Mga Tingog sa mga Santos sa Ulahing mga Adlaw
Ang Pag-atiman sa Akong Masakiton nga Masuso ug sa Akong Calling
Sa dihang gitawag ko nga moserbisyo isip magtatambag sa organisasyon sa Young Women sa akong ward, gidawat nako ang call, apan nabalaka ko unsaon sa pagbuhat niini. Gibati nako nga dili andam, ug nakigbisog ko sa usa ka pagsulay.
Tulo ka bulan sa wala pa madawat kini nga calling, human sa taas og risgo nga pagmabdos, ang akong masuso nga batang lalaki, nga si Nicolas, natawo. Nagkinahanglan siya og kanunay nga medikal nga pag-atiman. Pipila ka semana human sa iyang pagkahimugso, usa ka gamay nga pula nga marka diha sa iyang kalimutaw ug nagsugod sa pagtubo sa hinay-hinay. Ang among pediatrician mipasabut nga kadto usa ka benign tumor ug mawala ra inig usa ka tuig na ni Nicolas. Apan ang tumor paspas nga midako. Mitabon kini sa iyang mata ug makaingon sa permanente nga kadaot sa iyang panan-aw kon dili matambalan.
Mihimo mi sa malisud nga desisyon sa pagsugod sa chemotherapy. Ang talandugon nga lawas ni Nicolas negatibo nga mi-react sa pagtambal. Duna siyay hilanat kada adlaw, kanunay nga impeksyon, ug gaan nga timbang. Ang proseso makapahilak niya pirme. Nagkalisud ug nagkalisud nga matuman nako ang akong calling ubos niini nga kahimtang. Wala ko kahibalo unsaon kini sa pagbuhat.
Salamat, kay ang akong bana misuporta nako. Kaming duha mibati nga mopadayon mi. Ang presidente sa Young Women misuporta usab nako. Matinud-anon ug mapailubon siya nga sister. Mitabang siya nako nga makakita sa mga hiyas nga wala nako mahibaloi nga naa nako ug mitabang nako nga makakita og mga paagi nga ako makaserbisyo nga wala nako mahunahuna.
Ang pagpakig-uban sa batan-ong mga babaye matag semana nakatabang nako nga dili mo-focus sa naandan nga mga indyiksyon, eksaminasyon, ug mga doktor. Nakapugong ni nako sa pag-usik-usik og panahon nga mobati og kaguol sa akong kaugalingon o mokwestyon nganong nahitabo kini sa akong gamay nga anghel. Ang akong calling usa ka panalangin, ug sa wala lang damha, si Nicolas nagtubo ug ang pagtambal natapos. Si Nicolas nagmalipayon ug nahimong himsog nga batang lalaki nga puno sa kalagsik.
Ang pagserbisyo niadtong maisugong mga anak nga babaye sa atong Langitnong Amahan nakatabang nako sa pagbuntog sa mga pagbati sa kakulang sa kahanas, pagpalambo og mahangturong panaghigalaay, pagdiskobre sa akong mga talento, ug pagpauswag sa akong mga responsibilidad isip usa ka inahan ug asawa.
Ang Ginoo dili mokuha kanunay sa mga pagsulay gikan nato, apan nasayud ko sa akong tibuok kasingkasing nga Siya andam kanunay sa pagtabang nato nga makabaton og kalig-on sa pag-atubang niini.