O Le Taimi Na Moni Ai le Fuafuaga
E alala le tusitala i Iuta, ISA.
Na faafuasei ona sili atu le fuafuaga o le faaolataga nai lo na o se siata faasolo—sa avea lea ma pogai o lo’u faamoemoe ma le mafanafana.
Ata na tusia e Allan Davey
“Tusi uma i lalo au taleni, ona filifili lea o se [taleni] se tasi e faamatala mai ia i matou,” na fai mai ai Sister Jensen i le matou vasega o le Lora. Sa ou faamatala atu ma le mitamita, o le volipolo sa avea ma a’u taleni aupito maoae ma o le vaitau o le a sosoo ai—o lo’u tausaga mulimuli lea i le volipolo—o le a avea ma tausaga aupito sili ona manaia.
“E tele ituaiga o taleni. O nisi o meaalofa faaleagaga,” na aoao mai ai Sister Jensen. “Ou te manatu ua faamanuiaina a’u e le Tama Faalelagi ina ia mafai ona ou alofa i tagata uma e siomia a’u.”
Na faasusulu atu e Sister Jensen le alofa i soo se mea na alu i ai ma faasoa atu lana molimau i talanoaga i aso uma. O lona alofa sa moni, agalelei, ma faapei o Keriso. Na oo ina sili atu ona avea o ia nai lo na o se taitai o Tamaitai Talavou ia te a’u—sa pei o ia o se tina lona lua, o se uso, po o se uo lelei lava i le aluga o o’u tausaga i le aoga maualuga. Sa ma o faatasi i konaseti, o faatasi e faatau, ma fai faatasi ia siamu vine. Sa ia aumaia mo au se puligi na kuka i le fale ina ua se’i o’u nifo tulimanu, ma sa fiafia e asi mai a’u i le tamaifale sa faatau atu ai aisa-vili lea sa ou faigaluega ai. Sa faigaluega o ia i la’u aoga, o lea sa alu ai i a’u taaloga volipolo uma lava.
O ni nai masina mulimuli ane, i le latalata i le faaiuga o malologa o le taumafanafana, sa ou ala ai i le ta o le 3:00 i le vaveao ina ua tatagi le telefoni. Na tali e lo’u tina ona sau ai lea i totonu o lo’u potumoe. Na fai mai o ia, “Na aafia le auaiga o Jensen i se faalavelave tautaavale a o taliu mai mai la latou mafutaga faaleaiga.” “Na taavalevale ese le taavale mai le auala taavale, ma maliu ai Sister Jensen.”
Sa tau pe lo’u fatu. “E le moni lenei mea,” o o’u mafaufauga ia. “Sa tesi mai o ia i se taimi na muamua atu ananei. E faapefea ona alu o ia i lenei taimi?”
Sa ou lagonaina uma i le taimi e tasi le te’i, le mautonu, ma le faanoanoa. Ina ua mavae ni nai minute, ona oo mai lea o le loimata maligi, ma sa opo a’u e lo’u tina a’o ou tagi. Sa faigata ona [ou] moe, o lea na ou taotooto ai iina i le po atoa ma [faasolo] o’u mafaufauga ma tagi.
I vaiaso na sosoo mai ai, na ou oo ai i se faanoanoa tele lea ou te le’i oo muamua i ai. Sa le’i avea le volipolo ma se mea na ave i ai la’u faamuamua, ma sa ou le toe tulimatai atu i le amataga o le tausaga aoga. O mea uma sa ou fiafia lava i ai muamua, ua tanumia uma nei e le faanoanoa. Na ou tusia i la’u apitalaaga i se tasi o po, “Sa matuai ou lagonaina le lofituina i le faavauvau.” “E le mafai ona uma lo’u tagi ma o taimi uma ou te lelava ai.”
O le po a o lumanai le aso muamua o le aoga, sa ou taoto ai i lo’u moega ma ou tagi ma mafaufau e uiga i le maliu o Sister Jensen. Sa ou lelava faanoanoa, ma na ou iloaina sa ou manaomia le fesoasoani ia faatoilalo ai le tiga. Na manaomia ona ou tatalo.
Sa ou tatalo, “Faamolemole fesoasoani mai ia ou malamalama i le pogai na maliu ai o ia, ma pe faapefea ona ou taulimaina lenei mea.”
Sa ou tootuli filemu iina, ma manatunatu pe mata o le a tali mai o Ia. Ina ua mavae ni nai minute, sa amata ona faia e lo’u mafaufau ni sootaga i le va o mea uma na tutupu. Sa lagona le mafanafana o lo’u loto, ma na lagonaina le siitia o lo’u mafaufau. Sa ou iloaina o nei manatu sa le o ni o’u manatu; sa aoaoina a’u e le Agaga.
O le fuafuaga o le faaolataga—le siata faasolo na aoaoina ai a’u mai lava i le Peraimeri—e moni. Na fanau mai Sister Jensen, sa oo o ia i le fiafia, sa ia onosaia tofotofoga, sa ia faasoa atu lona alofa, ma o lenei ua i ai o ia i le lalolagi o agaga. O loo ola pea lona agaga, ma o le a ou toe vaai ia te ia. Na ou iloaina o lenei fuafuaga, le fuafuaga o le fiafia, na mamanuina e fesoasoani ia tatou toe foi atu ai i lo tatou Tama Faalelagi, i o tatou aiga, ma i a tatou uo. I lena taimi, na leai se mea na sili atu ona ou manao i ai nai lo o le ola amiotonu ina ia mafai ona ou toe vaai ia te ia.
I le aluga o nai na vaiaso muamua o le aoga, sa ou taulai atu e atinae taleni a Sister Jensen o le alofa i tagata uma. Pe a ou taulai atu i le alofa atu i isi tagata, e amata ona teatea malie lo’u tiga ae ou lagonaina le fiafia atili. Na ou aoaoina, e tele auala e mafai ona faaali atu ai lo tatou alolofa i isi—e ala i le faalogo atu ia i latou, e ala i le ataata atu ia i latou, e ala i le aveina atu o sina mea latou te fiafia ai, pe e ala i le faamalo atu ia i latou. O nai mea laiti nei sa faia e Sister Jensen mo a’u, o le auala lelei lava la e manatua ai pea o ia o le faasalalau atu o lona ituaiga alofa.
E ui lava ua maliu Sister Jensen, ae o le a ou lagonaina pea lona alofa. Pe a ou taumafai i aso taitasi e faaali atu sina alofa faateleina mo isi tagata, ua ou ola i le ituaiga olaga sa ia ola ai—ma faia ai se laasaga se tasi e latalata atili ai i le toe vaai ia te ia.