Fesili & Tali
“E faapefea ona ou faaavanoa le taimi mo gaoioiga a le Ekalesia, afiafi faaleaiga, ma le suesuega o tusitusiga paia ae ua tele lo’u taimi e alu i meaaoga?”
Vaaifaalemafaufau e faapea, e leai se isi lava mea e ai i le aso ae na o le aisakulimi lava. Pei e manaia foi—seia oo ina tau le lelei ou faalogona i lou tino. Ae, mata e mafai ona e ola maloloina i le ai nao le parokoli (broccoli)? Leai, o le soifua maloloina lelei e manaomia ai le paleni o ni taumafa eseese.
Ia mafaufau la i le tele o gaoioiga i o tatou olaga. O lo tatou faaleagaga, faalemafutaga, ma faaleaoaoga, e taua uma i lo tatou tuputupu a’e. E faapefea la ona ave lau faamuamua i mea e taua?
Vaavaai i le mea e sili ona taua ia te oe i le taimi nei ma tatalo ia iloa le mea e te taulai atu i ai. Na faamalosiau mai Elder M. Russell Ballard o le Korama a Aposetolo e Toasefululua, “Ia faamuamua i lou mafaufau le paia o feagaiga ua e osia ma le Alii a o e tusia i lalo au fuafuaga faataatitia o aso uma.”1 E manuia mea uma pe a e faamuamua le Alii.
Ia manatua, “o nisi mea e lelei tele, ae o isi e silisili ona lelei.”2 Saili le Agaga Paia e fesoasoani ia e filifilia ai le mea e sili ona taua. Atonu e te faanaina se tasi o nai ou tei o loo tagi a o le’i faia [lau] meaaoga, ae e mafai ona faamuamua le alu i le Mutuale i lo o le matamata i se tifaga ma au uo. Atonu foi e te faailoaina ia mea e fai ma faalavefau i lou olaga. Ae a pe a faaalu muamua le taimi i tusitusiga paia nai lo o au uo i le Apiofoliga [Facebook]?
O le mea taua lava, aua ne’i galo ona faalagolago i le Alii mo le malosi ina ia mafai ona e “savali, ae le tigaina” (tagai Isaia 40:31).
Tau Lava o le Fai
Afai e na o lou faapea lava, “Se, o le a ou faia pe a oo atu i ai,” O le a faaosooso oe e Satani ia aua ne’i e faia. Ia faaavanoa se taimi e fai ai nei gaoioiga faagaeetia faaleagaga, e tusa lava pe o lona uiga o le a le faia ai isi gaoioiga.
Allison R., 20 tausaga, Iuta, ISA
Faaavanoaina o le Taimi mo Mea e Taua
Afai e le mafai ona tatou faaavanoaina se taimi mo le talalelei, o lona uiga ua tele naua mea o loo tatou faia ma e tatau ona faaitiitia nisi mea. E tatau ona tatou fuafuaina ni gaoioiga e faatatau i le talalelei ma o tatou tiute. O lenei auala o le a tatou maua ai le taimi mo le talalelei ma mea e taua moni.
Noa H., 13 tausaga, Arisona, ISA
Suesue Muamua i Tusitusiga Paia
E muamua ona ou suesue i tusitusiga paia ona fai ai lea o meaaoga. A muamua ona e suesue i tusitusiga paia a o le’i faia au meaaoga, o le a sili atu ona e mataala, ma o le a tele atu faamatalaga e mau i [lou mafaufau]. I gaoioiga faalevaiaso, e tatau lava ona e tuuina muamua i ai na mea [suesuega o tusitusiga paia]—ona faaofiofi atu lea i ai o isi mea uma.
Elder Clark, 20 tausaga, Misiona a Chile Concepción i Saute
Fuafua Lou Taimi
E le’i faigofie le fuafuaina o lo’u taimi i le avea ai ma se tagata aoga. Ae na ou faia se faatulagaga o taimi e fuafua ai a’u gaoioiga faalevaiaso, lea e aofia ai vasega, faigalotu i le taeao a le matou falemoe, suesuega o tusitusiga paia faaletagata lava ia, vasega o le inisitituti, ma isi mea. Ou te faavasegaina i le faasologa o le taua. O le fuafuaina o a’u gaoioiga, na fesoasoani ou te faatoilaloina ai le fai mea tuu.
Tanielu A., 19 tausaga, Edo, Nigeria
Manatua ia Mea e Faavavau
Ou te taumafai e manatua upu a lo’u tina: e tatau ona tuu la tatou faamuamua i mea e faavavau, ia e tumau e faavavau (e le pei o mea faaletino, e na o sina taimi e umi ai). Ua ou iloaina, a ou faamuamua le Atua, e fetaui lelei lava isi mea uma e pei ona sa tatau ona i ai. Ou te mautinoa a tatou faia le galuega a le Atua, o le a fesoasoani le Atua e fai a tatou galuega.
Vaishali K., 18 tausaga, Andhra Pradesh, Initia
Galue ma le Poto
Ou te taunuu loa i le fale mai le aoga, ona fai lea o a’u meaaoga ina ia le tuai ma ia tele ai lo’u taimi mo gaoioiga a le Ekalesia. O se tasi foi o mea na fesoasoani mai, o le faia e lo’u tina o se fuafuaga faataatia e faatulaga ai le taimi mo mea taitasi o le a ou faia i aso uma. O lena mea sa faigofie ai ona ou auai i gaoioiga, fai meaaoga, ma faitau tusitusiga paia.
Rasela O., 13 tausaga, São Paulo, Pasila
Fatu se Fuafuaga Faataatia
O le taimi lava e te ala ai, e mafai ona faitau ai au tusitusiga paia, e tusa lava pe na o ni nai fuaiupu. O lona uiga, atonu e lima ni minute e te vave ala ai e faitau au tusitusiga paia. Mo suesuega faaleaiga, faatulaga se taimi faatasi ma lou aiga lea e mafai ona outou malolo uma ai mai mea o loo outou faia ae suesue faatasi. Ae mo gaoioiga a le autalavou, ua uma lava ona faatulaga le taimi, o lea, tau lava o lou alu e milo faatasi ma le autalavou o lau uarota.
Elena F., 15 tausaga, Idaho, ISA
Ia Faamuamua le Alii
O le aoao e faatulaga mea e tatau ona faamuamua, e fesoasoani e maua ai o tatou taimi mo mea uma e manaomia ona fai, ae maise lava mo mea e tau i le Alii. O se tasi o a’u faamuamua autu lava o le auai atu i le seminare i aso uma. Afai ou te auai i le seminare i le taeao ona ou alu ai lea i le aoga, e foliga mai e silia ma le 24 itula o le aso. Sa faigofie atu meaaoga, ma na oo foi ina avea le faitauina patino ma faaleaiga o tusitusiga paia o se mea fiafia. O le manatua e faamuamua le Alii i o tatou olaga, e fesoasoani tatou te iloa ai i si mea uma i se vaaiga fou, ma fesoasoani e faatulaga ai mea e tatau ona faamuamua ma ausia ai a tatou sini.
Bianca S., 19 tausaga, Paysandú, Iurukuei