O Auala e Tolu Ia Aafia Ai i Talafaasolopito o Aiga
A e mauaina le tala o lou aiga, o le faagasologa e faapea ona e aoao ai e uiga ia te oe lava.
Ina ua saunoa Elder David A. Bednar o le Korama a Aposetolo e Toasefululua e faapea, “Na aoaoina o outou tamatamailima e tesi ma valo [tweet] e faatelevave ma faaalualu ai i luma le galuega a le Alii—ae le na’o le vave fesootai ai ma a outou uo,” na talanoa mai o ia e uiga ia te oe! Ona ia faapea mai lea, “Ou te faamalosiau atu ia te outou ia suesue, ia sailia o outou augatama, ma ia sauniuni outou lava e faia papatisoga sui i le maota o le Alii mo o outou aiga ua maliliu” (“O Le a Liliu Atu Loto o Fanau,” Liahona, Nov. 2011, 27).
E faitau afe alii ma tamaitai talavou i le lalolagi atoa ua taliaina lenei valaaulia e saili o latou augatama ma faataunuu sui papatisoga mo i latou. Na iloa e se tasi o tamaitai talavou o Kaitlen D., e faapea, a ona aveina atu igoa o [ona] aiga i le malumalu, e faapea ona avea o se aafiaga e sili atu ona anoa.
Fai mai a ia, “Ina ua amata ona ou faia sauniga o le malumalu mo lo’u aiga, na faapea ona ou iloa ai, i le ogatotonu o le lalolagi fenumiai o loo o’u ola ai, na pau lava le taimi na mafai ona ou toafimalie ma to’a ai, o totonu o puipui o lena nofoaga paia. Na amata foi ona ou lagona le latalata atili atu ia i latou o loo i le isi itu o le veli. Ina ua ou faia papatisoga ma faamauga, na amata ona ou mafaufau i na tagata uma o e na umi se taimi o faatalitali ina ia tupu lenei mea. O se lagona na toetoe lava a le mafaamatalaina—tumu i le alofa ma le faamoemoe—ua faapea ona matuai faatupulaia ai la’u molimau.”
E tele auala eseese e mafai ona e aafia ai i talafaasolopito o aiga ma galuega o le malumalu, o fea la e te amata atu ai? Ua faasoa mai e ni tagata talavou se toatolu o latou aafiaga o le aoao e uiga i tala o aiga, faatalanoaina o tagata o aiga, ma le sailia o igoa o aiga e ave atu i le malumalu.
O O’u Augatama o Ni Faataitaiga Lelei ia te A’u
Saunia e Kyle S., Texas, ISA
Sa matou faalogologo ma o’u matua ia Elder Bednar i le konafesi aoao ia Oketopa 2011, lea na ia fai mai ai, o le galulue i talafaasolopito o aiga e aumaia ai le puipuiga mo i tatou e faasaga i le fili. O le taimi lena na amata ai ona matou galulue i talafaasolopito o le matou aiga. E faaauau pea ona ou aoao ma tuputupu a’e mai [le faia o] talafaasolopito o aiga; e ese le manaia.
Ou te fiafia e sailiili e uiga i le mea ou te sau ai, ma e uiga i o’u augatama. Ou te aoao mai i o latou aafiaga ma faaaoga i lo’u olaga, e fesoasoani e avea ai a’u ma se tagata e sili atu. O se mea e maofa ai le iloa o ai i latou, o a mea na latou faia e tausi ai i latou, pe na faapei le olaga sa i ai, ma po o le a le faigata sa i ai le olaga mo i latou.
Mo se faataitaiga, sa ou fiafia e aoao e uiga i se tasi o o’u augatama o le na siitia mai ma lona aiga mai Tennessee agai i Texas, ISA, i le vaitaimi o le 1870 e avea ai ma se fai lafu manupapalagi. Sa fetaiai o ia ma le tele o luitau i lona olaga, ma mai ia te ia na ou aoao ai, o le olaga e mafai ona faigata, o lea e taua ai le tu atu mo le mea ua e talitonu i ai.
Pe a i ai ni luitau i lo’u olaga, o le galue ai i le talafaasolopito o aiga ou te lagonaina ai le pei lava e faatasi mai i taimi uma o’u augatama ma o le a fesoasoani mai i o’u tofotofoga faigata, e pei lava ona sa folafola mai e Elder Bednar ia i tatou.
Ata pue o le fai lafumanu ma le maa o le tuugamau © iStock/Thinkstock
Auala e Maua Ai Tala o Lou Aiga
Ao mai tala o mea sa fiafia ou tuaa e fai. Fesoasoani e fai e pei o loo soifua mai ou augatama ma su’e ni mea tou te tutusa ai. O a ni taaloga sa latou taaalo ai? O a meaai na latou taumamafa ai? Na faapei a latou aoga?
Talanoa i ou matua ma matua matutua e uiga i tala mai o latou soifuaga. E mafai ona e faaaogaina le tamaitusi a le Ekalesia o le O Lo’u Aiga e amata ai ona ao mai ma faasoa atu tala [o lou] aiga. I luga o le FamilySearch.org, e mafai ona e tuua i ai ata, tala, puna o faamatalaga, puega o tautalaga, ma pepa o faamaumauga e fesoasoani ai i isi o lou aiga ia iloa ou augatama. Asiasi i le FamilySearch.org ma kiliki i le “Memories” e te amata ai.
Pueina o Tala a Matua o O’ u Matua
Saunia e Matias M., Iuta, ISA
E nonofo o’u matua i Iurukuei. Ina ua asiasi mai matua o lo’u tina i lo’u aiga, sa ou faaaogaina le avanoa e faatalatalanoa ai i laua ma iloa ai le la tala o le auala na avea ai i laua ma tagata o le Ekalesia. Ou te le’i faalogo muamua i le la tala, o lea, o le faalogologo i le tala mai o’u matua matutua, sa o se aafiaga matagofie tele.
Sa ou tusitusia ni faamatalaga pupuu a o faatalatalanoa i laua, ma na ou pueina foi e faaaoga ai la’u telefoni ina ia mafai ona ou faalogologo i ai pe a ou toe fia faalogo i ai. Sa ou sii atu lena faila o le leo i le FamilySearch ina ia mafai ona aoga i isi pe a faalogo i le la tala, i le taimi nei ma i le lumanai.
O ni nai masina mulimuli ane, sa mafai ona ou pueina ma sii atu se faatalatalanoaga o matua o lo’u tama. E tele ni mea na ou aoaoina ai ia sa ou le iloaina muamua, ma na laua faamatala mai ia te a’u nisi mea se tele e uiga i o laua soifuaga nai lo o mea na ou manatu i ai.
Sa maoae tele le faalogo atu i o’u lava matua matutua o faamatala mai a latou tala ma faalogologo atu i nisi o fautuaga na latou tuuina mai mo a’u. Ou te iloa o le faaaluina na o ni nai minute e fai ai nei faatalatalanoaga o le a fesoasoani ia te a’u “e faatauanau atu ai [i a’u] fanau … ia talitonu ia Keriso” (2 Nifae 25:23) e pei ona sa faia e le perofeta o Nifae mo lana fanau. Ou te iloa a faalogo la’u fanau i molimau a matua o o’u matua, o le a faapea ona faamalolosia ai foi a latou molimau.
Auala e Faatalatalanoa ai Tagata o Aiga
Mo se gaoioiga a se uarota po o se paranesi, e mafai e oe ma isi talavou ona faatalatalanoa ni tagata matutua atu o le aiga. Mafaufau i se fesili se tasi pe lua e te manao e fesili atu i ou matua po o matua matutua po o isi tagata o lou aiga. Ona outou nonofo lea i lalo, fai atu i ai se fesili e uiga i o latou olaga, ma pue se vitio pe pue foi i lau telefoni. A uma loa, ona e tago lea e sii atu i le vaega o mea e manatua o le FamilySearch.org.
O La’u Sini: Ia Ave ni Igoa se 10 o Lo’u Aiga i le Malumalu
Saunia e Rajane S., Jamaica
Sa ou tosina ma fiafia lava i galuega tau gafa, o lea la, ina ua tuuina mai e le Au Peresitene o le matou eria i le autalavou le sini o le aoina mai o igoa o ni augatama se 10 e fai o latou papatisoga ma faamauga i le malumalu, sa matuai tumu a’u i le fiafia.
Sa ou amataina la’u suesuega e aunoa ma se fesoasoani, peitai na le’i i ai se mea na ou ausia. Sa i ai ni a’u igoa se tolu na leai ma ni o latou faamatalaga, ma o le taimi lena, na ou lagona ai le pa’ulia i le faaleagaga ma le faaletino. Na ou filifili e fesili atu i lo’u tina mo se fesoasoani. Sa ia fautuaina a’u e valaau atu i lona tina. Ina ua ou valaau atu i lo’u tinamatua, sa matuai fiafia o ia e fesoasoani mai. Sa ia tuuina mai foi ia te a’u le faatagaga e fai ai ma sui o igoa na ma talanoa e uiga i ai. Sa matuai o’u fiafia lava ma le faafetai.
Na lata mai le aso o le malaga i le malumalu, ae na leai ni a’u igoa mai le itu o lo’u tama. Na toe o ni nai itula o’u tuua le fale, ae uunaia a’u ou te alu i le fanuamaliu ma fai atu i lo’u tama e valaau i le olomatua o lona aiga e sau. Sa matou o atu i le fanuamaliu, ma a o o’u vaavaai atu i lo’u tama ma le olomatua o lona aiga o savavali solo i le fanuamaliu, na ou lagonaina le taitaiina atu o a’u i nisi o maa o tuugamau o o’u augatama. Sa ou lagonaina lo latou naunau ia avea ma se vaega o le talalelei. Faatasi ai ma le fesoasoani mai le Agaga Paia ma mai tagata o lo’u aiga, na ou ausia ai la’u sini. Na i ai ni igoa se 16 o o’u augatama na saunia mo le malumalu.
Ina ua ou alu atu i le malumalu, na mafai ona ou lagona le naunautai ma le fiafia o o’u augatama o e na saunia ma faatalitali mai. I le taimi o papatisoga ma faamauga, na ou lagonaina le faatumulia o o latou loto i le olioli ma le filemu. Sa matagofie o’u faalogona, ma na pau le mea na ou manao e fai, o le faafetai atu ia i latou mo le tuuina mai ia te a’u o le avanoa e avea ai ma se vaega o se mea faapitoa tele.
Ata pue o le fai lafumanu ma le maa o le tuugamau © iStock/Thinkstock
Auala e Maua ai Igoa o Lou Aiga mo le Malumalu
Faataitai le vaaiga i le Descendancy i le FamilySearch.org e fesoasoani e te suea ai augatama o e ua tatau ona fai o latou sauniga o le malumalu. Ona talia lea o le lu’i a le autalavou mo le malumalu: tagai i le itulau e 54 o le lomiga lenei.