Ngaahi ʻUlungaanga Faka-ʻOtua ʻo Sīsū Kalaisí—Manavaʻofa mo Angaʻofa

Ako ʻi he faʻa lotu ʻa e fakamatala ko ʻení pea feinga ke ʻiloʻi ʻa e meʻa ke vahevahé. ʻE hanga fēfē ʻe he mahino kiate koe ʻa e ngaahi ʻulungaanga ʻo Sīsū Kalaisí ʻo fakatupulaki hoʻo tui kiate Iá mo tāpuekina ai ʻa kinautolu ʻokú ke tokangaʻi ʻi he faiako ʻaʻahí? Koeʻuhí ke maʻu ha fakamatala lahi ange, ʻalu ki he reliefsociety.lds.org.

ʻĪmisi

The daughter of Jairus in dressed in white and sitting up in bed. She is being held by her mother and her father holds her hand.

ʻŌfefine ʻo Sailosí, fai ʻe Wilson Ong

ʻI he folofolá, ʻoku ʻuhinga ʻa e manavaʻofá ki he ‘kaungā-mamahi.’ ‘Oku toe uhinga foki ia ke fakahā ha fie kaungāmamahi, ‘ofa, mo e ‘aloʻofa (meesi) ki ha taha.”¹

Naʻe pehē ʻe Palesiteni Tōmasi S. Monisoni, “Kuo ʻomi ʻe Sīsū kiate kitautolu ha ngaahi sīpinga lahi ʻo e manavaʻofá. ʻOku fakafofongaʻi takitaha ʻe he tangata mamatea ʻi he vai ʻi Petesetá; ʻa e fefine feʻauakí; ʻa e fefine ʻi he vai ʻo Sēkopé; ʻa e ʻōfefine ʻo Sailosí, tuongaʻane ʻo Mele mo Māʻatá—ʻa e ngaahi faingataʻa ʻi he hala ki Selikoó. Naʻa nau fie maʻu tokoni kotoa.

“Naʻe tala ʻe Sīsū ki he tangata mamatea ʻi Petesetá, ‘Tuʻu hake, pea toʻo ho mohengá, ʻo ʻalu.’ Naʻá ne ekinaki ki he fefine angahalá, ‘ʻAlu, pea ʻoua ʻe toe fai angahala.’ Naʻá Ne hanga ʻo foaki ki he fefine naʻe haʻu ke ʻutu vaí, ha vai ʻoku ‘mapunopuna hake ki he moʻui taʻengatá.’ Naʻá Ne fekau ki he ʻōfefine ʻo Sailosi naʻe maté, ‘Taʻahine, ʻoku ou pehē kiate koe, tuʻu hake.’ Kia Lasalosi naʻe ʻosi ʻi he faʻitoká, ‘Tuʻu mai.’

“Naʻe fakahaaʻi maʻu pē ʻe he Fakamoʻuí ʻEne manavaʻofa taʻefakangatangatá. … Tau fakaʻatā muʻa hotau lotó ke Ne lava—ʻa e ngaahi sīpinga moʻoni ʻo e manavaʻofá—ʻo hū mai ki ai.”²

Ngaahi Potufolofola Kehé

Saame 145:8; Sākalaia 7:9; 1 Pita 3:8; Mōsaia 15:1, 9; 3 Nīfai 17:5–7

Mei he Folofolá

Naʻe pehē ʻe Linitā S. Liivi, ko e tokoni ua ʻi he kau palesitenisī lahi ʻo e Fineʻofá, “Ne u tūʻulutui mo hoku husepānití ʻi he tafaʻaki ʻo ʻema taʻahine taʻu 17 ʻo kole ke fakamoʻui ia. “Ko e tali he taimi ko ʻení ko e ʻikai, ka . … naá ma ʻiloʻi … ʻoku … ʻofeina kitautolu [ʻe he ʻEikí] ʻi hotau ngaahi loto mamahí.”³

“Ko e taha e ngaahi talanoa ʻoku ou manako taha ai he moʻui ʻa e Fakamoʻuí, ko e talanoa ko ia ʻo Lasalosí. ʻOku talamai ʻe he folofolá naʻe ‘ʻofa ʻa Sīsū kia Maʻata, … mo hono tehiná [ko Mele], pea [mo hona tuongaʻane] ko Lasalosí.’”⁴ ʻI he taimi naʻe puke ai ʻa Lasalosí, naʻe ʻomi ha fekau kia Sīsū, ka ʻi Heʻene aʻu atú, kuo ʻosi mālōlō ʻa Lasalosi ia. Naʻe lele ʻa Mele kia Sīsū, ʻo fakatōmapeʻe ʻi Hono vaʻé, mo ne tangi. ʻI he mamata ʻa Sīsū ki he tangi ʻa Melé, … “naʻá ne toʻe ia ʻi he laumālié, peá ne … tangi” (Sione 11:33, 35).

“Ko e fekau ia kiate kitautolú. Kuo pau ke tau ala mo mamata tonu pea tokoniʻi leva e fānau kotoa ʻa e Tamai Hēvaní ke nau ala mo mamata pea ʻiloʻi ʻoku ʻikai ngata pē ʻi hono toʻo ʻe hotau Fakamoʻuí kiate Ia ʻa ʻetau ngaahi angahalá kotoa ka mo hotau ngaahi mamahí mo e faingataʻaʻiá foki koeʻuhí ke Ne lava ʻo ʻiloʻi ʻa e meʻa ʻoku tau ongoʻí mo e founga ke fakafiemālieʻi ʻaki kitautolú.”⁵