Walo ka Gagmay nga Piraso sa Manok
Abigail Almeria, Cebu, Philippines
Uban sa akong bana nga temporaryong walay trabaho, ang pagsuporta sa pamilya nga dunay lima ka mga anak nga nagtubo problema kaayo. Usa ka adlaw sa wala pa ang sibya sa kinatibuk-ang komperensya sa Oktubre 2013, gisusi namo ang suplay sa among pagkaon ug nakahukom nga mag-andam og yanong paniudto nga minantikaang manok ug kan-on atol sa break sa sesyon sa komperensya.
Miabut ang Dominggo, ug andam na kami. Ang uban namong kabanay, naglangkob sa akong mga ginikanan ug sa akong igsoong mga babaye ug sa ilang mga pamilya nag-abut sa stake center tunga sa oras sa dili pa magsugod ang sibya.
Pagkadako nga kalipay ug panalangin nga makadungog sa mga propeta, mga manalagna, ug mga tigpadayag nga mipakigbahin sa mga mensahe nga alang gayud sa atong henerasyon. Samtang ako naminaw sa tambag ug nakatagamtam sa talagsaong espiritu sa kalinaw ug gugma nga akong gibati gikan sa akong Langitnong Amahan, nakadawat ko og kasiguroan nga ang tanan mamaayo ra, nga ang espirituhanon ug temporal nga mga panginahanglan sa akong pamilya masulbad ra, ug nga kon magpadayon ko sa pagpakita og hugot nga pagtuo ug motugot sa akong Manluluwas nga modala sa renda, makalingkawas kami gikan sa kakabus ug sa ubang mga kalisdanan.
Nakatagamtam sa maanindot nga espiritu nianang adlaw nga Igpapahulay, ako nakalimot na sa paniudto. Diha lamang ako nakaamgo nga nag-break na tali sa mga sesyon nga 17 diay mi ka buok. Siyam ka mga hamtong ug walo ka mga bata ang magbahin sa among gamay nga pagkaon sa walo ka gagmay nga piraso sa manok ug usa ka plato nga kan-on, uban sa usa ka panaksan nga pasta nga gidala sa usa sa akong igsoon nga mga babaye.
Ang otso anyos nga si Henry mihalad og pag-ampo sa pagpasalamat ug pagpanalangin sa among pagkaon, naghangyo nga ang tanan kinsa mokaon mabusog. Dayon akong gipikas-pikas ang pirasong manok og ginagmay ug gihatag kini sa mga bata samtang ang akong igsoong babaye mibutang sa pasta ug kan-on sa ilang mga plato. Wala nako kapugngi nga motulo ang mga luha sa dihang akong nakita nga dihay igo bisan ginagmay ug usa ka sobra human ang tanang piraso napikas-pikas ug ang pasta ug kan-on nabahin namong tanan. Kaming tanan nangaon—ug nabusog.
Akong gisultihan ang akong mga ginikanan ug bana nga ako nasayud sa kasiguroan nga ang Manluluwas gayud mibahin sa lima ka tinapay ug duha ka isda ug gipakaon sa usa ka pundok sa mga katawhan sa “lima ka libo ka mga tawo, gawas sa babaye ug mga anak” (tan-awa sa Mateo 14:14–21). Ang ubang mga kritiko ug dili tumutuo nangangkon nga ang milagro sambingay lang, nasobrahan, o imposible. Apan sa akong pamilya ug kanako, ang asoy tinuod ingon nga nahisulat.
Ang Langitnong Amahan nakadungog sa pag-ampo sa usa ka matinud-anon nga bata kinsa mihatag og pasalamat ug mihangyo sa panalangin nga ang tanan nga mokaon mapuno ug makadawat og kalagsik.
Sa among pagbalik sa hall alang sa kinatibuk-ang komperensya, ako nagbusog sa akong kasingkasing. Gibati nako nga daw ako didto sa pundok sa mga katawhan nga gipakaon ni Jesus, nanghinaut nga magpabilin ug magkat-on gikan Kaniya kinsa nagsaad nga kon kita maminaw ug mopatalinghug, kita dili gayud gutumon o uhawon (tan-awa sa Juan 6:35).
Uban sa among mga anak hilum kaming milingkod sa among mga lingkuranan sulod sa chapel ug nag-andam nga maminaw sa pinili nga mga sulugoon sa Langitnong Amahan. Usa kadto ka okasyon nga kanunay nakong gihandom.