Puno sa Kinabuhi ug KALAGSIK
Ang tagsulat nagpuyo sa Texas, USA.
Unsay usa ka buhat nga, kon sundon kanunay ug uban sa disiplina, makatabang ninyo nga makabaton og mas maayong panglawas, kalagsik, ug inspirasyon?
Litrato sa atubangan sa relo PINAAGI SA choness/iStock/Thinkstock
Hunahunaa sa makadiyot nga usa ka higala moduol ninyo nga mangayo og tambag sa mga paagi sa pagdawat og personal nga pagpadayag. Kon kamo makahatag lang og usa ka ideya, unsa kini?
Isip usa ka bag-ong General Authority, si Elder Marion G. Romney (1897–1988) mibati nga dili takus sa pagtuman sa iyang importante nga calling, mao nga nangayo siya og tambag sa iyang higala nga si Elder Harold B. Lee (1899–1973) sa Korum sa Napulog Duha ka mga Apostoles. Ang tambag nga gihatag nianang adlaw nakapasurprisa ug nakapadasig ni Elder Romney. Si Elder Lee miingon: “Kon ikaw gusto nga magmalampuson isip usa ka General Authority, kinahanglan ka nga madasig. Kinahanglan kang makadawat og pagpadayag. Mohatag ko nimo og usa ka tambag: Katulog og sayo ug pagmata og sayo. Kon buhaton nimo, ang imong lawas ug hunahuna sakto og pahuway ug dayon sa hilom nga mga takna sa sayong kabuntagon, ikaw makadawat og kalit nga mga inspirasyon ug panabut kay sa laing oras sa adlaw.”
Paglabay sa mga katuigan, naghinumdom niana nga kasinatian, si kanhi Presidente Romney miingon: “Sukad nianang adlawa, akong gisunod kana nga tambag, ug nasayud ko nga kana tinuod. Kon duna koy seryoso nga problema, o buluhaton nga may pagkamamugnaon nga diin ako naglaum nga makadawat sa impluwensya sa Espiritu, makadawat ko og tabang kanunay sa sayong mga takna sa buntag kay sa bisan unsa nga laing takna nianang adlawa.”1
Sa akong unang pagbasa niini nga asoy, nasurprisa kaayo ko sa tambag nga gihatag ni Elder Lee. Dili gyud unta nako makonektar ang sayong iskedyul matag adlaw sa pagpadayag. Hinoon, nasayud ko karon nga dunay direkta nga kalabutan. Nakat-unan usab nako nga ang mga aksyon nga tradisyunal nga may kalabutan sa pagdawat og pagpadayag sama sa pag-ampo, pagtuon sa kasulatan, pagpuasa, pagtambong sa templo, ug pagserbisyo mas nindot kon ako mosayo sa pagkatulog ug mosayo pagmata.
Mga Ehemplo sa Kasulatan
Dinasig nga mga lalaki ug mga babaye sa tanang kapanahunan misunod niining balaang tambag mahitungod sa pagkatulog. “Ug si Abraham sayo sa buntag miadto sa dapit diin siya mitindog sa atubangan sa Ginoo” (Genesis 19:27; emphasis gidugang). “Mibangon si Moises pagsayo sa buntag, ug mitungas siya haduol sa bukid sa Sinai, ingon sa gisugo kaniya sa Ginoo, ug gidala sa iyang kamot ang duruha ka papan nga bato” (Exodo 34:4; emphasis gidugang). “Ug si Josue misayo pagbangon sa pagkabuntag, ug ang mga sacerdote nagyayong sa arca sa Ginoo” (Joshua 6:12; emphasis gidugang).
Giunsa pagsugod sa Ginoo ang Iyang adlaw panahon sa Iyang mortal nga pangalagad? Si Marcos nagrekord, “Ug unya sayo sa kaadlawon, sa dugay pa ang kabuntagon, siya mibangon ug miadto sa usa ka dapit nga awaaw, ug didto nag-ampo siya” (Marcos 1:35). Si Maria, usa ka mahalaron nga disipulo, misunod sa Iyang ehemplo ug sa pagbuhat sa ingon nagtudlo nato og gamhanan nga leksyon: “Ug sa nahaunang adlaw sa semana, si Maria Magdalena miadto sa lubnganan sayo sa kaadlawon, samtang mangingit pa” (Juan 20:1). Sa sayo sa buntag siya nahimong unang mortal nga nakakita sa nabanhaw nga Ginoo.
Ang mga Panalangin sa Pagbangon og Sayo
Bantugang mga lider sa atong panahon mogamit usab sa takna sa sayo sa kabuntagon sa pagdawat og pagpadayag. Kaniadto nakadungog ko sa usa ka sakop sa Unang Korum sa Seventy nga mihisgot sa usa ka pakigpulong sa komperensya sa stake nga siya tigsayo nga mobangon. Human sa miting, nakigsulti ko niya kadiyot mahitungod sa iyang sayo sa buntag nga ritwal, dayon nangutana kon pila ka buok sa Unang Kapangulohan ug sa Korum sa Napulog Duha dunay susama nga iskedyul. Mitubag siya, “Silang tanan!” Usa kadto ka gamhanan nga higayon, ug ang Espiritu nagpamatuod nako nga ang pagkatulog og sayo ug pagmata og sayo sa tinuod konektado gayud sa pagdawat og pagpadayag.
Dugang nga mga panalangin gisaad naidtong kinsa mosunod sa tambag sa Ginoo mahitungod sa pagkatulog. Hunahunaa kining talagsaong mga saad: “hunong sa pagkatulog og labaw pa kay sa gikinahanglan; mopahulay sa higdaanan og sayo, nga kamo dili kapuyon; bangon og sayo, nga ang inyong mga kalawasan ug ang inyong hunahuna mahimo nga malagsik” (D&P 88:124; emphasis gidugang). Ang malagsik nagpasabut “sa pagpuno uban sa kinabuhi ug kalagsik.”
Ang karaan nga pilosoper si Aristotle misugyot og laing mga benepisyo ngadto niadtong magsunod og sayo nga iskedyul: “Mas maayo nga momata sa dili pa mogawas ang adlaw, kay ang maong kinaiya makasalmot sa kahimsog, kaadunahan ug kaalam.”2 Ang politikal lider sa U. S. sa una nga si Benjamin Franklin mibutang niana nga hunahuna ngadto sa iyang inila nga panultihon: “Sayo nga matulog ug sayo nga mobangon, makapahimo sa tawo nga himsog, adunahan, ug maalamon.”3 Kadaghanan sa mga tawo mouna sa kahimsog, kaadunahan, ug kaalam sa mga butang nga labing gitinguha sa kinabuhi.
Kahimsog
Ang average nga edad sa chief executive officer sa America mao ang 55 anyos.4 Masurprisa ba kamo kon inyong mahibaloan nga ang CEO sa usa ka internasyonal nga organisasyon nag-edad og 97 anyos? Unsa man kon makahibalo mo nga siya mobiyahe gihapon sa kalibutan mohatag og pakigpulong, mobansay sa mga lider, makigkita sa mga opisyal sa gobyerno, ug interbyuhon sa dagkong mga organisasyon sa media niining dako na nga edad? Unsa man kon ang iyang duha ka sinaligang mga VP aktibo pa kaayo nga 79 ug 87 anyos? Ug gani mao gayud kana ang sitwasyon sa padulong na matapos nga administrasyon ni Presidente Gordon B. Hinckley (1910−2008), isip Presidente sa Simbahan. Ingon og ang sayong iskedyul, bisan dili lang ang bugtong hinungdan, apil sa mga hinungdan sa taas nga kinabuhi sa atong mga lider sa Simbahan.
Ang kanhi presidente sa Brigham Young University nga si Ernest L. Wilkinson nagsugyot nga ang pagsunod og sayo nga iskedyul adunay kalabutan sa mga benepisyo sa panglawas. Naghisgot kabahin ni Presidente David O. McKay (1873–1970), Presidente sa Simbahan nianang higayona, miingon siya: “Usa sa dakong mga rason, ako nakasiguro, nganong si Presidente McKay miabut sa ingon ka maayo, hingkod, ug lagsik nga katigulangon mao nga isip usa ka batan-on naanad siya sa pagkatulog og sayo, pagmata og sayo, sa kasagaran wala pa mosubang ang adlaw, nga ang iyang hunahuna tin-aw ug ang iyang lawas lagsik, sa pagbuhat sa buluhaton nianang adlawa.”5
Nahimo usab ang koneksyon tali sa sayong iskedyul ug sa mental ug emosyonal nga kahimsog. Si Elder Russell M. Nelson sa Korum sa Napulog Duha ka mga Apostoles miingon, “Ngadto niadtong kinsa mibati nga napukan ug dinaug-daog, pamalandong sa sayong mga takna sa adlaw alang sa inyong kaluwasan.”6
Kaalam
Ang koneksyon tali sa naandan nga pagkatulog ug kaalam dili lang usa ka teyoriya. Usa ka pagtuon nga gipahigayon sa mga researcher sa Brigham Young University nag-ingon: “Ang mga estudyante nga dunay kinaiya nga dugay matulog dunay ubos nga grade point averages (GPAs) kay sa mga estudyante nga dunay kinaiya nga matulog og sayo ug momata og sayo. Kon dugay mobangon ang mga estudyante sa buntag, mas ubos ang ilang mga grado. Gikan sa tanang mga bahin nga gitun-an, ang pagmata sa mga adlaw ug sa katapusan sa semana adunay labing dakong kalabutan sa mga GPA sa mga estudyante. Ang matag oras nga lapas sa average nga ang mga estudyante matulog sa mga adlaw sa semana gilambigit sa 0.13-point nga pagkunhod sa GPA (0.0-4.0 scale).”7
Dili pa lang dugay nag-survey ko og 203 ka mga estudyante sa kolehiyo nga mga Santos sa Ulahing mga Adlaw mahitungod sa ilang mga kinaiya sa pagkatulog. Sa kasagaran kini nga mga estudyante momata sa 7:30 sa buntag sa mga adlaw nga ting-eskwela ug 9:15 sa katapusan sa semana. Ang ilang kasagaran nga tingkatulog mao ang tungang gabii sa mga gabii nga ting-eskwela ug 1:00 sa buntag sa katapusan sa semana. Kini nga mga estudyante direktang misupak sa research nga nagkonektar sa sayo nga iskedyul sa pag-angkon og kahibalo. Tingali ang pagkahibalo nga ang mas taas nga GPA mao ang resulta sa sayo nga iskedyul yano ra kaayo aron tuohan. Nahisama na ba kita sa mga anak sa Israel, kinsa nagdumili sa pagsunod sa tambal sa Ginoo alang sa mga pinaakan sa bitin “tungod sa pagkayano sa paagi”? (1 Nephi 17:41; tan-awa usab sa Helaman 8:14–15).
Ikonsiderar ang tambag ni Presidente Boyd K. Packer, Presidente sa Korum sa Napulog Duha ka mga Apostoles, nga gihatag kalabut sa pag-angkon og kaalam: “Motambag ko sa atong mga anak sa pagbuhat sa ilang kritikal nga pagtuon sa sayong mga takna sa kabuntagon nga sila presko ug alerto, kay sa makigbisog sa pisikal ug mental nga kakapoy sa kagabhion. Akong nakat-unan ang gahum sa panultihon, ‘Sayo matulog, sayo momata.’”8 Tingali mao kini ang usa sa rason nga gisunod sa mga full-time missionary ang iskedyul nga sayo matulog ug sayo momata.
Ubang mga Panalangin
Nagsulat sa iyang asawa, si Barbara, si Elder Joe J. Christensen, emeritus nga sakop sa Seventy, misugyot nga dunay daghan pa nga mga panalangin niadtong mosunod sa tambag sa Ginoo sa pagkatulog: “Duna gayuy maayo kaayo nga rason sa sugo sa pagkatulog ug pagmata og sayo [tan-awa sa D&P 88:124]. … Ang kalibutan mas maanindot nga lugar sa sayo sa buntag. Ang kinabuhi mas kalma. Mas daghan ang mahimo sa mubo nga panahon.”9 Atol sa usa ka pakigpulong sa fireside sa Brigham Young University, si Elder Christensen dugang miingon: “Ang uban ninyo wala makapahulay og igo nga inyong gikinahanglan. Ang uban naanad nga dugay matulog ug dugay momata kay sa gikinahanglan sa inyong sistema, sa ingon dili madawat ang ubang personal nga inspirasyon nga madawat unta ninyo.”10
Si Presidente Hinckley midugang og laing saad ngadto sa masulundon: “Kon kamo matulog pagka-alas 10:00 ug momata pagka-alas 6:00 sa buntag, maayo ra ang mga butang alang ninyo.”11
Ang pagsunod sa tambag sa Ginoo bahin sa pagkatulog ingon og gamay ra nga butang, apan “pinaagi sa gagmay nga mga paagi ang Ginoo makapahinabo sa mahinungdanon nga mga butang” (1 Nephi 16:29). Duna koy pagpamatuod nga ang pagsunod sa sayo nga iskedyul makahatag og daghang mga panalangin sa atong kinabuhi, lakip na sa pagpadayag. Talagsaon kaayo kon unsay akong mahimo sa usa ka adlaw kon mosayo ko pagkatulog ug mosayo pagmata. Ang mga benepisyo niining pagdisiplina sa kaugalingon labaw kaayo kay sa gikinahanglan nga paningkamot. Kon kita modaug sa unang pakiggubat batok sa higdaanan, mas modaog kita sa daghang mga gubat nianang adlawa. Mas mapuno usab kita sa kinabuhi ug kalagsik.