Sa Paglingkod diha sa Konseho
Ang Paggamit sa Gahum ngadto sa mga Miting sa Melchizedek Priesthood ug Relief Society
Pasiuna ni Elder M. Russell Ballard sa Korum sa Napulog Duha ka mga Apostoles
Atol sa akong pangalagad isip apostol, kanunay nakong gihisgutan ang gahum ug importansya sa mga konseho sa Simbahan, lakip ang misyon, stake, ward, ug auxilliary nga mga konseho. Nagtuo ko nga ang mga konseho maoy pinakaepektibong paagi aron makakuha og tinud-anay nga mga resulta.
Karong bulana, i-implemintar nato ang pipila ka yano apan importante nga mga kausaban sa kurikulom nga tun-an sa mga sakop sa mga korum sa Melchizedek Priesthood ug sa mga Relief Society inig miting nila sa ilang tagsa-tagsa nga mga organisasyon matag Dominggo. Agig dugang sa pagtuon sa mga pulong sa buhi nga mga propeta gikan sa labing bag-o nga komperensya, buhaton usab nato ang “paglingkod sa konseho” (D&P 107:89) aron hisgutan ang mga isyu nga atong giatubang ug atong mga panginahanglan.
Samtang magkat-on kita sa pagtinambagay sa mas epektibong paagi, ang Dios mopanalangin nato og mas buhong nga pagpadayag ug pagsabut ug mas dakong gahum sa pagtuman sa Iyang buhat.
Sa wala pa buhata kini nga kalibutan, ang Langitnong Amahan mihimo sa Iyang buhat pinaagi sa mga konseho (tan-awa sa D&P 121:32). Sugod nila ni Adan ug Eva, ang katawhan sa Dios nagtinguha sa Iyang tambag diha sa mga konseho. Gani, Ang Dios miisip sa Iyang Kaugalingon nga “Tawo sa Tambag” (Moises 7:35). Sayo niini nga dispensasyon, gisugdan ni Joseph Smith ang pagpahiuli “sa kapunongan sa mga Konseho sa karaang mga adlaw.”1 Karon, ang Simbahan gidumala sa mga konseho sa matag lebel.
Bag-uhay lang, ang kinatibuk-ang mga lider sa Simbahan mitambag bahin sa pagpalig-on sa mga miting sa Dominggo sa Melchizedek Priesthood ug Relief Society. Ang resulta mao ang bag-ong kurikulom nga giulohan Dali, Sunod Kanako—alang sa Melchizedek Priesthood ug Relief Society, nga naka padugang sa paggamit sa mga mensahe sa kinatibuk-ang komperensya ug nakahatag og gahum sa pagtinambagay sa atong mga korum sa priesthood ug sa mga Relief Society.
“Daghan kaayo ang atong nahimo sa pagbuhat sa mga butang sa nangagi,” miingon si Elder Christoffel Golden sa Seventy, kinsa mitabang sa paggiya niini nga kausaban. “Apan ang Ginoo gusto nga kita mopadayon. Ang kauswagan moabut isip resulta niini nga kausaban sa pagtuon sa mga pulong sa buhi nga mga propeta ug paglingkod diha sa konseho.”
Karong bag-o, ang Kinatibuk-ang Kapangulohan sa Relief Society ug ang mga sakop sa Seventy nagmiting sa konseho aron hisgutan sa unsa nga paagi nga ang pagtinambagay makadapit og pagpadayag, makadugang sa panaghiusa, ug makahatag og gahum. Makahatag kini sa mosunod nga mga baruganan, nakahibalo nga kamo mosunod niini nga mga ideya samtang inyong madiskobrehan ang mga kasulbaran nga sakto alang kaninyo, sa inyong ward o branch, ug sa inyong korum o Relief Society.
Gahum sa Katuyoan
“Ingon nga kamo nagtigum sa inyong mga kaugalingon … , ug miuyon ingon nga naghisgot niini nga usa ka butang, ug nangutana sa Amahan diha sa akong ngalan, tungod niana kamo makadawat” (D&P 42:3).
Ang mga konseho mao ang paagi diin “kitang tanan magtinguha sa kabubut-on sa Ginoo.”2 Sa laing pagkasulti, dili igo nga mopakigbahin lang og mga ideya; pinaagi sa pagtinambagay, nagdapit kita og pagpadayag aron kita makat-on unsay gusto sa Ginoo nga atong buhaton sa atong sitwasyon. Makaangkon kita og mas daghang kalampusan sa pagbaton sa maong kasinatian sa pagpadayag samtang hinumduman nato ang mosunod:
1. Focus—sugdi uban sa piho, makahuluganon nga isyu o panginahanglan. Ang pag-focus sa usa ka isyu o panginahanglan makapadugang sa atong abilidad sa paghimo og makahuluganon nga kauswagan. Ang pag-focus makatabang usab nato nga makakita lapas sa makita nga mga simtoma (unsay nahitabo) ug magtinguha og panabut bahin sa sukaranang mga hinungdan (ngano ug sa unsa nga paagi kini nakaapekto sa mga tawo). Pananglitan, mahimong magtinambagay ta bahin kon unsaon sa paggiya ug pagtudlo ang atong kabatan-onan kay sa paghisgot sa panahon nga gigahin sa kabatan-onan pagtan-aw sa electronic nga mga device.
2. Panglantaw—himoa ang isyu o panginahanglan nga usa ka pangutana. Ang usa ka hilisgutan nga gihimo nga pangutana makatabang sa pagpasabut sa doktrina. Tingali mangutana ta, “Unsaon nato sa pag-atubang ang sitwasyon sa makatabang ug makaayo nga paagi?” o “Unsa nga doktrina, kon mas nasabtan, makatabang sa pagsulbad sa isyu?”
3. Gahum—tinguhaa ang pagpadayag. Samtang ang mga konseho maghisgot og mga solusyon, ang katuyoan sa konseho mao ang pagdiskobre sa kabubut-on sa Dios, dili lang ilista ang labing maayong mga praktises o moingon, “Mao kini ang gihimo sa akong miaging ward.” Sama sa gitudlo ni Elder David A. Bednar sa Korum sa Napulog Duha ka mga Apostoles, wala kita magkinahanglan og mga miting; nagkinahanglan kita og mga kasinatian sa pagpadayag.3 Ang pagtinambagay makapadayag og gamhanang mga solusyon nga mosangpot ngadto sa paglihok.
Gahum sa Pag-apil
“Pagtudlo diha sa inyong mga kaugalingon og usa ka magtutudlo, ug dili ang tanan magdungan sa pagpamulong; apan himoa nga ang usa mamulong sa tagsa-tagsa ka higayon ug himoa nga ang tanan maminaw ngadto sa iyang mga gipamulong, nga sa diha nga ang tanan mahuman sa pagpamulong nga ang tanan unta mahatagan og kaayohan sa tanan, ug nga ang matag tawo makabaton og managsama nga kahigayunan.” (D&P 88:122).
Sa mga konseho, ang mga tinguha sa mga indibidwal ug sa organisasyon—sa ward o branch—magkahiusa sa talagsaong paagi, ilabi na kon ang mga partisipante makasabut sa mosunod:
1. Ang matag sakop sa konseho adunay importante nga tahas. Ang mga sakop sa konseho kinahanglang aktibong moapil apan dili modominar sa konseho. Sama sa gitudlo ni Pablo, “Ang mata dili makaingon sa kamot, wala ako magkinahanglan kanimo: maingon nga ang ulo dili usab makaingon sa tiil, wala ako magkinahanglan kanimo. Hinonoa, ang mga bahin sa lawas nga ginaisip nato nga mahuyang mao ang labing kinahanglanon” (1 Mga Taga-Corinto 12:21–22).
2. Ang mga sakop sa konseho maningkamot nga makadugang sa kahayag. Si Propeta Joseph Smith mitudlo “nga ang matag tawo, sa dili pa siya mosupak sa bisan unsa nga butang nga gidala diha sa atubangan sa konseho nga ikonsiderar, mosiguro sa paghatag og kahayag sa gihisgutan kay sa pagpasamot hinoon sa kangitngit, ug nga ang iyang pagsupak pinasubay sa pagkamatarung.”4
3. Ang mga sakop sa konseho maningkamot nga magkahiusa. Bisan pa sa lain-laing mga panglantaw, ang mga sakop sa konseho magkahiusa sa pagtinguha nga “makadawat og giya gikan sa Espiritu Santo.”5 Si Joseph Smith sa makausa miingon atol sa usa ka konseho nga “aron makadawat og pagpadayag ug mga panalangin sa langit gikinahanglan nga ang atong mga hunahuna anaa sa Dios ug mogamit sa hugot nga pagtuo ug mahimong usa sa kasingkasing ug usa sa hunahuna.”6
Gahum sa mga Plano sa Paglihok
“Aron ang matag tawo mahimo nga mobuhat diha sa doktrina ug baruganan mahitungod sa umaabut, sumala sa matarung nga kabubut-on nga Ako mihatag ngadto kaniya” (D&P 101:78).
Ang usa ka konseho dili kompleto kon walay mga plano sa paglihok sa pagpadayag nga nadawat. Ang mga partisipante sa konseho kinahanglang dapiton sa paghimo og piho nga mga pasalig nga ilang buhaton. “Sa pagkahuman sa inyong konseho, kinahanglan nga duna moy mga assignment,” miingon si Sister Jean B. Bingham, Kinatibuk-ang Presidente sa Relief Society. “Ang labing importante nga buhat mahitabo tali sa mga miting.”
Ang lider mogiya sa konseho sa pagsabut ug pag-uyon. Dayon mangulo siya paghimo ug pagrekord sa mga assignment alang sa pag-follow-up unya. Si Sister Sharon Eubank, Unang Magtatambag sa Kinatibuk-ang Kapangulohan sa Relief Society, midugang: “Ang gahum ania kanato. Kon buhaton nato kini, ang Ginoo mopanalangin sa atong mga paningkamot (tan-awa sa D&P 43:9). Ang pagboluntaryo ug pagreport og balik sa mga assignment mao ang importante sa pagtuman sa pakigsaad.”
Tahas sa Lider
“Ang tigsangyaw dili labaw kay sa tigpaminaw, ni ang magtutudlo maayo pa kay sa tinudloan; ug sa ingon niana silang tanan managsama” (Alma 1:26).
Sa pagpalambo sa atong mga konseho, likayan nato ang kalibutanon nga mga konsepto sa pagpangulo. Sa gingharian sa Ginoo, ang lider mao ang “sulugoon sa tanan” (Marcos 10:44). Sa samang paagi, ang lider sa konseho, bisan siya ang tigdumalang awtoridad o usa ka magtutudlo, maghatag og focus apan dili ang importanting punto. Likayan niya nga maoy magsige og sulti o mohukom sa direksyon sa dili pa maminaw sa konsheo.
Ang lider sa konseho adunay importante nga tahas sa paghimo sa katuyoan, mopasiguda sa panaghisgutan, ug modapit sa mga partisipante nga mohimo og mga pasalig nga buhaton. Ang konseho makalihok og mas maayo kon ang lider sa konseho maminaw, mogiya, modapit, manalipod, ug mokumpirmar.
1. Maminaw. Ang maayong mga lider maminaw sa mamumulong ug sa Espiritu Santo. “Nagtuo ko nga ang gasa sa pag-ila maglihok nga mas epektibo,” miingon si Elder Bednar, “kon kita naminaw itandi sa dihang kita nagsulti.”7
2. Mogiya. Ang lider sa konseho mogiya sa panagsultihanay, motugot nga ang mga ideya nga mogawas. Kon gikinahanglan, ang lider molatid pag-usab sa panaghisgutan o mahigugmaong mohan-ay niini pag-usab.
3. Modapit. Ibahin-bahin sa Ginoo ngadto sa mga sakop sa konseho ang pagpadayag. Modapit sa tanan—lakip sa nagduha-duha—sa paghatag og mga ideya makadugang sa potensyal sa pagkat-on sa kabubut-on sa Ginoo.
4. Manalipod. Ang lider sa konseho mohimo og kahimtang alang sa luwas nga mopakigbahin ug sa angay nga pag-atiman niadtong kinsa mopakigbahin ug manalipod batok sa pagpanaway ug paghukom. Sensitibo nga mga hilisgutan nagkinahanglan og mabinantayon nga giya. Mga butang nga kompidensyal magpabilin nga ingon niana.
5. Mokumpirmar. Samtang ang mga partisipante mopakigbahin sa mga hunahuna ug mga ideya, ang lider mokumpirmar sa gisulti pinaagi sa pagpasalamat ug pagkonektar sa mga ideya nga may kalabutan. Kini nga pagkumpirmar makatabang sa mga partisipante nga mobati nga kabahin sa proseso sa pagpadayag ug maghunahuna sa ilang kaugalingon aron sa pagsiguro nga ang ilang gisulti makatabang.
Bag-ong Kurikulom, Bag-ong Pasalig
Uban niining bag-ong tuig ug bag-ong kurikulom moabut ang panahon sa bag-ong pasalig. Napanalanginan kita sa gipahiuli nga ebanghelyo ni Jesukristo. Responsibilidad ug pribilehiyo nato ang pagtinguha sa Iyang giya ug sa paghimo sa Iyang buhat. Kining padayon nga lakang sa atong mga miting sa Dominggo sa Melchizedek Priesthood ug Relief Society dili lang bahin sa usa ka leksyon bahin sa buhat; hinoon kita “maglingkod diha sa konseho” ug magpasiugda og matarung nga aksyon—aksyon nga “moawhag sa daghan mga katawhan ngadto sa Zion uban sa mga awit sa walay katapusan nga hingpit nga kalipay” (D&P 66:11).