m̧ane ej n̄an pād aolep iien ilo inem̧m̧an ippān em̧m̧aan rein m̧ōtta. Kōn un in ej juon men eo ikar kōņaan bwe in kōm̧m̧ane kōn aolepān buruō.
… Em̧ōj aō lukkun meļeļe bwe tōl an jetōb eļap n̄e ej pedped ilo ad inem̧m̧an ippān Būreejtōn eo an Kabun̄ in, Būreejtōnji eo Kein Kajuon, im Doulul eo an Rijilōk ro Jon̄oulruo—aolep ro me em̧ōj kūr er … āinwōt rikanaan ro, rilolo ro, im ribōk revelesōn ro. Ijjab jeļā elmen ad inem̧m̧an ippān Jetōb an Irooj eļan̄n̄e jejjab inem̧m̧an ippān Būreejtōn eo an Kabun̄ in im rikanaan ro jet, rilolo ro, im ribōk revelesōn ro.
Kapilōk eo aō n̄an membōr ro ilo Kabun̄ in ej n̄an rie Būreejtōn eo an Kabun̄ in, Būreejtōnji eo Kein Kajuon, Doulul eo an Rijilōk ro Jon̄oulruo, im Rutiej ro jet an Kabun̄ in kōn aolepān buruōd im aolepān ad. Eļan̄n̄e jej kōm̧m̧ane, jenaaj pād ilo juon jikin likapejn̄ak em̧m̧an. …
Jej aikuj rie im rejtake ritōl ro ad ilo jikin ko jej pād ie, kōnke em̧ōj kar “kūr im kālet er.” Aolep membōr ro an Kabun̄ in remaron̄ bōk kapilōk jān juon bisop ak juon branch būreejtōn, juon stake būreejtōn ak juon mijen būreejtōn, im Būreejtōn eo an Kabun̄ in im ro m̧ōttan. Ejjeļo̧k iaan em̧m̧aan rein rej tōl rej kajjitōk kōn kūr eo an. Ejjeļo̧k en ewānōk. N̄an kiiō rej rikarejeran Irooj, kar kūr jān E n̄an ro me em̧ōj kūr er n̄an bōki im̧we kein. Ro kar kūr er, rejtak, im kōjeno̧lo̧k er rej maron̄ bōk rejtak in jipan̄ ko ad.