Gisaad nga Panalangin sa Pagtambong sa Templo
Ang tagsulat nagpuyo sa Utah, USA.
Nagtinguha gyud ko nga makatambong sa templo kanunay—wala ako masayud unsa ka dakong panalangin ang mahimo niini sa akong pamilya.
Pipila ka tuig ang milabay, si Presidente Oldroyd, usa ka sakop sa kapangulohan sa stake, mibisita sa akong ward ug dunay gisulti nga dili gayud nako makalimtan: “Mosaad ko ninyo nga kon kamo motambong sa templo, ang matag bahin sa inyong kinabuhi mapanalanginan.”
Samtang naghunahuna ko niini, dili nako mahunahuna sa unsang paagi nga ang pagtambong sa templo makaimpluwensya sa matag bahin sa akong kinabuhi. Apan pagkahuman sa pagsimba, nakahukom ko nga dawaton ang iyang tambag ug motambong sa templo kanunay. Gusto nakong sulayan kini nga saad. Ang akong bana gusto nga moadto sa templo kanunay, apan ako nagduha-duha tungod kay kami dunay gagmay nga mga anak. Kinahanglan ming modrayb og usa ka oras ug tunga padulong sa templo sa San Antonio, Texas, USA, mokompleto og endowment session, ug dayon modrayb pauli. Walay mosugot nga mobantay sa among mga anak sulod sa pito o walo ka oras.
Ang Sinugdanan sa usa ka Panalangin
Sa sinugdanan among gisulayan ang laing pamilya nga magpuli-puli og bantay sa mga bata, apan dili malikayan nga dunay masakit o dunay mahitabo. Nakahukom mi nga kinahanglan lang namo nga motakda sa mga petsa sa tibuok tuig ug moadto! Dayon nakahunahuna mi sa “pizza ug dula” nga paagi. Magdungan kami sa pagpangadto sa templo. Ang usa ka ginikanan motambong og sesyon sa templo samtang ang lain modala sa mga bata aron mangaon og pizza. Dayon magbaylo kami: ang ikaduhang ginikanan mohimo og buhat sa templo samtang ang laing ginikanan ilakaw-lakaw ang mga bata sa nataran sa templo. Epektibo ni nga paagi. Ang among mga anak nasayud nga ang templo importante kanamo—nasayud sila sa tanang laing mga butang nga among buhaton sa Sabado—ug makagahin mi og panahon isip usa ka pamilya.
Wala ako masayud unsa ka dakong panalangin ang mahimo niini sa akong pamilya. Human mi makaadto kanunay nga sobra na sa usa ka tuig, naglingkod ko sa usa ka sesyon sa dihang nakamatikod ko og usa ka tawo nga paralays. Naghunahuna ko nga nindot sad nga tua siya didto. Sa among paggawas sa templo, nakita nako siya nga naglingkod duol sa parkinganan, mao nga ang akong bana ug ako naghunahuna nga motimbaya.
Ang tawo mihangyo sa akong bana, nga si Chad, ug nako kon makatabang ba mi niya nga dunay tawagon sa telepono. Miuyon mi nga motabang, ug ang tawo misulti ni Chad kon asa ang iyang telepono. Gi-dial ni Chad ang numero alang niya ug dayon mitunol kaniya sa telepono. Ang tawo dili makaabut niini, bisan og mipahiyom siya. Gitan-aw ni Chad ang kamot sa tawo, nga nakahigot ngadto sa iyang wheelchair, ug daling nakaamgo nga kinahanglan niyang gunitan ang telepono diha sa iyang dunggan. Ang city bus service nga maoy mokuha sa tawo naulahi. Nagpabilin mi uban niya ug nakigsulti hangtud miabut ang bus. Natingala mi niana, bisan pa sa iyang kahimtang, mianha siya sa templo. Nindot kaayo ang iyang kinaiya. Duna siyay nindot nga pahiyom. Sa wala pa siya mobiya, nagbinayloay mi og contact information ug nakahibalo nga ang iyang ngalan mao si Max Para.
Kon si Brother Para makaadto mismo sa templo, makaadto mi sa templo—walay balibaray!
Ang Ehemplo ni Brother Para
Nakahukom mi sa pagbisita niya sa sunod bulan isip kabahin sa among pagbisita sa templo. Nanawag mi og sayo, ug miingon siya nga mahimo ra kaming mosulod dayon inig abut namo. Miadto mi sa San Antonio ug nakita ang gamay nga balay ni Brother Para. Naghigda siya sa iyang higdaanan samtang ang puti nga habol nagtabon sa iyang lawas hangtud sa suwang. Giliso niya ang iyang ulo sa kilid ug nakigsulti namo, dako gihapon ang iyang pahiyom. Gisultihan mi niya nga nahimo siyang quadriplegic [paralysis] sa dihang nag-edad pa siya og mga 30 anyos. Gipakigbahin niya ang iyang pakigbisog ug pagpamatuod.
Ang usa ka higayon nga pagbisita ni Brother Para nahimong mga tuig nga pagbisita. Nahimo siyang espesyal nga kabahin sa among kinabuhi. Wala mi makahibalo unsay buhaton alang niya—dako kaayo ang iyang mga hagit. Ang among nahibaloan mao nga kami mahimo niyang mga higala. Makadala mi og gagmay nga mga regalo: litrato sa Manluluwas, CD sa Basahon ni Mormon sa Spanish, litrato sa templo, putos sa presko nga mga orange. Makabisita mi niya, makakanta og mga kanta sa Primary, ug maminaw niya. Pagkatalagsaon niini nga kasinatian—dili ka mahimong mohatag og gamayng butang ngadto sa Ginoo nga dili makadawat og daghang mga panalangin agig balus.1
Gitudloan mi niya og pasalamat, nga nakapausab sa bahin sa among kinabuhi. Nakat-unan namo nga magpasalamat sa atong kahibalo sa ebanghelyo, sa atong relasyon sa Dios; alang sa atong kahibalo sa plano sa kaluwasan, sa atong panimalay, sa mga sakyanan, pagkaon, ug sinina; sa atong abilidad nga gamiton nato ang atong lawas; alang sa kahigayunan sa pagbuhat og maayo sa atong komunidad; ug alang sa buotang mga tawo libut nato. Si Brother Para miusab sa among kahulugan sa mga pulong lisud ug pagsulay. Kita dunay rason nga magmaya sa atong daghang mga panalangin ug gamiton kadtong mga panalangin sa pagbayaw sa uban.
Pagkat-on sa Pagserbisyo
Sa dihang si Chad didto sa templo kuyog sa usa sa among higala, nga si Brother Gonzales, nakita niya pag-usab si Brother Para didto sa templo naghulat sa van nga mokuha kaniya. Dugay nang naghulat si Brother Para. Sila si Chad ug Brother Gonzales nakahukom nga sila na lay mohatud ni Brother Para. Si Brother Gonzales dunay dakong trak nga itom. Sa dihang, miabut ang sakyanan nga puno sa mga priest gikan sa among stake, ug mitabang sila sa pagbutang sa bug-at nga wheelchair sa luyo sa trak. Dayon ilang gialsa si Brother Para ngadto sa trak, ug gitauran og seat belt, ug gigunitan siya aron dili matumba. Nakasiguro ko nga kanang adlawa nindot kaayo alang ni Brother Para—wala siya magdahum nga makapauli gikan sa templo nga sakay sa trak sa iyang gipangandoy nga trak!
Bulahan sa Matag Paagi
Sa among katapusang pagbisita sa San Antonio Temple sa wala pa mi mobalhin, nakabisita mi ni Brother Para. Niining espesyal nga katapusang pagbisita, nakauban ni Brother Para ang among tibuok pamilya sa panihapon.
Mapasalamaton ko nga akong gisulayan ang saad ni Presidente Oldroyd. Dili unta mahimamat sa akong pamilya si Brother Para kon wala pa mi motambong sa templo. Lahi na ako nga tawo—nagkaanam nga mahimo kong unsay gusto sa Ginoo nga ako mahimo. Kon atong unahon ang Ginoo ug motambong sa templo, ang atong mga kinabuhi mapanalanginan sa matag paagi.