Ko e Efiafi Kimuʻa he Kilisimasí mo e Fāmili Kotopá
ʻOku nofo ʻa e taha naʻá ne faʻú ʻi Pelū.
Naʻá ma maʻu mo Melesela ha meʻaʻofa pē ʻe taha. Te ma vahevahe fēfē nai ia?
“Ko e meʻa ʻi hoʻomou fai ia ki ha taha ʻoku kihiʻi siʻi hifo ʻi hoku kāingá ni, ko hoʻomou fai ia kiate aú’ (Mātiu 25:40).
ʻI he efiafi kimuʻa e Kilisimasí ne ʻi ai ha meʻaʻofa pē ʻe ua ʻi lalo heʻemau kiʻi ʻakau Kilisimasí. Ko e taha maʻa hoku kiʻi tuofefine taʻu ua ko Meleselá, pea taha maʻaku. Naʻa mau fusimoʻomo fakapaʻanga, pea talamai ʻe he Fineʻeikí ko e meʻa pē ia ne mau maʻú.
ʻI he pō ko iá ne lau ai ʻe he Fineʻeikí ha talanoa mei he Liahoná fekauʻaki mo e Kilisimasi hala meʻaʻofá. Ne u ongoʻi fiefia mo nonga lolotonga ʻene lau iá. Ta ʻoku ʻikai ko ha fuʻu loko meʻa e taha pē ʻa e meʻaʻofá ia. Ne pehē mai leva ʻe he Fineʻeikí, “Fēfē kapau te tau ʻalu ʻo ʻave ha ngaahi meʻaʻofa ki ha fāmili ʻi he uōtí kae ʻoua te tau vaʻinga keimi ʻo hangē ko ia ne tau faʻa fai ʻi he Efiafi Kimuʻa he Kilisimasí?”
“Ka ko e hā te tau ʻave maʻanautolú?” ko ʻeku fehuʻí atu ia.
“ʻOku ʻi ai pē ha kihiʻi meʻa ke tau vahevahe.”
Ne u sio atu ki he ongo meʻaʻofa ʻe uá, pea ki he fakatātā ʻo Sīsū ʻi he holisí. “ʻOku ou tui naʻe mei vahevahe ʻe Sīsū ʻa e meʻa naʻá Ne maʻú.”
Ne mau lotua pe ko e fē e fāmili te mau ʻaʻahi ki aí. Ko e tokolahi ʻo e ngaahi fāmili ne mau ʻiló naʻe ʻikai haʻanau meʻa ʻe maʻu he taʻu ko iá. Hili ʻemau lotú, ne mau ongoʻi hangē ʻoku totonu ke mau ʻaʻahi ki he fāmili Kotopá. Naʻe ʻi ai ʻenau fānau ʻe toko tolu, pea ne toki mole ʻa e ngāue ʻa e tangataʻeikí.
Ne mau ō ki he falekoloá ʻo fakatau mai ha panetón (ko ha foʻi mā ki he ngaahi ʻaho mālōloó), moa taʻo, mo ha fanga kiʻi meʻaʻofa ʻe tolu. Ne mau fiefia ʻi hono fili kinautolú. Naʻe fakaʻaongaʻi kotoa ʻe he Fineʻeikí ʻa e paʻanga naʻá ne maʻú, feʻunga mo ha sōlesi faka-Pelū ʻe 30 (tatau mo e U.S. $10).
Ko ʻemau maaú pē, ne mau fakaʻuli atu leva ki he ʻapi ʻo e fāmili Kotopá. Ne u puke ʻa e nima ʻo Meleselá lolotonga ʻemau lue atu ki he matapaá.
Ne sio mai ʻa Sisitā Kotopa kiate kimautolu peá ne hū mai kituʻa ke fāʻofua mai kiate kimautolu. “Meʻa fakafiefia moʻoni! Hū mai! Mou tangutu hifo hena” ko ʻene leá mai ia. ʻI heʻemau lue atu ki lotó, naʻá ne kuku e nima ʻeku Fineʻeikí mo tātaaʻi hono umá. Naʻá ne talamai, “ʻE fiefia lahi ʻa Lolenitō mo e tamaiki fefiné ke sio kiate kimoutolu.”
Naʻe ʻuli ʻaupito ʻa e faliki ʻo e falé ʻi loto. Naʻe ʻikai ha ʻuhila, ka ko e teʻelango pē. Ne u fakaʻofaʻia ʻi he fāmili Kotopá. Ne u fakaʻamu ange mai naʻe lahi ange ʻemau tokoni kiate kinautolú. Ka naʻe hangē naʻe muna pē ki he Fineʻeikí ʻa e ʻulí ia pe ko e teʻelangó. Naʻá ne fiefia pē ke ʻi ai mo Sisitā Kotopa.
“Ne mau omi pē ke talamonū atu kiate koe ke ke maʻu ha Kilisimasi Fiefia! ʻOku ou fiefia pē heʻeta kaungāmeʻá,” ko e Fineʻeikí ange ia. Naʻá ne foaki ange ʻa e meʻatokoní mo e meʻaʻofá kia Sisitā Kotopa, ʻa ia naʻá ne fiefia ʻaupito mo fakamālō mai.
Ne lele mai ʻa Lolenitō, Mateline, mo Lākulu mei he loki ʻe tahá ke fakalea mai. Ne fakasiosio atu ʻa Melesela ʻi hoku veʻe vaʻé mo malimali pē. Naʻá ne kata pē he taimi ne ʻai ai ʻe Lolenitō hono matá ke fakaolí. Tuai-e-kemo ne fetalanoaʻaki e tokotaha kotoa, tauʻaki hua mo kakata.
Ne u fakakaukau, “ʻOku lelei ange eni ia ʻi he vaʻinga keimí.” Ne u fiefia ne mau omi. Naʻe ʻikai mahuʻinga ia pe naʻe siʻisiʻi e meʻa ke mau vahevahé. Pea naʻe ʻikai mahuʻinga ia pe naʻe ʻuli e falikí. Naʻe ʻikai ko e Kilisimasí ʻa e meʻa ne mau maʻú. Ka ko ʻemau fakatahá naʻe mahuʻingá.
ʻI heʻemau mateuteu ke mau mavahe maí, ne mau toe feʻiloaki mo Sisitā Kotopa. Naʻá ne pehē mai, “Mālō ʻaupito.” Naʻe tetetete hono leʻó, pea ne u lava ʻo vakai atu ki he loʻimata ʻi hono fofongá. Ne u tuʻu ʻete hake ʻo ʻuma atu ki he fofonga ʻo Sisitā Kotopá.
Ne u pehē atu, “Feliz Navidad.”