Ko ha Foʻi Lole ʻe Taha
ʻOku nofo e tokotaha ʻokú ne fai e talanoá ʻi ʻIutā, USA.
Naʻe faingofua hono vahevahe e lolé, kae fēfē hono vahevahe e ongoongoleleí?
“ʻOku ou Fie Hoko Leva ko ha Faifekau,” (Tohi Hiva ʻa e Fānaú, 90).
“ʻOkú ke fie kai lole?” Naʻe puke hake ʻe Hōsē ha foʻi lole lanu melomelo ki hono kaungāmeʻa ko Peteloó ʻi heʻena foki fakataha atu ki ʻapi he pasí mei he akó.
Naʻe pehē ange ʻe Petelō, “ʻIo.” Naʻá ne kakapa atu ʻo toʻo mai e foʻi lolé ʻo ne kai.
Naʻe toʻo hake ʻe Hōsē ha foʻi lole engeenga mei he kiʻi kato siʻisiʻí. Naʻe fakalongolongo ʻa e tamaiki tangatá lolotonga e lele ʻa e pasí. Naʻe lahi ʻaupito honau koló ʻi ʻĀsenitina. Naʻa nau heka pasi lōloa he ʻaho takitaha ke ʻalu ki he akó. Naʻe ʻoange maʻu pē ʻe he fineʻeiki ʻa Hōseé ha paʻanga kiate ia ke fakatau ʻaki ha kiʻi kato lole ke hanganoa ai.
“Te ke toe fie maʻu?” Naʻe toʻo hake ʻe Hōsē ha falukunga lole lanu melomelo.
“ʻIo, mālō!” Naʻe pehē ange ʻe Petelō. “Ko e hā ʻoku ʻikai te ke saiʻia ai ʻi aí? ʻOku ifo ʻaupito.”
Naʻe kiʻi longo ʻa Hōsē ʻi ha kiʻi momeniti siʻi ke fakakaukau peá ne ʻemo hono loungutú. “ʻOku ou tui pē ko e ʻuhingá ko ʻene ngaohi mei he kofí.”
“Ko e hā ʻoku ʻikai te ke saiʻia ai he kofí? ʻOku ifo ʻaupito ia.”
“Ko e meʻá he ʻoku ou Māmonga, pea ʻoku ʻikai ke mau inu kofi, pea mahalo ʻoku ʻikai ke u anga ki hono ifó.”
Naʻe mataʻi puputuʻu ʻa Petelō. “Ko e hā e Māmonga? Pea ko e hā ʻoku ʻikai ke mou inu kofi aí?”
“Ko e Māmongá ko ha taha ia ʻoku kau ki he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. ʻOku mau tui ʻoku finangalo ʻa e ʻOtuá ke tau tokangaʻi hotau sinó, ko ia ai ʻoku ʻikai ke mau inu kofi, tī, pe kava mālohi. Pea ʻoku ʻikai ke mau ifi.”
Naʻe pehē ange ʻe Petelō, “Ka ko e kiʻi foʻi lole pē eni ia.” “ʻOku ʻikai ko ha kofi moʻoni ia.”
Naʻe pehē ange ʻe Hōsē, “ʻOku ou ʻilo.” “Ka ʻoku ʻikai te u fie kai ia.”
Naʻe kamokamo pē ʻa Petelō. “ʻE lava ke ke ʻomai kotoa ʻe koe e ngaahi foʻi lole melomeló maʻaku. Ko e hā mo ha toe meʻa ʻoku akoʻi atu ʻe homou Siasí?”
“ʻOku mau ʻalu ki he lotú he Sāpate kotoa mo ako fekauʻaki mo Sīsū mo e Tamai Hēvaní. ʻOku mau ako foki ai ha ngaahi hiva fakamānako. Ko hono moʻoní, ʻe hiva mo lea kotoa ʻa e kau leká ʻi heʻemau Lotú he Sāpate ko ʻení. Fēfē kapau te ke kole ki hoʻo fineʻeikí ke ta ʻalu mo au ki he lotú? Te ke lava foki ʻo feʻiloaki ai mo e ongo faifekaú.”
Naʻe pehē ʻe Petelō, “SAI IA.” “ʻʻOku toe ʻi ai nai haʻanau lole kofi ʻoku nau loto ke liʻaki?”
Naʻe kata ʻa Hōsē. “ʻIkai, ka ʻoku ʻi ai ha meʻa lelei ange ʻoku nau maʻu ke vahevahe mo koe!”