Pagpangita og Kalinaw: 4 ka (Dugang) nga mga Paagi sa Paggamit sa 2018 nga Tema sa Mutual
Ang 2018 nga Tema sa Mutual nagtudlo sa kabatan-onan bahin sa kalinaw nga ilang madawat gikan kang Jesukristo. Ang tema nagagikan sa Doktrina ug mga Pakigsaad 19:23 diin ang Ginoo midapit, “Pagkat-on kanako, ug paminaw sa akong mga pulong; lakaw diha sa kaaghup sa akong Espiritu, ug ikaw makabaton og kalinaw ngari kanako.” Pagkagamhanan nga mensahe! Ania ang upat ka makalingaw nga mga paagi sa paggamit sa tema sa Mutual aron sa paglig-on sa kabatan-onan niining mahagiton nga mga panahon:
1. Pangbukas nga tulumanon
Pinaagi sa paglakip sa tema diha sa sinugdanan sa Mutual, mapahimutang ninyo ang kalidad sa tibuok kalihokan. Sa dili pa ang matag kalihokan, mahimo kamong motudlo og usa ka batan-ong lalaki o babaye sa pagpili og kasulatan kalabut sa Doktrina ug mga Pakigsaad 19:23 ug ipresentar kini ngadto sa grupo. Makagahin usab kamo og panahon atol sa pangbukas nga tulumanon sa pagtuon sa mga bersikulo bahin sa bersikulo 23 aron masabtan ang konteksto niini.
2. “Paminaw sa akong mga pulong”
Kini nga kalihokan makalingaw, usa ka mahagiton nga bag-ong ideya sa kalihokan sa pagluto nga anaa sa “Kamo, ang Kabatan-onan, ug ang Tema sa Mutual” (Ensign o Liahona, Enero 2018). Pagpili og recipe ug ipabasa kini sa usa ka tawo samtang ang kabatan-onan maminaw ug mosunod sa mga intruksyon sa pagluto sa sud-an. Dayon, pagpatukar og kusog nga musika matag karon ug unya samtang nagsulti ang magbabasa, nga makahimo nga mas lisud paminawon ang mga instruksyon. Awhaga ang magbabasa sa pagpadayon sa pagbasa sa recipe ug dili mosubli niini. Human sa kalihokan, hisguti kon sa unsa nga paagi nga ang kalibutan nakabalda sa mga pulong ni Kristo nga nakapahimo nga ang pagsunod Kaniya mas malisud.
3. “Pagkat-on kanako”
Kini nga kalihokan makatudlo sa kabatan-onan unsaon sa pagpangita og kalinaw pinaagi sa pagtuon sa kinabuhi ni Kristo sa makapaikag, espirituhanong paagi. Sa mga hawanan sa inyong meetinghouse sa ward (o bisan unsa nga angay nga dapit), adunay lain-laing mga estasyon nga gipahimutang diin dunay mga liltrato/mga butang nga nagrepresentar sa pipila ka makapabug-at sa kinabuhi sa kabatan-onan—mga butang sama sa schoolwork, mga gubat/hungihong sa mga gubat, mga tawo nga dili mabination, uban pa. Ang matag estasyon kinahanglang anaa sa hawanan sa gawas sa klasrom. Sa matag estasyon, tuguti ang kabatan-onan sa paghisgot sa pipila sa ilang mga pagbati ug mga kasinatian kon sa unsa nga paagi nga kining maong kabug-at makaapekto kanila. Dayon, ablihi ang pultahan sa kwarto diin anaa sa gawas ang estasyon. (Mahimo gani nga adunay usa ka painting ni Kristo nga gibutang sa pultahan.) Sa sulod sa kwarto, kinahanglang dunay laing estasyon nga gipahimutang nga dunay video/kasulatan/mensahe sa porsyon sa kinabuhi ug mga pagtulun-an ni Kristo nga makatabang nga makahatag og kalinaw kalabut sa kabug-at nga anaa sa hawanan. Tulo sa duha ka bahin nga mga estasyon (usa ka bahin anaa sa hawanan, usa ka bahin anaa sa klasrom) makahimo na sa paghatag sa tibuok kalihokan.
4. “Kamo makabaton og kalinaw ngari kanako”
“Panaygon alang sa kalinaw” isip usa ka grupo sa Mutual. Bisan og ang pagpanaygon sa kasagaran himoon panahon sa Pasko, usa kini ka nindot nga kalihokan sa bisan unsang panahon sa tuig. Pangita og pipila ka mga pamilya nga inyong nailhan nga mahatagan og espirituhanong kadasig ug dayon bisitahi sila sa ilang balay nga magdala og makaon ug manganta og pipila ka mga kanta. Ang mga himno makadapit sa Espiritu, nga makahatag usab og dugang nga kalinaw.