Atong Luna
Akong Gigamit ang Akong Hugot nga Pagtuo
Mga paghulagway pinaagi ni David Malan
Ang akong pakigdula og ping-pong sa akong higala nga si Erfrey nabalda sa tulo ka tuktok sa iyang pultahan. Nakadungog ko og dili sinati nga tingog nga dunay lain nga tono sa Hiligaynon, ang among lumad nga pinulongan.
Daling mipaingon si Erfrey sa pultahan, ingon og nagpaabut nila. “Dali na!” miingon siya nako. “Gusto ko nga imong himamaton ang akong mga higala!”
Nagsul-ob sila og puti nga mga polo ug kurbata ug mianhi sila aron sa pagtudlo sa manghud nga lalaki ni Erfrey aron sa pag-andam niya alang sa bunyag. Nakig-istorya ko nila sa Iningles, ug sila nadani nga mihangyo nako kon makahubad ba ako atol sa panaghisgutan uban sa igsoong lalaki ni Erfrey.
Abi nako og ang akong tahas mao lang ang pagkamaghuhubad. Apan nahimo kong aktibo nga partisipante sa dihang ang ilang mga pulong midulot sa akong kasingkasing. Duna koy dili masabut nga pagbati, usa ka nagpabilin nga malipayon nga pagbati, nga wala sukad nako masinati kaniadto.
Human niana nga kasinatian, gihangyo nako ang mga misyonaryo sa pagtudlo sa akong pamilya. Apan sa dihang miabut sila, ang akong mga ginikanan hugot nga nakahukom nga ang Mormon wala gyuy lugar sa among pamilya.
Gusto ko nga magpabunyag, mao nga akong gigamit ang akong hugot nga pagtuo. Nagpuasa ug nag-ampo ko. Naningkamot ko nga mahimong ehemplo ngadto nila.
Paglabay sa duha ka tuig, pinaagi sa akong kaugalingong yanong pagtuo ug sa mahigugmaong suporta sa Langitnong Amahan, ang kasingkasing sa akong amahan nalukmay ug mipirma siya sa akong baptismal consent. Malipayon ko nga moingon nga ang akong pagpamatuod sa gipahiuli nga ebanghelyo mao ang akong labing bililhon nga posesyon.
Arnel M., Negros Occidental, Philippines
Gikan sa Primary ngadto sa Young Women
Lisud gyud nako kanunay ang pag-adjust ngadto sa bag-ong mga sitwasyon. Mao nga kulbaan ko nga mobiya sa Primary ug mosugod sa Young Women. Sa sinugdanan ang iskedyul morag lain para nako. Ang Young Women lahi gyud kaayo—walay panahon nga manganta, walay panahon sa pagpakigbahin. Duna sad mi Mutual atol sa semana.
Gusto lang ko nga mahiangay ug mobati nga komportable, mao nga akong gisulayan kining bag-ong iskedyul. Nag-ampo kog maayo, ug nagsugod ko sa pag-adjust sa bag-ong iskedyul ug sa pakigsuod sa ubang batan-ong mga babaye.
Sa paglabay sa mga semana, nagsugod ko sa pagkaamgo ngano nga naa ko sa programa sa Young Women. Nagkat-on pa ako og dugang bahin sa ebanghelyo, nakaangkon og dugang mga oportunidad nga makabaton og gamay nga kaayo matag semana, ug nakaadto ko sa templo ug mobati sa Espiritu sa Ginoo sa Iyang balay.
Karon mapasalamaton kaayo ko sa Young Women. Malipayon ko nga mihatag og kahigayunan niini nga kausaban ug nga ang akong Langitnong Amahan mitabang nako sa pagbuhat sa ingon.
Bethany W., Florida, USA
Ang Limpyo nga Espiritu Mas Labaw pa sa Kompetisyon
Sa ikawalo nga grado naapil ko sa book club. Matag bulan magkita mi aron maghisgot og usa ka libro, ug sa katapusan sa tuig duna mi kompetisyon aron makita kon kinsa nga team ang labing nakahibalo bahin sa matag libro. Usa ka lagda nga kanunay namong gitamud mao ang pagbasa lamang og limpyo nga mga libro.
Usa ka bulan niana, sa dihang nagsugod ko sa pagbasa sa sunod nga libro, gibati nako nga dili kini limpyo. Apan kinahanglan nakong basahon kon gusto ko nga ang akong team modaog sa kompetisyon. Dili nako sila mahigawad. Pipila ka mga kapitulo pa, ang libro migrabe. Sa katapusan, gibutang na nako kini. Nasayud ko nga dili ako makabasa niini—ang akong espirituhanong kalimpyo mas bililhon pa kay sa pagdaog sa kompetisyon.
Apan nabalaka kaayo ko bahin sa pagsulti sa akong team. Ang gabii sa wala pa ang among miting sa club, nag-ampo ko ngadto sa Langitnong Amahan sa pagtabang nako nga makabaton og kaisug sa pag-atubang kanila.
Pagkasunod adlaw nabalaka na ko pag-ayo. Milingkod ko uban sa akong team. Sa dihang nakasugod na ang miting, mopasabut na unta ko sa tanan nga dili mahimo nga mobasa ko sa libro. Apan sa wala pa ko makahimo, ang lider mibarug ug nangayo og pasaylo. Mipasabut siya nga wala siya makabasa sa libro sa wala pa kini ibutang sa among listahan sa mga libro ug wala makahibalo kon unsay anaa niini. Miingon siya nga iya kining kuhaon gikan sa lista. Sa akong pagpauli, nagpasalamat ko sa Langitnong Amahan.
Nasayud ko nga kon atong ituboy ang atong mga sumbanan, ang Ginoo mobantay kanato. Dili Siya moatiman kanunay sa sitwasyon sama sa Iyang gibuhat kanako, apan mohatag Siya nato kanunay sa kaisug sa paghimo og maayong mga desisyon.
Ashleigh A., Utah, USA