3 ka mga Ideya sa Family Home Evening aron Ma-recharge ang Inyong Espirituhanong mga Bateriya
Kinahanglan natong tanan nga ma-recharge ang atong espirituhanong mga bateriya kada adlaw. Si Elder W. Mark Bassett sa Seventy misulat bahin niini nga panginahanglan sa “Tan-aw ug Mabuhi” (Liahona, Ene. 2018). Kini nga mga ideya sa kalihokan nga gibase sa iyang artikulo mahimong gamiton sa mga pamilya nga dunay mga bata sa tanang pangidaron nga magamit sa family home evening.
-
Sama sa mga anak sa Israel, kinahanglan usab kita nga manguha og “espirituhanong mana” kada adlaw—mag-ampo kita, magtuon sa mga kasulatan, maghupot sa mga sugo, ug moserbisyo sa uban aron magpabilin ang Espiritu kanato. Pangita og butang nga magamit ninyo nga “mana” (butones, mga dulaan, mga bola nga papel, uban pa.) ug ikatag kini sa inyong salog. Ipakuha sa mga bata ang mana ug ipabutang sa panaksan. (Aron ang dula mas lisud og gamay, mahimo nimong tagoan ang mana.) Kada higayon nga ilang ibutang ang mana sa panaksan, mahimo silang mohatag og ehemplo sa usa ka aksyon nga naghatag og espirituhanong pag-amuma. Ikonsiderar ang pagbasa sa Exodo 16:19–21 ug maghisgot-hisgot. Ngano nga importante sa mga Israelite ang pagpanguha og mana kada adlaw? Ug ngano nga importante kini nato?
-
Sama sa alternator sa sakyanan nga kinahanglang i-recharge matag karon ug unya sa istorya ni Elder Bassett, kita usab kinahanglan nga ma-recharge sa espirituhanong paagi. Pangita og lyabihanan nga dulaan o kasing—kanang butang nga makatuyok aron magamit. Patuyuka ang dulaan sa pipila ka higayon. Unsay kalabutan niini kon giunsa nato pagdasig ang atong kaugalingon sa espirituhanong paagi? Unsay mahitabo kon hunungan nato pagpatuyok ang kasing? Sa samang paagi, unsay mahitabo kon mohunong kita sa pag-ampo o pag-adto sa simbahan? Mahimo ninyong gamiton nga reference ang seksyon sa “Espirituhanong Mana” sa artikulo ni Elder Bassett.
-
Kon ang atong “espirituhanong mga bateriya” ma-charge ug kusgan, ang Espiritu Santo makauban nato kanunay. Sa dili pa ang family home evening, paghimo og mga lista sa mga aksyon: (1) mga butang nga makapahuyang sa atong espirituhanong mga bateriya (sama sa pagpamakak, pagkamaldito ngadto sa igsoong lalaki/babaye, pagkapakyas sa pagtuon sa kasulatan) ug (2) mga butang nga makapa-charge niini (sama sa pagbayad sa ikapulo, pagbisita sa masakiton, pag-ambit sa sakrament). Basaha og kusog ang matag butang. Hangyoa ang mga bata sa pag-adto sa walang bahin sa kwarto kon ang aksyon makapahuyang sa atong espirituhanong mga bateriya ug ngadto sa tuo kon kini maka-charge niini. Awhaga sila sa pagpili sa matarung.