2017
Galue i Vaivaiga, Faaali Atu le Faatuatua
February 2017


Galue i Vaivaiga, Faaali Atu le Faatuatua

E alala le tusitala i Iuta, ISA.

Na tatau ona ou iloa le ala e faalagolago ai i le Faaola ia faatoilalo ai o’u vaivaiga ma atiina ae o’u malosiaga a o o’u sauni mo se misiona ma a o o’u auauna atu.

Ata
E. Tracy Williams

E fitu tausaga na ou [galue] ai ia ou agavaa e auauna atu i se misiona. O le taimi muamua na ou talanoa atu ai i lo’u epikopo, o Epikopo Tapueluelu, e uiga i le misiona, sa ia tuuina mai ia te au nisi o taiala e tatau ona ou ola ai. Sa ia saunoa mai, afai ou te mulimuli ai ma aoao ia ou usiusitai, o le a faamanuiaina a’u. O nai taiala muamua lava—o le suesue o tusitusiga paia i aso uma ma le auai i le lotu i vaiaso taitasi—sa faigofie lava ona fai. Sa ou manatu “E faigofie lava.” Ae sa ou le fiafia ina ua fai mai e tatau ona suia nisi o mea “faaletino” i lo’u olaga, ma o lo’u faamaualuga ma le ulumalo na taofia a’u mai le faia o ia suiga.

O le faamoemoe ai mo se auala faigofie e sao ai mai nei fautuaga, na ou feosofai ai i ni uarota eseese se fa ma talanoa i ni epikopo eseese se fa. Sa faapea foi ona ou toe alu i le aoga e tulitulimatagauina ai se faailoga faafomai. Ona uunaia lea o a’u e tuu mea uma ae toe sauni e auauna atu i se misiona. O lea sa ou faia ai. Sa ou toe foi atu ia Epikopo Tapueluelu ma talosaga atu ma le faamaualalo mo lana fesoasoani. Sa faamatala mai ia te a’u, ua i ai se mamafa faatulagaina mo faifeautalai—ma na ou iloa ai na ova ma le tulaga faatapulaaina lo’u mamafa. O le taimi lava lena, na tumu ai lo’u mafaufau i lagona o le lotovaivai ma le matamuli, ae peitai sa faamalosiau mai lo’u epikopo. Sa ia faaali mai lona alofa ma lona faatuatua ia te a’u ma saunoa mai, “E matala lava lo’u faitotoa i taimi uma. E mafai ona ta galulue faatasi i ai! Tasi le vaivaiga, tasi le vaiaso i le taimi.”

O lea na ou asiasi ai i lo’u epikopo i vaiaso uma lava, ma galulue e tasi le vaivaiga i le taimi. Sa leai so’u manatu o le a ou faatalitali mo le isi fa tausaga, i le na o le taumafai ia agavaa e auauna atu i se misiona.

Faalagolago i le Faaola.

I le aluga o na tausaga, sa ou taumafai ai e faalatalata atili atu ia Keriso ma faaaoga Ana aoaoga i lo’u olaga. A’o oo mai luitau, sa faapea ona moni Lana Togiola ia te a’u. Sa ou faalagolago i le mana, mafanafana, ma le malosi sa Ia tuuina mai ia te a’u e ala i Lana Togiola, ina ua maliu la’u uo lelei lava, ina ua aveese le fale o le matou aiga, ma ina ua ou aafia i se faalavelave tau taavale. Ina ua i ai ni tulaga na ala ai ona leiloloa le toatele o a’u uo, sa faapea ona ou oo i le leai o se faamoemoe, peitai o le Faaola na tosoina mai a’u i luga. O a’u po o aso Faraile ma a’u uo na suia i le koleni i le faletaalo ma le suesue i le Togiola a Iesu Keriso.

Sa ou tatalo i po uma mo tagata o e o le a ou auauna atu i ai i se aso ma mo a’u soa i le lumanai!

Sa iu ina ou agavaa ma valaauina e auauna atu i le Misiona a Niu Sila Aukilani, e faaaoga ai le gagana Toga.

Tusiga Ata i le Alatele ma le Agaga

Ina ua ou ulufale i le nofoaga autu e aoao ai faifeautalai, sa ou iloa ai sa tele atu ni mea e aoao e uiga ia Iesu Keriso ma Lana Togiola ma a’u lava. E ui lava ina o a’u o se tagata Toga, ae ou te le’i oo lava i atumotu o le Pasefika i Saute, ma sa ou tauivi ma le gagana Toga. Ina ua ou taunuu atu i Niu Sila, sa matuai ou le iloa lava po o a tala a tagata na fai mai ia te a’u i le faaToga. Sa tele ni tala na ou fia fai atu ai, ae ona sa le mafai ona ou tautala i le gagana, o lea sa laiti, faigofie ma le sa’osa’o ai a’u tala Sa luelue lo’u ulu pe a fesili mai tagata ia te a’u. Sa talie mai ia te a’u, ma sa matou talie faatasi, ae a na o a’u, ona liua lea o toega i loimata o le le fiafia ma le lotovaivai. Sa ou faapea ifo ia te a’u lava, “E fitu tausaga na ou galue ai ina ia ou sau iinei mo le mea lenei?”

O lea na ou tatalo ai i le Tama Faalelagi. I le Eteru 12:27 ua tatou aoao ai e mafai ona avea o tatou vaivaiga ma malosiaga pe afai tatou te faalagolago ia te Ia. Sa ou ta’u atu ia te Ia e uiga i o’u vaivaiga, ma lou faalagolago atu ia te Ia, ma sa ou toe taumafai … pea lava pea … mo le tele o taimi. Sa amata ona ou faalagolago atili atu pea ia Keriso faapea foi ma o’u malosiaga.

Ou te fiafia i lenei talalelei ma ou te fiafia foi i le tusiata i le alatele, o lea na ou filifili ai e tuufaatasi le lua lea. Sa ou tuuina i totonu o la’u atofaafafa ia a’u tusitusiga paia, o se api mo atatosi, o penitala malala, o peni matamea, ma apa vali faapasi. Sa talie au soa ma fesili mai, “O a au mea e fai i apa vali faapasi?” Sa ou fai atu i ai, “Atonu e le’i mafai ona ou tautala i le gagana, ae e mafai ona ou faaali atu i isi la’u molimau.”

Mo le taimi na totoe o la’u misiona, sa ou faaaogaina ai le tusiata i le alatele—i luga o pepa, ae le o fale—faapea ma le Agaga e aoao ai isi e uiga ia Keriso. Atonu o se mea faavalevalea i la outou faalogo, ae na aoga. E toatele tagata sa le’i fia faalogo i la’u savali, o lea na ou tusia ai o se atatosi. Sa matala faitotoa ma loto o tagata ina ua ou ta’u atu ia i latou sa ou faia le tusiata i nofoaga faitele. Latou te le’i talitonu ia te a’u. Sa latou setiina le taimi i le tolu minute, a o ou tositosia le upu faatuatua a o o’u aoaoina i latou e uiga i ai. Sa i ai ia i latou le toatele o e na lagona le faamasinoina ma le le alofaina. E mafai ona ou molimau atu, o le faatuatua ia Keriso e mafai ona tatou lagona ai Lona alofa ma le faamagaloga, ma e mafai ona fesoasoani mai o Ia ia i tatou ia suia mo le lelei sili atu. Sa Ia faia mo a’u.

O le fitu tausaga o tapenaga mo la’u misiona na fesoasoani ou te iloa ai a’u lava. O lena taimi na mafai ai ona ou maua se molimau i le Togiola a Keriso ma Lona mana, e fesoasoani ou te faatoilalo ai o’u vaivaiga ma faaaoga o’u malosiaga e faasoa atu ai i isi le mea na ou iloa. I le faaiuga sa aoga lava le fitu tausaga.