Та ичимхий байсан ч

Хосе А.Тэхэйра

Далын ахлагч

Ахлагч Хосе А.Тэхэйра

Их Эзэнд найд. Сайн мэдээг хуваалцах хичээл зүтгэл бүрд тань Тэрээр та нарыг адислах болно.

shy missionary

Би Бразилд номлолын шинэ ерөнхийлөгч байхдаа хэдэн ахлагчтай ярилцлага хийсэн юм. Би нэгнээс нь өөрийнхөө талаар ярихыг хүсэв.

“Би их ичимхий” гэж тэр хэлсэн юм. Бүрэг ичимхий зан нь үйлчлэлд нь саад болж магадгүй хэмээн түүний санаа зовж байв.

“Би түүнээс Их Эзэн чамайг сайн номлогч байхад тусалж чадна гэж чи бодож байна уу? гэж асуув.

“Би Их Эзэн бүхнийг хийж чадна гэдэгт итгэдэг.”

“Өөртөө туслах боломжийг Түүнд олго. Чи үүнийг хийж чадах уу?” гэж би асуув.

“Чадна” гэж тэр хэлэв.

Түүнийг гарч явах үед “за даа, бүтнэ гэж л найдъя даа” хэмээн бодсоноо нуух юун.

Хэдэн долоо хоног өнгөрсний дараа удалгүй нөгөө номлогчид дахин ярилцлагад орохоор ирэв. Энэ удаа нөгөө ичимхий ахлагчийн хамтрагч “Ерөнхийлөгч өө, би таныг түүнд юу гэж хэлснийг мэдэхгүй ч энэ нь түүнд үнэхээр тусалсан шүү. Тэр хүмүүстэй ярихдаа их сайн болсон” гэж хэлэв. Би үүнийг сонсоод, түүнтэй дахин уулзахыг тэсэн ядан хүлээж байлаа.

Тэр миний өрөөнд орж ирээд доош харан зогссоноо,

“Надад сайхан мэдээ байгаа” гэж хэлэв. Тэрээр “Би ичимхий хэвээр байгаа ч надад туслахыг Их Эзэнээс гуйсан. Тэгээд би амаа нээж, ярьж эхэлсэн. Тэгээд яасныг та мэднэ шүү дээ? Би одоо цаг үргэлж ярьж байгаа. Би бүр юу хэлэхээ ч санадаггүй. Гайхалтай нь хүмүүст тэр нь их таалагддаг. Тэд Сүнсийг мэдэрдэг. Тэд намайг болон миний тэдэнд хэлэх гэж байгаа зүйлсийг ойлгодог” гэж билээ.

Энэ номлогч Их Эзэнд итгэж найдсанаар хэрхэн өөрчлөгдсөнийг нь хараад би гайхаж билээ. Тэр олон хүнд аз жаргал авчрах агуу зэмсэг болсон байв.

Айдсаа ялан дийлэх нь

Бид сайн мэдээг хуваалцахдаа заримдаа их сандардаг. Гэвч энэ ичимхий номлогчийн жишээгээр, хэрэв бид Түүнд итгэвэл Их Эзэн биднийг удирдах болно. Ариун Сүнс бидэнд юу хэлэхээ мэдэхэд маань туслах болно (2 Нифай 32:2–3-ыг үзнэ үү), хүмүүс Сүнсийг мэдэрсэн үедээ илүү эерэг ханддаг. Олон хүн бидний итгэдэг зүйлсийг сонирхдог бөгөөд илүү ихийг мэдэхийг хүсдэг.

Агуу баяр хөөр

Тэнгэрлэг Эцэг сайн мэдээг хуваалцах хичээл зүтгэлд маань биднийг удирдаж, бид үүнээс агуу баяр хөөрийг мэдрэх болно гэдгийг би гэрчилж байна. Чухамдаа тэрхүү баяр хөөр нь энэ амьдралд төдийгүй ирэх дэлхийд бидэнд байх болно. (С ба Г 18:16-г үзнэ үү.) Энэ нь та ичимхий байсан ч өөрийн дасаж сурсан орчноос гарч, өөр зүйл хийх сайн учир шалтгаан юм.

Таны ялан дийлж чадах гурван төрлийн айдас

Бүрэг ичимхий зангаас гадна, “би сайн мэдээний талаар яривал найзуудаа алдана гэдгээс айж байна” гэж та нарыг хэлэхэд хүргэдэг өөр гурван айдсыг би мэднэ. Аз болоход бид тэдгээр айдсыг итгэлтэйгээр ялан дийлж чадна.

1. Би хангалттай сайн мэдэхгүй.

   Хэрэв та сайн мэдээний тухай мэдлэг муутай бол бүрэн цагийн номлогчид танд тусалж чадна. Тэд Сэргээлтийн тухай захиасыг заахад болон Их Эзэн Есүс Христэд итгэх итгэлээ хүчирхэгжүүлэхэд тусалж мөн наманчлалыг ойлгоход болон үүнийг амьдралдаа хэрхэн хэрэгжүүлэх ёстойг мөн баптисм ба Ариун Сүнсний бэлэг нь яагаад чухал болохыг ойлгоход бидэнд тусалж чадна. Мэдлэгийн өөр нэг агуу эх үүсвэр нь Миний сайн мэдээг номло удирдамж юм. Би залуу эрэгтэй, эмэгтэй бүрийг энэ номыг олж авч, үүнийг өдөр тутам судрынхаа хамт судлахыг зөвлөж байна.

2. Би өмнө нь хэзээ ч ийм зүйл хийж байгаагүй.

   Хэрвээ танд туршлага дутаж байвал номлогчидтой дадлага хийгээд үз! Тэд тодорхой нөхцөлд юу хэлэх эсвэл хэлэхгүй байхаа мэдэхэд тань тусалж чадна. Та номлогчидтой хамт цагийг өнгөрүүлэхдээ, тэднийг сайн мэдээнд болон бусдад хайртай болохыг мэдрэх болно. Тэд сайн мэдээг хуваалцах зоригийг олсон тул таныг ч бас зоригтой болоход тусална.

3. Би хуваалцахаас айж байна.

   Бид гэрчлэлээ хуваалцахдаа найз нөхдөө илүү өндөрт байгаа зүйлсийг олж харахад тусалдаг бөгөөд тэд биднийг арай өөрөөр хүндэтгэн хайрлаж эхэлдэг. Ийм зүйл байнга тохиолддог юм. Олон залуу хүн “Би айж байсан ч чин сэтгэлээсээ ярихад найз маань надад итгэж, илүү их зүйл асууж эхэлдэг” гэж хэлдэг. Бид байгаа зүйлсээ хуваалцахаас айх ёсгүй. Энэ нь Бурханаас ирдэг тул эрхэм нандин юм. Бид найз нөхдөдөө хайраа үзүүлэхдээ үнэн гэдгийг нь мэддэг зүйлээ хуваалцахаас өөр сайн арга зам байдаг гэж үү?