Ang Templo Naghatag Kanato og Mas Taas nga Panan-aw
Ni Jean B. Bingham
Kinatibuk-ang Presidente sa Relief Society
Sama sa teleskopyo nga nakapunting sa mga bitoon lapas sa atong panan-aw, ang templo moabli sa atong mga hunahuna ngadto sa mas taas ug mas lapad nga panan-aw.
Pipila sa among labing klaro ug importante nga mga handumanan nga nagpuyo sa Midwestern United States isip batan-ong mga ginikanan mao ang tinuig nga pagbisita ngadto sa templo sa Washington, D.C. Nianang higayuna mao lamang kadto ang bugtong templo nga nag-operate sa silangan sa Suba sa Mississippi. Nakahibalo nga ang mga ordinansa sa templo importante alang sa tanang mga anak sa Langitnong Amahan nakahatag og kadinalian sa among mga paningkamot.
Sama sa kadaghanan kaninyo, nakigsabut mi sa among mga higala nga atimanon ang among gagmay nga mga anak, mibiyahe sa gabii sakay sa bus nga puno sa isig ka miyembro, migahin og duha ka bililhong mga adlaw naghimo og daghang buhat sa templo kutob sa among mahimo, ug dayon misakay balik sa bus pauli sa gabii gihapon aron kami makatambong sa among mga miting sa Simbahan pagka Dominggo. Kadto nga mga biyahe ingon og dili mga sakripisyo, bililhon kadto tungod sa espirituhanong pagbayaw nga gikahatag sa among mga kalag paglabay sa mga bulan.
Pipila ka tuig ang milabay, nadasig mi sa pag-abut sa Chicago Illinois Temple, ang unang templo nga gitukod sa North America Central Area sukad sa Cardston Alberta Canada Temple 62 ka tuig na ang nakalabay. Ang templo nga 45 ka minuto ra ang gilay-on gikan sa among balay, nalipay kaayo mi nga makatambong na pirme kay sa kausa lang sa usa ka tuig ug sa pagdawat nianang espirituhanong pagkaon sa kanunay.
Apan karon, bisan og ang pipila nato nagpuyo na nga duol sa templo, nakita gihapon nato nga lisud ang pagsulod sa templo kanunay. Tingali mas sayon nga mailad kita sa paghunahuna tungod kay mas duol na ang templo, “Moadto ko ugma, kon naa koy panahon.” Sayon nga mabalda sa mga pressure karon ug mabaliwala ang mas importante nga mga oportunidad. Si Elder Richard G. Scott (1928–2015) sa Korum sa Napulog Duha ka mga Apostoles miingon, “Ako moawhag kaninyo sa paghimo sa inyong kaugalingon nga tumong kon unsa ka sagad kamo makahimo sa mga ordinansa nga gitanyag sa atong magamit nga mga templo.”1
Kon ibaliwala nato ang oportunidad sa pagtambong kanunay kon motugot ang atong mga sirkumstansya, kon dili nato seryusohon ang oportunidad sa pag-adto sa templo nga duol ra kaayo nato, mahimong dili nato madawat ang umaabut nga mga panalangin ug mga oportunidad nga giandam sa atong Amahan ug sa Iyang Anak kanato. “Ako, ang Ginoo,” miingon Siya “mapugos sa pagtuman kon kamo mobuhat sa unsa nga Ako misulti, apan kon kamo dili mobuhat sa unsa nga Ako misulti, kamo dili makaangkon og saad” (DP 82:10).
Kon ang mga panghitabo nagkahiusa sa pagpugong nato sa pag-adto sa templo, hinumduman nato ang kasiguroan nga gihatag ni Jesukristo: “Dinhi sa kalibutan aduna kamoy kagul-anan: apan sumalig kamo; gidaug ko na ang kalibutan” (Juan 16:33). Kon mopadayon kita ug motambong sa templo bisan pa sa mga babag, maangkon nato ang tabang sa Manluluwas sa pagbuntog sa kalibutan nga atong gipuy-an. Usa ka higayon niana samtang ang akong bana ug ako nangandam nga moadto sa templo, dihay miabut nga mga problema. Sa katapusan, sa dihang hapit na mi mogawas sa pultahan, dihay “panaglalis sa among kaminyoon.” Samtang kaming duha hilom nga naglakaw padulong sa sakyanan, madungog namo ang among kinamagulangan nga anak nga babaye nga mihatag og kasiguroan sa iyang igsoon, “ayaw kabalaka; mopauli sila gikan sa templo nga malipayon kanunay.” Ug sakto siya!
Ang mga Templo Nakapahinumdom Nato sa Gilapdon sa Kahangturan
Bisan kon moadto kita sa templo nga ang mga kasingkasing puno sa kalipay o nabug-atan sa kasubo, ang templo mao ang dapit alang sa matag takus nga miyembro nga dunay kasingkasing nga mabayaw ug malig-on.
Moadto ko sa templo nga puno sa dakong pasalamat sa panalangin nga gihatag ngadto sa minahal nga dunay problema; nakahilak usab ako sa grabe nga kasubo tungod sa akong kaugalingong mga kapakyasan. Nakadawat ko og mga pag-aghat ug instruksyon ug bisan gani pagbadlong gikan sa Espiritu samtang nagserbisyo isip proxy alang sa tawo nga nagdawat sa mga ordinansa nga motugot kaniya sa pag-uswag hangtud sa kahangturan. Kadtong tanang mga kasinatian nakabayaw ug nakalig-on nako. Ug oo, nakalingkod ko og daghang mga oras sa templo isip “duty,” nagtuman lang sa akong obligasyon, ug gani akong makita ang akong kaugalingon nga nakatulog atol sa mga sesyon sa templo sa dihang ako usa ka magtutudlo sa early-morning seminary! Apan matag higayon nga moadto ko sa templo, napanalanginan ko. Gihatagan man kita og diha-diha nga panalangin o matigom ang atong mga paningkamot alang sa umaabut nga mga panalangin, ang matag panahon nga atong gigahin sa templo moresulta og personal nga pagtubo.
Kon naa sa templo mapahinumduman ta sa gilapdon sa kahangturan, sa paghinumdom sa atong mga katigulangan ug paglantaw sa atong mga anak. Ang atong mga anak malig-on usab sa ilang mahangturong panglataw kon sila mo-focus sa templo. Unsaon nato nga mas makaandam sila alang sa templo—usa ka importante nga lakang sa ilang mahangturong kauswagan? Si Presidente Russell M. Nelson, Presidente sa Korum sa Napulog Duha ka mga Apsotoles, mitambag, “Ang mga ginikanan kinahanglang motudlo sa ilang mga anak sa kaimportante sa templo gikan pa sa unang mga adlaw sa bata.”2 Si Presidente Spencer W. Kimball (1895–1985) mitambag sa mga ginikanan sa pagbutang og litrato sa templo sa kwarto sa ilang mga anak aron ilang makita kanang sagrado nga pahinumdom kada adlaw hangtud mahimo kining kabahin nila.3 Mahimo usab nga inyong isulti sa inyong mga anak ang mga panalangin nga inyong madawat sa pagtambong sa templo ingon man usab sa inyong pagpamatuod sa kalipay nga inyong gipaabut sa mahangturong mga relasyon uban nila. Ug makasuporta kamo sa inyong mga tin-edyer sa ilang tinguha sa pagpahigayon og mga bunyag alang sa mga patay. Hinumdumi sa mga leksyon ug mga higayon sa pagtudlo sa inyong family home evening nga “ang templo mao ang tumong sa matag kalihokan, matag leksyon, matag naglambo nga pamaagi diha sa Simbahan.”4
Kantaha ang mga pulong nga “Gusto kong makita Ug mosulod sa templo. Mohimog pakigsaad; motuman gyud ako,”5 motabang kamo nila nga mobati og tinguha sa pagsulod sa balay sa Ginoo. Ug ang inyong kaugalingong kasingkasing mapuno sa pasalamat alang sa Langitnong Amahan, alang sa Iyang plano sa kaluwasan, alang sa Manluluwas ug sa Iyang Pag-ula nga nakapahimo niini nga posible alang kaninyo nga makauban ang inyong mga minahal sa kahangturan. Ang paagi sa Manluluwas mao ang “dalan paingon sa kalipay dinhi niini nga kinabuhi ug sa kinabuhing dayon sa kalibutan nga moabut.”6 Kana nga dalan mogiya ug mopadulong ngadto sa templo!
Ang mga Templo Mao ang Dangpanan gikan sa Kalibutan
Ang kalibutanon nga mga impluwensya makapalayo nato gikan sa templo. Usa ka minahal nga higala nabalaka sa mga opinyon ug mga espekulasyon bahin sa Simbahan nga iyang nabasa sa internet. Nakahukom siya nga dili na lang moadto sa templo hangtud matubag ang iyang mga pangutana. Uban sa akong tibuok kasingkasing, mohangyo ko ninyo kinsa adunay mga pangutana nga makaapekto sa inyong pagpamatuod sa pagpadayon sa personal nga pag-ampo ug pagtuon sa kasulatan ug sa pagpadayon sa pagtambong sa templo samtang kamo maningkamot sa pagpangita sa mga tubag nga makahatag ninyo og kalipay. Pabilin nga naka-focus sa ebanghelyo aron makalikay nga mabalda pinaagi sa maabtik apan sayop nga mga idolohiya. Ang usa ka tawo dili magpatambal sa pisikal nga sakit sa pagpangayo og medikal nga tambag gikan sa usa ka star football player labaw pa nga ang importante nga espirituhanon nga mga pangutana dili saktong matubag sa tawo nga limitado og pagsabut sa gipahiuli nga ebanghelyo ni Jesukristo. Ang Espiritu Santo, kinsa nagsaksi “sa kamatuoran sa tanan nga mga butang” (Moroni 10:5), “mosulti kaninyo sa inyong hunahuna ug sa inyong kasingkasing” (D&P 8:2) unsa ang mahangturong kamatuoran.
Usa sa mga dapit nga maangkon kana nga Espiritu nga mas buhong mao ang diha sa templo. Kon ikaw takus nga mosulod sa balay sa Ginoo (nga susihon nimo ug sa imong bishop), palihug adto sa templo uban sa inyong mga pangutana ug dawat og kasiguroan nga bisan kon kamo wala makasabut sa tanang mga butang karon, ang Ginoo nakasabut. Hinumdumi ang tanan nga inyo nang na-hibaloan ug nasabtan. Ang mga butang nga inyo nang na-hibaloan ug nakadawat og espirituhanong pagsaksi mogiya ninyo ngadto “sa kalinaw sa Dios, nga labaw sa tanang pagpanabut, magabantay sa inyong mga kasingkasing ug sa inyong mga hunahuna diha kang Kristo” (Mga Taga-Filipos 4:7). Mopamatuod ko nga ang pagsabut ug kalinaw nga inyong gitinguha moabut kon magpadayon kamo nga magbaton og hugot nga pagtuo nga ang inyong Amahan sa Langit mogiya kaninyo ngadto sa kamatuoran.
Mipahinumdom si Isaias kanato nga ang templo mao ang “usa ka dalangpanan … gikan [sa] bagyo” (Isaias 4:6). Naghatag usab og kasiguroan ang mga pulong ni Presidente Thomas S. Monson: “Sa atong pagsulod sa mga pultahan sa templo, atong gibiyaan ang mga problema ug kalibug sa kalibutan. Sulod niining sagrado nga balay, makita nato ang katahum ug kahusay. Adunay kapahulayan sa atong mga kalag ug kahupayan gikan sa mga problema sa atong kinabuhi.”7
Samtang magkadaghan ang kasamok sa kalibutan ug ang mga salagubangon sa inadlaw nga kinabuhi magpatong-patong, kinahanglan nga kita mo-focus sa mga butang nga maoy importante. Sayon ang mag-focus sa negatibo ug sa kalibutanon nga mga kasamok, ingon og atong gitan-aw ang atong mga kapakyasan ug mga problema gamit ang microscope. Kon anaa ta sa templo makapahinumdon kini nato nga magbaton og mahangturong panglantaw. Sama sa dako nga teleskopyo nga naka-focus sa mga bitoon lapas sa atong panan-aw, ang templo moabli sa atong mga hunahuna ngadto sa mas taas ug mas lapad nga panan-aw. Makatugot kini nato sa pagtan-aw, sa paglaum, ug maningkamot nga mahimo ang tanan nga gusto sa Langitnong Amahan nga kita mahimo. Makatabang kini nato nga maka-focus sa mahangturong mga kamatuoran—sa Langitnong mga Ginikanan kinsa nahigugma nato, sa atong tinuod nga bili isip Ilang mga anak, ug unsay mahimo nato isip “mga manununod sa Dios, ug isig ka manununod ni Kristo” (Mga Taga-Roman 8:17). Sa templo, ang plano sa Dios gitudlo ug ang mahangturong mga pakigsaad gihimo. Sa templo, gihatagan kita ug mga pamaagi aron atong makab-ot ang labing taas ug labing maayo nga mahangturong kaugalingon.
“Kon motambong kita sa templo,” tambag ni Presidente Monson, “dunay moabut nato nga matang sa pagkaespirituhanon ug pagbati sa kalinaw nga molabaw pa sa bisan unsang pagbati nga moabut sa kasingkasing sa tawo.” Masabtan nato ang tinuod nga kahulugan sa mga pulong sa Manluluwas sa dihang Siya miingon: “Kaninyo ibilin ko ang kalinaw, kaninyo ihatag ko ang akong kalinaw. … Kinahanglan dili magkaguol ang inyong kasingkasing, ni magtalaw’ [Juan 14:27].”8
Ang Inyong Pagserbisyo sa Templo Makapatandog sa Uban
Ang espiritu nga inyong madala gikan sa inyong pagserbisyo sa templo makapatandog sa daghang tawo nga inyong ikahimamat—ang uban nga tingali wala ninyo makonsiderar. Sa among pagpauli gikan sa among pagbisita sa templo sa Washington, D.C., ang grupo sa mga miyembro mipakigbahin sa ilang mga pagpamatuod samtang nagdagan ang bus padulong pauli. Usag usa, ang mga partisipante mipakigbahin sa ilang kalipay ug pasalamat sa karon ug mahangturong mga panalangin sa templo. Ang among dili miyembro nga drayber sa bus wala na makaantus. Gikuha niya ang mikropono ug mipadayag og pasalamat nga nahiuban namo. Dayon miingon siya, “Wala ko kahibalo unsay anaa ninyo, apan duna koy gibati nga lahi.” Dayag lang nga, ang ward mission leader nga diha sa bus mikuha sa iyang contact information ug dayon gihatag kini ngadto sa mga misyonaryo.
Dapiton ko kamo sa pagpahimulos sa gasa sa templo nga duol kaninyo kutob itugot sa inyong mga sirkumstansya. Malig-on kamo ug makakita og kalinaw diha sa balay sa Ginoo nga si Jesukristo, kay Siya mao ang kahayag ug ang kinabuhi ug ang paglaum sa kalibutan. Samtang magkaduol na ang mga adlaw sa Iyang gisaad nga pag-anhi, hinaut nga makadawat kamo sa Iyang kahayag ug mobati sa paglaum nga gitanyag sa Iyang balaan nga mga templo.