O Tatou Aiga, O Tatou Auaiga
Pe o le A Ou Oti?
E alala le tusitala i Nevada, ISA.
Ou te le’i iloa pe aisea na faafuasei ona fefe ai lo’u atalii i mafaufauga e uiga i le oti, ae o loo i ai i upumoni o le talalelei le faamalosiauga sa ia manaomia.
Sa matuai vili malosi lo’u atalii e fitu tausaga le matua, ae sa leai lava se mea na alu i ai. Ua pau ese le filifili o lana uila. Sa ou alu atu e fesoasoani i lona tulaga faigata, ma faaui i luga le uila ina ia mafai ona ou oo atu i le filifili. A o o’u galue [i lana uila], sa ia faapea mai, “Tama? A ou oti, mata o le a ou lavatoto uma?”
Na fai si o’u te’i, ma na ou tilotilo a’e ia te ia. Sa maligi ona loimata.
“E a? Leai!” Na ou fai atu ai. “E te le oti.” Sa ou saofai i le pito o le auala, ae saofai o ia i o’u vae. Na tagi pea lava pea o ia. O fea na oso mai ai lenei mea?
“Mata o le a toulu mai i fafo o’u totoga?” na ia fesili mai ai.
Pe na matamata si o’u atalii i tifaga taufaafefe po o se a se mea? “Leai!” Na ou fai atu ai. Sa ou toe fai atu foi ia te ia o le a le oti.
“Leai, Tama. O le a feoti tagata uma, e sa’o a?”
Sa ou manava loloa. Sa le o se talanoaga lenei na ou faamoemoe e faia ma se atalii laitiiti faapenei.
Ina ua avea a’u ma se tama, sa ou tauto ia te a’u lava, o le a ou le taofia lava le upumoni mai la’u fanau, ae o le mafaufau e ta’u atu ia i latou e faapea, e i ai se aso o le a feoti ai, sa o se maluia taufaafefe. Sa ou taumafai e aloese ma lana fesili. “E le tatau ona e popole i lena mea i le taimi lenei,” sa ou fai atu ai. “Pau lava le mea ia avea oe ma se tamaitiiti fiafia ma fai ni mea malie ae aua le popole. O le a e ola mo se taimi umi, umi lava.”
“Ou te le fia oti,” na ia fai mai ai.
“O le a se mea ou te faia ii?” Sa ou fesili ifo ai ia te au lava. Sa taavilivili i lo’u ulu mafaufauga o le ta’u atu o se mea sese ma faavavau ai ona mafatia o ia. “O le a se mea ou te faia?” Sa ou faia se tatalo le leoa mo se fesoasoani.
Sa amata ona ou faamatala atu ia te ia e uiga i le ata o le faaolataga. Sa ou ta’u atu ia te ia, o i tatou uma lava o ni tagata asiasi mai i lenei lalolagi. Sa ou faamatala atu ia te ia, o i tatou taitoatasi ua faia i ni vaega se lua: o se tino ma se agaga. Sa ou fai atu ia te ia, a feoti tagata—ma, ioe, o i tatou uma, o le a i ai se aso tatou te feoti ai—ua na o o tatou tino faaletino e le toe mafai ona gaoioi. O o tatou agaga e faavavau ma o le a le oo i ai le oti (tagai Alema 40:11).
Sa ou fai atu ia te ia, o Iesu Keriso o lo tatou Faaola, aua o Ia ua mafai ai e i tatou uma ona faatasitasi, e ui o nisi taimi e tatau ai ona tatou valavala mo sina taimi. Sa ou aoao atu ia te ia, na maliu le Faaola mo i tatou ma ua toetu mai, ma talu ai o loo soifua o Ia, o le a i ai se aso e toe foi atu ai o tatou agaga i o tatou tino, ma o le a tatou le toe oti (tagai Alema 11:43–45).
Sa ia fesili mai pe na ou vaai i se tagata oti. Sa ou ta’u atu ia te ia, na mafai ona ou faatofa atu i matua o o’u matua i o latou falelauasiga. Sa ou ta’u atu ia te ia, e ui lava ua maliliu o latou tino, ae o loo ola pea o latou agaga, ma o nisi taimi e mafai ona tatou lagonaina ai lo latou faatasi mai.
Na toa mai le popole o lou atalii, ae na suia masusu i ana ata soo masani. O le manatu e uiga i le asiasi mai o tagata o aiga e ui e le mafai ona tatou vaaia i latou, na ataata ai.
Sa ma savavali faatasi atu i le fale, ma toso atu le uila na toe lipeaina i totonu o le faletaavale. Sa ou mafaufau e uiga i mea na ou ta’uina atu. Sa ou mafaufau i lo’u manao e ta’u atu upumoni i la’u fanau ma tali na ou tuuina atu i lo’u atalii.
O le taimi lena, na ou lagonaina ai le faafetai tele mo la’u molimau i le talalelei a Iesu Keriso. Ona ua uma ona ou iloa e moni le ata o le faaolataga, o lea na mafai ai ona ou talanoa atu ma le to’a ma le faamaoni i lo’u atalii, ma tuu atu ia te ia le malosiaga e faatoilalo ai ona popolega.
O a’u tapenaga mo lenei taimi na leva ona amataina a o le’i fanau mai lo’u atalii. A o o’u sauni mo se misiona, sa i ai sa’u sini ia maua sa’u molimau e uiga i vaega uma o le talalelei lea e ono manaomia ona ou aoaoina atu. O le vaega na sili ona faafaigata ia te a’u o le Toetutu o e ua oti.
Sa ou suesue, mafaufau loloto ma tatalo. Sa ou anapogi ma ole atu mo se molimau. Ina ua mavae se taimi, sa molimau mai le Agaga Paia ia te a’u, e moni le Toetutu, ma o loo i ai moni se olaga pe a mavae le oti, ma o folafolaga o le ata o le faaolataga e moni. (Tagai i le 1 Nifae 10:19.)
O lena molimau na oo ina taua i la’u misiona, ae na avea ma se tasi o a’u meaalofa aupito faapelepele ina ua manaomia e lo’u atalii ona maua le toafilemu.
Ou te faafetai lava mo lena molimau, ma ou te molimau atu e moni le ata o le faaolataga. Ou te molimau atu i le taua o le faamalolosia o a tatou molimau, lea a oo i le taimi tatou te lagona pe lagona ai e i latou e pele ia i tatou le mata’u, e mafai ona tatou maua le toafilemu i a tatou molimau ma le malamalama i le talalelei a Iesu Keriso.