Pagtulun-an human sa usa ka Pagtulun-an
Doktrina ug mga Pakigsaad 19:23
Ang Ginoo mipadayag ngadto ni Joseph Smith sa pipila ka mga yawe sa pagdawat og kalinaw kang Jesukristo.
23 Pagkat-on kanako, ug paminaw sa akong mga pulong; lakaw diha sa kaaghup sa akong Espiritu, ug ikaw makabaton og kalinaw ngari kanako.
Pagkat-on Kanako
“Kita nasayud nga kini nga “magtutudlo nga gikan sa Dios’ [Juan 3:2] labaw pa sa usa ka yanong magtutudlo. Siya nga nagtudlo kanato sa paghigugma sa Ginoo nga atong Dios sa tibuok natong kasingkasing, tibuok natong kalag, tibuok natong kusog, ug tanan natong hunahuna, ug sa paghigugma sa atong silingan sama sa atong kaugalingon, mao ang Gamhanan nga Magtutudlo ug Ehemplo sa hingpit nga kinabuhi. …
“Kon kita motubag sa malumo nga pagdapit sa Ginoo, “Pagtuon kamo gikan kanako,” kita mahimong mag-aambit sa Iyang balaan nga gahum.”
Presidente Thomas S. Monson, “Pagtuon Kamo Gikan Kanako,” Liahona, Mar. 2016, 4, 6.
Paminaw sa akong mga pulong
Ang pagpaminaw importante sa pagpalambo og pagtuo kang Jesukristo. “Ang pagtuo magaabut gikan sa madungog ug ang madungog magaabut pinaagi sa pagwali sa pulong sa Dios” (Mga Taga-Roma 10:17).
“Ang mga anak sa Dios kinahanglang makat-on sa pagpaminaw, dayon maminaw sa pagkat-on gikan sa Ginoo” (Presidente Russell M. Nelson, Presidente sa Korum sa Napulog Duha ka mga Apostoles, “Listen to Learn,” Ensign, Mayo 1991, 24).
Lakaw
Ang pagkat-on ug pagpaminaw gikinahanglan sa tinud-anay nga pagsunod ni Jesukristo. Apan dili pa kini paigo. Kinahanglan kitang molakaw, o molihok, sumala sa unsay atong nakat-unan ug nadungog.
“Mao kini kanunay ang hustong panahon sa paglakaw diha sa iyang dalan. Dili gayud ulahi” (Presidente Dieter F. Uchtdorf, Ikaduhang Magtatambag sa Unang Kapangulohan, “Ang Dalan sa Disipulo,” Liahona, Mayo 2009, 78).
Kaaghup
Ang pagkamaaghup naglakip sa “pagpailub ubos sa pag-antus” (tan-awa sa Giya ngadto sa mga Kasulatan, “Maaghup, Pagkamaaghup,” scriptures.lds.org). Kon maaghup kitang molahutay sa atong mga pagsulay nga dili masuko sa Dios, dili lamang kita makabig, apan Siya moalim usab kanato (tan-awa sa D&P 112:13).
Akong Espiritu
Ang pagkamaaghup mosangpot “sa pagduaw sa Espiritu Santo” (Moroni 8:26) ug mao ang “bunga sa Espiritu” (tan-awa sa Mga Taga-Galacia 5:22–23).
Kalinaw kanako
Ang kalinaw dili makita pinaagi sa pag-angkon og daghang bahandi, gahum, o kabantog. Ang kalinaw dili makita sa paglingaw-lingaw. Walay usa niini ang makahatag, bisan kon maangkon ang kaabunda, dili makahimo og bisan unsa nga malungtarong kalipay o kalinaw.
“… Ang Manluluwas … kinsa mao ang tinubdan ug tigpasiugda sa kalinaw. Siya mao ang ‘Prinsipe sa Pakigdait [Kalinaw]’ [Isaias 9:6].”
Elder Quentin L. Cook sa Korum sa Napulog Duha ka mga Apostoles, “Personal nga Kalinaw: Ang Ganti sa Pagkamatarung,” Liahona, Mayo 2013, 34.