Panahon sa Kasulatan

Ang Sambingay sa mga Talanton

Ni Jean Bingham

Ang tagsulat nagpuyo sa Utah, USA.

Pagkat-on og dungan mahitungod sa Bag-ong Tugon niining tuiga!

Si Jesus misaysay og istorya, o sambingay, kabahin sa usa ka tawo kinsa mipahulam og sinsilyo ngadto sa tulo ka tawo kinsa nagtrabaho alang kaniya. Dayon ang tawo mipanaw. Samtang wala siya, ang duha ka tawo nagkugi ug migamit sa ilang sinsilyo aron mas modaghan kini aron ilang ibalik sa tawo. Apan ang usa ka tawo milubong sa iyang sinsilyo kay nahadlok siya nga mawala kini. Sa pagbalik sa tawo, siya mihatag og ganti niadtong nakapadaghan sa sinsilyo nga iyang gipahulam. Apan iyang gikuha ang sinsilyo sa tawo kinsa mitago lang niini. (Tan-awa sa Mateo 25:14–29.)

Sama sa tawo diha sa sambingay, ang Langitnong Amahan mihatag kanatong tanan og butang nga bililhon kaayo—dili mga sinsilyo, apan espesyal nga mga abilidad o mga talento, sama sa pagkanta, pagpakita og gugma, pagdagan, o pagtabang sa uban. Sama sa mga tawo diha sa sambingay, kinahanglan mo nga magkugi aron mapalambo ang inyong mga talento!

Sa unsang paagi kamo makasunod sa mga pagtulun-an ni Jesus pinaagi sa paggamit ug pagpalambo sa inyong mga talento? Kamo mas malipay ug makatabang sa uban kon inyo kining buhaton.

Pagkat-on pa og Dugang

Ang talento usa ka espesyal nga abilidad, sama sa talento sa pag-drowing. Apan sa panahon ni Jesus, ang pulong nga talanton nagpasabut og kantidad sa kwarta nga may dakong bili. Sa unsang paagi kining duha managsama?

Panag-istoryahanay sa Pamilya

Tabangi ang matag miyembro sa pamilya sa pagpangalan og usa ka talento nga anaa niya. Unsaon ninyo sa pagtinabangay aron molambo ang inyong mga talento? Hisguti kon sa unsang paagi ang inyong mga talento makatabang sa uban ug pagpakita og pasalamat sa inyong Langitnong Amahan. Hagita ang mga sakop sa pamilya sa pag-ila sa mga talento sa usag usa ug matinud-anong dayga kini matag adlaw.

Kanta: “‘Give,’ Said the Little Stream” (Children’s Songbook, 236)

Kasulatan: Doktrina ug mga Pakigsaad 46:11

Video: Adto sa Biblevideos.org aron tan-awon ang “The Parable of the Talents”

Tip sa Kasulatan

Ang pagdrama-drama sa istorya sa kasulatan usa ka malipayong paagi nga mas magkat-on niini.

1. Pag-assign og usa ka tawo sa pag-arte og bahin diha sa istorya. Mahimo mong mogamit og yanong mga kostume ug props sama sa toalya o dulaan nga kwarta.

2. Pabasaha ang usa ka tawo sa istorya, mohunong matag bersikulo aron makaarte ang naka-assign sa bag-ohay lang nga gibasa.

3. Balika og pagdrama-drama ang istorya aron ang tanan makaapil.

Ang Pasundayag sa Talento sa Pamilya

Pagplano og pasundayag aron ipakita inyong mga talento.

1. Paambita ang matag miyembro sa pamilya sa pagpakigbahin sa unsay butang nga maayo sila, sama sa pagbasa nga madungog sa tanan, pag-bake og treat, pasundayag sa musika, pagpakatawa, pagbalintong, o pagpakigbahin og malipayong pahiyom.

2. Matag adunay mahuman og paambit sa ilang talento, ang ubang sakop sa pamilya pasultiha og butang nga maayo nga ilang namatikdan niana nga tawo.

3. Alang sa meryenda, sagola ang paboritong prutas sa matag usa aron makahimo og lamiang fruit salad!

Ipakigbahin ang Inyong Talento!

Dapit:

Adlaw:

Oras:

Pagdala og usa ka piraso nga prutas alang sa meryenda!

Mahimo kamong makaimprinta og dugang mga imbitasyon sa liahona.lds.org.

Mga paghulagway pinaagi ni Josh Talbot