Savali a Faiaoga Asiasi
O Le Togiola a Keriso, O Le Faamaoniga o le Alofa o le Atua
Ia suesue ma le agaga tatalo lenei savali ma saili mo musumusuga ia iloa mea e faasoa atu. E faapefea e le malamalama ai i le faamoemoega o le Aualofa ona saunia afafine o le Atua mo faamanuiaga o le ola e faavavau?
Faatuatua, Aiga, Toomaga
O le malamalama e faapea, na tuuina mai e le lo tatou Tama Faalelagi Lona Alo Pele e Toatasi ina ia mafai ona tatou maua le tino ola pea ma gafatia mo le ola e faavavau, e fesoasoani tatou te lagona ai le alofa e le iu ma le le mafaamatalaina o le Atua mo i tatou. E alofa foi lo tatou Faaola ia i tatou.
“O ai se na te faateaeseina mai i tatou i le alofa o Keriso? …
“Aua ua ou mautinoa, e le mafai e le oti, po o le ola, po o agelu, po o alii, po o e malolosi, po o mea i nei ona po, po o mea atali,
“Po o le maualuga, po o le loloto, po o se tasi mea na faia, e le mafaia e ia mea ona faateaeseina mai i tatou i le alofa o le Atua, o loo ia Keriso Iesu lo tatou Alii” (Roma 8:35, 38–39).
Na saunoa mai Elder D. Todd Christofferson o le Korama a Aposetolo e Toasefululua e uiga i le Togiola a Iesu Keriso e faapea: “O puapuaga o le Faaola i Ketesemane ma Ona tiga i le satauro ua togiola ai i tatou mai le agasala e ala i le faamalieina o manaoga o le faamasinotonu i o tatou luga. Na te tuuina mai le alofa mutimutivale ma faamagalo i latou o e salamo. Ua faamalieina foi e le Togiola a Iesu Keriso le aitalafu o nofoaitalafu ai le faamasinotonu ia i tatou e ala i le faamaloloina ma le tauia o i tatou mo soo se mafatiaga tatou te onosaia ma le taumamaina. ‘Aua faauta, e mafatia o ia i tiga o tagata uma, ioe, tiga o tagata ola uma, o tane, o fafine, ma tamaiti, o e ua i ai i le aiga o Atamu’ (2 Nifae 9:21; tagai foi Alema 7:11–12).”1
O Keriso “ua [na] taia [Lona] faatusa i o [tatou] alofilima” (Isaia 49:16). Na saunoa Linda K. Burton, Peresitene Aoao o le Aualofa, “O le faatinoga maualuga lava o le alofa e tatau ai ona tatou o ifo i o tatou tulivae i le tatalo ma le lotomaulalo e faafetai atu i lo tatou Tama Faalelagi i le tele o lona alofa mo i tatou na Ia auina mai ai Lona Alo Pele e Toatasi ma atoatoa, e puapuagatia mo a tatou agasala, o tatou lototiga, ma mea uma e foliga e le talafeagai i o tatou lava olaga taitoatasi.”2