Andam na Ba nga Modawat sa Melchizedek Priesthood?

“Kadtong tanan kinsa modawat sa pagkapari, makadawat niini nga panumpa ug pakigsaad sa akong Amahan, diin siya dili makalapas” (D&P 84:40).

Illustration of a young man wearing a suit and tie.

Mga Paghulagway pinaagi ni John Kachik

Dili sama sa Aaronic Priesthood, nga nadawat nga walay panumpa, ang Melchizedek Priesthood gidawat uban sa panumpa nga hinimo sa Langitnong Amahan ug uban sa pakigsaad tali kaninyo ug Kaniya. Ang mosunod nga mga ideya makatabang kaninyo sa pagsabut sa importante nga hugpong sa mga pulong diha sa Doktrina ug mga Pakigsaad 84:33–44, diin gipadayag sa Ginoo ang panumpa ug pakigsaad sa priesthood.

Unsa ang panumpa nga gihimo sa atong Langitnong Amahan?

“Ang pag-usbaw nianang mga posibilidad sa panumpa ug pakigsaad magdala sa labing dako sa tanang mga gasa sa Dios: kinabuhi nga dayon. Usa kana ka katuyoan sa Melchizedek Priesthood. Pinaagi sa paghupot sa mga pakigsaad sa atong pagdawat sa priesthood ug sa pagbag-o niini diha sa mga seremonya sa templo, kita gisaaran pinaagi sa usa ka panumpa nga gihimo sa atong Langitnong Amahan, nga si Elohim, nga atong maangkon ang kahingpitan sa Iyang himaya ug mabuhi susama nga Siya nabuhi.”

Presidente Henry B. Eyring, Unang Magtatambag sa Unang Kapangulohan, “Hugot nga Pagtuo ug Panumpa ug Pakigsaad sa Priesthood,” Liahona, Mayo 2008, 61.

Unsa ang inyong tahas diha sa pakigsaad?

“Ang tahas sa lalaki diha sa pakigsaad mao ang pagpalambo sa iyang calling diha sa priesthood [tan-awa sa D&P 84:33], ug nga siya mabuhi pinaagi sa matag pulong nga mogula gikan sa ba-ba sa Dios, ug nga siya mosunod sa mga kasugoan.”

Presidente Joseph Fielding Smith (1876–1972), “Magnifying Our Callings in the Priesthood,” sa Conference Report, Abr. 1970, 59.

Unsay ipasabut nga makaangkon og pagbag-o sa lawas?

“Akong nakita kana nga saad natuman sa akong kaugalingong kinabuhi ug sa mga kinabuhi sa uban. Usa nako ka higala mialagad isip presidente sa misyon. Siya misulti kanako nga sa matag tapos sa adlaw samtang siya nag-alagad, hapit dili na siya makahimo sa pagsaka aron matulog naghunahuna kon aduna pa ba siyay kusog pagharong og laing adlaw. Dayon pagkabuntag, iyang mamatikdan nga ang iyang kusog ug kadasig nabalik. Inyo kining nakita sa mga kinabuhi sa edarang mga propeta kinsa maingon og nabag-o matag higayon nga sila mibarug aron pagpamatuod sa Ginoong Jesukristo ug sa gipahiuli nga ebanghelyo. Usa kana ka saad alang niadtong kinsa mopadayon uban ang hugot nga pagtuo sa ilang pagpangalagad sa priesthood.”

Presidente Henry B. Eyring, “Hugot nga Pagtuo ug Panumpa ug Pakigsaad sa Priesthood,” Liahona, Mayo 2008, 62.

Unsay ipasabut sa pagdawat sa Ginoo?

“Ang mga lalaki kinsa takus nga modawat sa priesthood modawat ni Ginoong Jesukristo, ug kadto kinsa modawat sa Ginoo modawat sa Dios Amahan. Ug siya nga modawat sa Amahan makadawat sa tanan nga Siya aduna. Dili katoohan nga mga panalangin modagayday gikan niini nga panumpa ug pakigsaad ngadto sa takus nga mga lalaki, mga babaye, ug mga bata sa tibuok kalibutan.”

Elder Russell M. Nelson sa Korum sa Napulog Duha ka mga Apostoles, “Mga Pakigsaad,” Liahona, Nob. 2011, 88.

Scripture Chain: Pagdawat sa Ginoo

Ang pagdawat sa priesthood usa ka paagi sa pagdawat sa Ginoo. Basaha kining mga bersikuloha aron makat-on og duha pa: Juan 13:20 ug Doktrina ug mga Pakigsaad 112:20.

Ang mga batan-ong babaye makadawat ba usab niining mga panalangin?

“Ang mga panalangin sa priesthood dili lang alang sa mga lalaki. Kini nga mga panalangin ihatag usab ngadto sa atong asawa ug mga anak nga babaye ug niadtong matinud-anong mga babaye sa Simbahan. Kining buotan nga mga sister makaandam sa ilang kaugalingon, pinaagi sa pagsunod sa mga kasugoan ug sa pagserbisyo sa Simbahan, alang sa mga panalangin sa balay sa Ginoo. Ang Dios nagtanyag ngadto sa Iyang anak nga mga babaye sa tanang espirituhanong gasa ug panalangin nga maangkon sa Iyang anak nga mga lalaki.”

Presidente Joseph Fielding Smith (1876–1972), “Magnifying Our Callings in the Priesthood,” sa Conference Report, Abr. 1970, 59.

Mga Panalangin nga Akong Nadawat pinaagi sa Priesthood

Illustration depicting a bride and groom.

Samtang matarung ko nga nagkinabuhi isip anak nga babaye sa Dios, makadawat ko og daghang panalangin pinaagi sa Iyang priesthood. Mahimo ko nga miyembro sa Simbahan ni Jesukristo, nga gipahiuli pinaagi sa priesthood. Makaambit ko sa sakrament nga gipanalanginan sa gahum sa priesthood ni Jesukristo aron pagbag-o sa akong mga pakigsaad ug sa pagtabang nako nga hingpit makahinulsol. Makadawat ko og personal nga giya gikan sa Langitnong Amahan pinaagi sa mga panalangin sa priesthood. Ma-set apart ko ubos sa pagdumala sa usa ka tawo nga naghupot sa mga yawe sa priesthood ug hatagan og katungod sa paghimo niana nga calling. Magamit nako kana nga katungod sa pagpanalangin sa kinabuhi sa uban. Mas makahimo ko og pakigsaad uban sa Langitnong Amahan pinaagi sa gahum sa priesthood nga makita sa mga templo. Mahimo kong maminyo sa usa ka takus nga tighupot sa priesthood diha sa templo, ug mag-uban kaming mopalambo og matarung nga pamilya. Uban sa akong mahangturong pamilya, akong madawat ang tanan nga anaa sa Langitnong Amahan (tan-awa sa D&P 84:38).

Melissa Hart, Utah, USA

Mga Leksyon sa Dominggo

Hilisgutan Niining Bulana:

Mga Ordinansa ug mga Pakigsaad

Apil sa Pag-istoryahanay

Mga Butang nga Pamalandungon sa Dominggo

• Sa inyong hunahuna sa unsang paagi ang pagsunod sa mga kasugoan makatabang ninyo sa pag-andam sa pagdawat sa tanan nga anaa sa Amahan?

• Sa inyong hunahuna unsay kalainan tali sa “pagbaton” sa priesthood (D&P 84:33) ug “pagdawat” sa priesthood (tan-awa sa bersikulo 35)?

• Sa unsang paagi ang mga pagtulun-an sa Doktrina ug mga Pakigsaad 98:11–12 makatabang kaninyo nga “mabuhi pinaagi sa matag pulong … sa Dios” (D&P 84:44)?

Mga Butang nga Mahimo Ninyong Buhaton

• Tinguhaa nga mahimong takus sa Espiritu Santo. Ang inspirasyon makatabang kaninyo nga mas makasabut sa doktrina sa priesthood.

• Memoryaha ang panumpa ug pakigsaad sa priesthood, nga makita sa Doktrina ug mga Pakigsaad 84:33–44.

• Tun-i sa mainampuong paagi ang dugang mga kasulatan kabahin sa priesthood, sama sa Alma 13 ug Doktrina ug mga Pakigsaad 13; 20; 107; 121.

• Pagdawat sa Tanan nga Anaa sa Amahan: Usa ka Modernong Sambingay

  Carlos E. Asay