Aoaoina e le Alii: Tulaga Faamatua Faitoatasi
Ou te le’i fuafuaina e avea ma se matua e toatasi o se fanau e toafa i le 20 ma ona tupu o o’u tausaga, ma sa oo ina ou tautevateva ai. Sa i ai so’u fale lelei e vaai, se fanau laiti e toafa, ma ou te lei aoga i se iunivesite. Sa ou mafaufau pe o le a faapefea ona ou maua ni tupe e tausi ai lo’u aiga laiti. Sa le’i oo mai a’u tali i ni aso po o ni masina ae i le aluga o le tele o tausaga o le usitaia o se uunaiga e tasi ona sosoo mai ai lea ma isi.
O le mea na lelei ai, sa i ai sa’u masani o le liliu atu i le Alii i taimi o faigata. O se tasi po, na manino lava le oo mai o le tali: “Alu i le aoga.” Sa ou mafaufau pe o le a faapefea ona mafai lenei mea faatasi ai ma a’u matafaioi tautupe na i ai, o lea na ou talanoa ai i o’u matua ma lo’u epikopo. Sa latou ioe mai o le alu i le aoga o le ala sa’o lea, ma i totonu o ni nai vaiaso, sa ou lesitala ai i se iunivesite i le lotoifale, lea na maua ai lo’u faailoga i aoaoga faatulagalua faapea ma se faamaoniga mo aoaoga faapitoa.
I le avea ai ma se faiaoga, sa le lava lava ni tupe na ou maua e taulima ai mea tautupe na manaomia e la’u fanau na faasolo ina matutua. Sa faaauau ona ou ole atu i le Alii e uiga i le le lava o tupe. I se ma feiloaiga ma lo’u epikopo, sa ia fautuaina ou toe foi i le aoga ia maua lo’u faailoga o le matuaofaiva. Sa ou alu i le fale ma tatalo e uiga i ai, ma toe lesitala ai i le aoga i le semesa na sosoo ai.
O ni tausaga mulimuli ane, sa uunaia ai a’u ou te toe alu i le aoga. Sa faatulaga aso atofaina mo suega na manaomia ona fai, faatalanoa mo polokalama i pulega faaleaoaoga, ma iu ina ou toe lesitala ai foi, i se polokalama mo le [faailoga] o le matuaofaiva i se isi iunivesite i le lotoifale. Ina ua faamaeaina, na matala mai ia te a’u ni avanoa faigaluega fou, na faapea ona faatamaoaigaina ai lou olaga i ni fegalegaleaiga fou, uunaia ai le tuputupu a’e patino, ma na fesoasoani ou te iloa ai ni taleni fou.
I le malumlau i se tasi o po, sa ou faasoa atu ai i le Alii lo’u le fiafia ona e ui lava i a’u taumafaiga, ae sa le a’ua’u lava la’u faasoa i le tele o taimi. Sa ou lagona le mafanafana o le talanoa mai o le lagi e faamanatu mai ia te a’u, o manaoga uma o lo’u aiga ua taulimaina, e le gata ina ala mai i a’u lava galuega pe na ala mai foi i le agaalofa o isi, ma afai lava e tumau ona ou usiusitai, o le a tausia lava i matou. Ma e pei ona faamanatu mai ia te a’u e le Alema 20:4, “Ua ou iloa, e mafai ona [ou] faia o mea uma i le malosi o le Alii.”
Ou te matuai faafetai lava i le Tama Faalelagi mo le uunaiga ina ia faauma la’u aoga ma avanoa faalegaluega na sosoo mai ai. Ou te faafetai foi mo i latou uma i lo’u olaga o e na ese lo latou magafagafa i le gasologa o tausaga. Ua ou aoaoina, faatasi ai ma le fesoasoani a lo’u Tama Faalelagi, e tele atu mea e mafai ona ou faia nai lo mea na ou manatu e mafai. Ma le isi mea e tutusa foi le taua, ua ou aoao ai ia talia ma le agaga faafetai ma foai atu ma le matamau.