Pagpangita og Paagi nga Makapasaylo
Ang tagsulat nagpuyo sa Utah, USA.
Kitang tanan mag-atubang og panahon nga dunay usa ka tawo nga mobuhat og butang nga makapasakit nato. Usahay bation nato nga imposible nga kalimtan ang kasakit. Apan bisan kon ang pagkasilo grabe, ang Manluluwas nagtudlo nato sa pagpasaylo sa tanang mga tawo. Ang pagpasaylo usa ka lisud nga butang, apan ang paghimo sa mga butang nga makapaduol nato ngadto ni Kristo, atong makita ang kalinaw nga ikahatag sa pagpasaylo. Sa ubos, duha ka batan-ong mga babaye mipakigbahin sa ilang kasinatian sa pagpasaylo sa uban.
Pagpasaylo sa usa ka Higala
Sa dihang si Renee* mibalhin ngadto sa bag-ong eskwelahan sa Belgium, nalipay siya nga nakakita og bag-ong mga higala. Dayon usa ka higala dunay gibuhat nga nakapalisud sa sitwasyon. Mipasabut si Renee:
“Ang akong amiga nga si Nora naghimo og Facebook account ginamit ang pangalan sa laing higala, si Kate. Nagsugod siya sa pagdaot og mga tawo gamit niana nga profile, ug ang tanan miakusar ni Kate nga palaaway. Gani bugal-bugalan ko ni Nora didto sa eskwelahan, hisgutan ang akong relihiyon ug akong personalidad. Naningkamot ko nga molikay niining mga pag-ataki apan dili ko makahimo, mao nga nagsugod ko sa pagkuyog sa ubang mga tawo.
“Sa dihang mikumpisal si Nora mahitungod sa pike nga profile, ang tanan nasuko kaniya. Gihatagan ko ni Nora og sulat nga nangayo og pasaylo, apan dili ko makapasaylo niya. Naglagot kaayo ko!
“Usa ka adlaw nagbasa ko sa mga kasulatan, ug akong nabasahan ang Doktrina ug mga Pakigsaad 64:9–10: ‘Busa, Ako moingon nganha kaninyo, nga kamo kinahanglan gayud nga mopasaylo sa usag usa; kay siya nga dili mopasaylo sa iyang igsoon ang iyang mga kalapasan magpabilin nga gipanghimaraut sa atubangan sa Ginoo; kay magpabilin diha kaniya ang dakong sala. Ako, ang Ginoo, mopasaylo kinsa Ako mopasaylo, apan kamo gikinahanglan nga mopasaylo sa tanan nga mga tawo.’
“Diha-diha naghunahuna ko bahin ni Nora. Nasayud ko nga dili sakto nga mobati nga naglagot pag-ayo. Nag-ampo ko ug nangamuyo sa Langitnong Amahan nga tabangan ko Niya sa pagpasaylo ni Nora. Dili kadto sayon, apan naningkamot ko sa pagbuhat niini. Gisugdan nako pinaagi sa pagpadala niya og mga mensahe nangutana mahitungod sa iyang adlaw, ug usahay mag-istorya mi sa paniudto. Nahibaloan nako nga ang amahan ni Nora namatay upat ka tuig na ang nakalabay. Lisud ang iyang kinabuhi, ug nagtuo siya nga ang tanan wala makagusto niya. Nalipay ko nga wala na masuko kaniya. Si Kate ug ang uban wala makasabut nganong nakapasaylo ko ni Nora, apan nasayud ko unsay akong gibuhat mao ang sakto, ug nasayud ko nga ang Langitnong Amahan mapasigarbuhon nako.”
Nakat-on si Renee nga ang Dios nagsugo nato sa pagpasaylo sa tanan. Pinaagi sa pagsunod niana nga sugo, nakaangkon siya og kalooy ug pagsabut alang ni Nora ug nakahimo sa pagpasaylo sa hingpit.
Pagkaplag og Kalinaw sa Kamatayon sa Akong Igsoong Lalaki
Sa dihang ang igsoong lalaki ni Janet namatay sa aksidente sa sakyanan tungod sa hubog nga drayber ug sa iyang mga sakay niini, nasayud siya nga kinahanglan niyang kuhaon ang kasuko nga iyang gibati, apan wala siya masayud kon unsaon.
“Lisud ang pagsulti unsay nakapasakit nako pag-ayo—ang akong kasuko niining walay hunahuna nga mga tin-edyer o ang akong sinserong paghandom nga mahibalik ang akong igsoong lalaki. Dili nako maantus ang dakong kahaw-ang sa akong kinabuhi. Nahinumdom ko nga mainitong nag-ampo nga ingon og milungtad og daghang mga oras. Ang ako rang gusto nga mahibalik si Nathan.
“Gibati ko og kalooy sa mga batan-on nga responsable sa kamatayon ni Nathan tungod kay nasayud ko nga mibati sila og grabing pagmahay. Apan mibati usab ako og kasuko ug kasilag. Sayon ra nga basulon nila. Miingon ko sa akong hunahuna nga pasayloon nako kining mga batan-on, apan mobalik gihapon ang akong kasuko kon maghunahuna ko sa aksidente. Kanunay kong mangutana sa akong kaugalingon, ‘Unsaon nako nga makapasaylo sa tinud-anay niini nga mga batan-on, ug unsaon nako pagkahibalo nga ako nakapasaylo na?’
“Human lamang sa daghan kaayong mga pag-ampo, sinsero nga mga pagpuasa, ug daghang pagtuon ug pamalandong nga sa katapusan gibati nako nga tinud-anay na akong nakapasaylo nila. Nahinumdom ko nga namalandong usa ka adlaw niana. Naghunahuna ko, ‘Pasayloon nako sila. Nganong dili ko makapasaylo? Ang tanan masayop, ug kinsa ko nga mohukom? Dili nako masulbad ang bisan unsa kon magsige ko og hunahuna, maong gisalikway nako. Nindot kaayo ang pamati. Kanunay kong naghandom nga makahibalo nga tinud-anay nakong napasaylo ang mga batan-on, ug kini miabut. Dili nako mausab unsay nahitabo ni Nathan, apan makapili ko sa reaksyon sa pagpasaylo ug paghigugma kay sa masuko.”
Nakat-on si Janet nga ang tinud-anay nga pagpasaylo nagkinahanglan og panahon ug paningkamot. Ang Manluluwas miingon, “Paduol ngari kanako ug ako mopaduol nganha kanimo” (D&P 88:63). Mas nahiduol si Janet ngadto sa Ginoo pinaagi sa pagpuasa, pag-ampo, pagtuon sa kasulatan, ug ubang mga paningkamot. Kon mao usab ang atong buhaton, atong mapulihan ang atong kasuko ug kasakit sa mga pagbati sa kalinaw ug pagpasaylo.
Napuno sa Gugma
Sama ni Janet ug Renee, ang kapasayloan makatabang nato nga mobati og kalooy, pagsabut, ug pailub. Kon kita mopasaylo sa uban, ang Ginoo mopuno nato sa Iyang putli nga gugma ug kita mahimong mas sama Kaniya.