Pag-ani sa mga Ganti sa Pagkamatarung
Ni Elder Quentin L. Cook
Sa Korum sa Napulog Duha ka mga Apostoles
Gikan sa pakigpulong, “The Rewards of Righteousness,” nga gihatag sa BYU Women’s Conference niadtong Mayo 2, 2014.
Walay maayong butang ang ihikaw niadtong nagbuhat og matarung.
Ang kalibutan literal nga anaa sa kagubot (tan-awa sa D&P 45:26). Daghan sa atong mga hagit may kalabutan sa espirituhanon. Kini mga isyu sa katilingban nga kita isip mga indibidwal dili makasulbad. Hinoon, adunay praktikal nga mga ganti nga mahimo natong makab-ot isip mga indibidwal, bisan sa panahon diin ang pagkamatarung nagkaubos sa tibuok kalibutan.
Ang ideya gyud sa “mga ganti sa pagkamatarung” usa ka konsepto nga giataki sa kalibutan karon. Ang pagkombinser sa mga tawo sa pagpili sa matarung dugay na nga hagit. “Kay ang kinaiyanhon nga tawo mao ang usa ka kaaway sa Dios” (Mosiah 3:19). Kanunayng adunay “katugbang sa tanan nga mga butang” (2 Nephi 2:11).
Ang kalainan karon kay ang mga madudahon diha sa “dako ug lapad nga gambalay” (1 Nephi 8:31) mas banha, mas mabingkilon, ug dili kaayo matugtanon kaysa bisan unsang panahon sa akong kinabuhi. Sila nagpakita sa pagkunhod sa ilang pagtuo kon, kabahin sa daghang isyu, sila mas nabalaka sa ilang reputasyon sa umaabut kaysa unsay kabubut-on sa Dios. May usa ka panahon diin kadaghanan sa mga tawo nakasabut nga sila pagahukman sumala sa mga sugo sa Dios, dili sa unsay uso nga mga panglantaw o dominanting pilosopiya sa panahon. Ang pipila mas nabalaka nga gibiay-biay sa uban kaysa pagahukman sa Dios.
Ang gubat tali sa maayo ug dautan dili na bag-o. Apan karon misaka ang porsyento sa mga tawo nga nasayop sa pagtuo nga walay moral, matarung nga baruganan diin ang tanang katawhan kinahanglang mosunod.
Bisan pa niana, midaghan gihapon ang matinud-anong mga miyembro sa Ang Simbahan ni Jesukristo sa mga Santos sa Ulahing mga Adlaw. Ang mga miyembro sa Simbahan, lakip sa uban kinsa adunay susama nga mga mithi sa pamatasan, nagpabilin nga matarung bisan pa sa naglibut nga mga pagduhaduha ug pagkawalay pagtuo. Kita nasayud, sama sa gideklarar ni propetang Alma, nga ang “pagkadautan dili mahitabo nga mahimo nga kalipay” (Alma 41:10) ug ang plano sa Amahan alang sa Iyang mga anak usa ka “plano sa kalipay” (Alma 42:8, 16).
Akong tinguha nga motanyag og mga sugyot nga makatabang kaninyo isip indibidwal ug isip pamilya nga mas makasabut ug makakab-ut sa mga ganti sa pagkamatarung.
Ang Ganti sa Pagka-espirituhanon
“Unsaon nako pagpahimutang ang kalibutanong mga problema sa hustong panglantaw samtang naningkamot ko nga molambo sa espirituhanong paagi?”
Ubos gayud kita sa impluwensya sa kalibutan. Ang matag adlaw nga kalibutanong panginahanglan usa gayud ka dakong hagit. Ang katilingban molantaw sa tanan nga ikonsiderar lamang ang kalibutanong mga ganti.
Ang pasiuna sa Doktrina ug mga Pakigsaad naghatag og gibug-aton niini nga problema aron sa pagpasidaan kanato sa mga kakuyaw, naggiya kanato sa pagpangandam ug pagprotektar sa atong kaugalingon karon ug sa umaabut, ug naghatag og importanting ideya kabahin niining hilisgutan: “Sila wala mangita sa Ginoo sa pagpahimutang sa iyang pagkamatarung, apan ang matag tawo naglakaw diha sa iyang kaugalingon nga paagi, ug sama sa hulagway sa iyang kaugalingon nga dios kansang hulagway sama sa kalibutan, ug kansang mga butang ingon niana sa usa ka dios-dios” (tan-awa sa D&P 1:16).
Si Presidente Spencer W. Kimball (1895–1985) mitudlo nga ang mga dios-dios mahimong maglakip sa mga sertipiko, mga nahumang kurso sa pag-eskwela, kabtangan, balay, mga gamit sa balay ug ubang materyal nga mga butang. Siya miingon nga kon atong unahon kining maayo unta nga mga tumong sa paagi nga makapakunhod sa atong pagsimba sa Dios ug makapahuyang sa atong paningkamot sa pag-establisar sa Iyang pagkamatarung ug sa paghimo sa mga buhat sa kaluwasan ngadto sa mga anak sa Amahan nga anaa sa Langit, kita nagmugna og mga dios-dios.1
Usahay ang panglantaw sa kalibutan makapahimo kanato sa pagtutok sa mga isyu nga dili sama ka madanihon sa pagtinguha og dakong bahandi apan bisan pa niana nakapahilayo kana nato sa espirituhanong pasalig.
Daghang katuigan ang milabay gipahibalo ko sa makapaikag nga pasundayag nga adunay pipila ka talagsaong mga eksena. Ang lain-laing eksena makita ubos sa dakong karatula nga nag-ingon, “Kon si Kristo moabut karong gabii, si kinsa Iyang adtuon?” Kon sakto ang akong paghinumdom sa mga hulagway, kini naglangkob sa mosunod nga mga eksena:
-
Usa ka masakiton, tigulang nga babaye nga giatiman sa nurse.
-
Usa ka malipayon nga batan-ong inahan uban sa bag-ong natawo nga bata.
-
Usa ka pamilya nga may gigutom, naghilak nga mga bata.
-
Usa ka adunahan nga pamilya.
-
Usa ka suod apan mapainubsanong pamilya nga may daghang anak nga malipayong nagdungan sa pagpanganta.
Kita nasayud nga kon ang Manluluwas mobalik pag-usab, kita dili masayud sa adlaw o sa oras. Kita usab nasayud nga isip mga Kristiyano, kita nag-atiman sa mga kabus ug sa nanginahanglan ug sa balo ug sa ilo. Ang karatula mas sakto unta kon kini mabasa nga, “Kon si Kristo moabut karong gabii, kinsa ang andam nga mosugat Kaniya?”
Naghunahuna usab ko nga ang mga eksena nagpakita kanato sa pisikal nga kondisyon sa mga tawo apan dili sa ilang espiritwal nga kondisyon ug pasalig kang Kristo.
Ang sinugdanang punto sa pagpamalandong sa atong kinabuhi ug pasalig ngadto sa Manluluwas ug sa Iyang ebanghelyo mao ang bunyag. Gawas sa bag-ong mga kinabig ug sa mga bata, ang atong bunyag nahitabo dugay na kaayo.
Ang bantugang propeta nga si Alma larinong namulong kanato sa dihang siya misulti: “Ug karon tan-awa, ako moingon nganha kaninyo, akong mga kaigsoonan, kon kamo nakasinati og usa ka kausaban sa kasingkasing, ug kon kamo mibati sa pag-awit sa awit sa matubsanon nga gugma, ako mangutana, kamo mibati ba karon sa mao?” (Alma 5:26).
Dayon si Alma nagpadayon sa iyang mensahe, nga tukma sa atong panahon karon. Siya mahinungdanong nangutana sa mga Santos, kon sila mamatay, andam na ba sila nga makigkita sa Dios. Dayon si Alma mihatag og gibug-aton sa upat ka kinaiya nga gikinahanglan nato aron mahimong walay sala sa atubangan sa Dios:
Una, “[kita ba] dihay igo nga pagpaubos?” Sa laing pagkasulti, nagpasabut kini sa kinahanglanon sa pagbunyag—magpaubos sa atong kaugalingon ug magbaton og mapainubsanon nga kasingkasing ug mahinulsulong espiritu.
Ikaduha, “[kita] gihuboan ba sa garbo?” Si Alma nagpasidaan batok sa pagyatak sa Usa nga Balaan ilawom sa atong mga tiil ug pagpanghambog diha sa garbo—gitinguha sa atong kasingkasing ang kalibutanong mga butang ug nagtuo nga mas maayo pa kaysa uban.
Ikatulo, kita ba “hubo sa kasina?” Alang niadtong adunay daghang mga panalangin apan wala mobati nga mapasalamaton niini tungod kay sila nagtutok sa unsay anaa sa uban, ang kasina makadaut gayud. Ang “kasina sa estilo sa kinabuhi”2 migrabe samtang ang ka sikat ug kaadunahan mipuli sa hugot nga pagtuo ug pamilya isip mga mahinungdanong tinguha sa kadaghanan sa katilingban.
Ikaupat, kita ba mibugal-bugal o milutos sa atong mga kaigsoonan? Sa kalibutan karon ato kining gitawag nga pagdaug-daog (tan-awa sa Alma 5:27–30, 53–54).
Aduna pa bay mas mahinungdanon nga isyu sa atong panahon karon kaysa niining mensahe kabahin sa pagkamapainubsanon, garbo, kasina, ug pagpanggukod? Ang gidebatehan pag-ayo sa tibuok kalibutan mao ang kabahin sa temporal nga komon nga mga isyu sa ekonomiya. Apan gamay lang ang panaghisgut kabahin sa pagbalik ngadto sa Kristohanong mga baruganan nga nakatutok sa pagpangandam sa pagsugat sa Dios ug sa kahimtang sa atong mga espiritu. Kinahanglan nga atong itutok ang atong kinabuhi ug pun-an ang paghatag og gibug-aton sa espirituhanong mga butang.
Ang Ganti sa Matarung nga mga Pamilya
“Maayo ba nga atong padak-on ang atong pamilya sa dapit diin adunay pipila lang ka miyembro sa Simbahan ug kita gipalibutan og daghang dautan, panagbingkil, ug oposisyon sa pagkamatarung?”
Ang akong asawa, si Mary, ug ako aduna niining kabalaka samtang nagpadako mi sa among mga anak sa San Francisco Bay Area sa California, USA, sa ulahing bahin sa mga 1960. Ang populasyon sa mga Santos sa Ulahing mga Adlaw gamay pa kaayo. Bisan tuod daghan sa mga tawo dinhi mga maayo, ang Bay Area nahimong pundukanan sa mga tiggamit og druga ug sa tanang matang nga buhat sa imoral ug sala.
Ang kausaban sa katilingban igo nga rason nga ang nabalaka nga presidente sa stake nangutana sa kapangulohan sa Simbahan kon angay ba niyang awhagon ang mga miyembro sa Simbahan nga magpabilin sa Bay Area. Si Elder Harold B. Lee (1899–1973), kaniadto usa pa ka senior nga sakop sa Korum sa Napulog Duha ka mga Apostoles, mao ang gitudlo sa pagtubag sa isyu. Siya mipasabut nga ang Ginoo wala madasig sa pagtukod og usa ka templo sa among dapit aron lamang biyaan sa mga miyembro. Ang iyang tambag alang kanamo yano apan tiunay:
-
Pagtukod sa Zion diha sa among mga kasingkasing ug mga panimalay.
-
Mahimong usa ka kahayag niadtong nagpalibut kanamo.
-
Pagtutok sa mga ordinansa sa templo ug sa mga baruganan nga gitudlo didto.
Among gihangop ang tambag ni Elder Lee ug naningkamot sa pagsunod niini sa among pamilya.
Sa pagtukod og Zion sa atong kasingkasing ug panimalay, kita kinahanglan nga mohatag og gibug-aton sa relihiyusong pagtamud diha sa panimalay pinaagi sa pagbuhat og matag adlaw nga pag-ampo sa pamilya ug pagtuon sa kasulatan ug paghimo og family home evening matag semana. Niini nga konteksto kita makatudlo ug makabansay sa atong mga anak. Ato kining buhaton uban sa gugma ug pagkamabination, maglikay sa dili angay nga pagsaway sa atong mga anak ug kapikas.
Bisan asa pa kita nagpuyo ug gani atong gibuhat ang tanan nga matarung, pipila sa atong mga anak tingali mohimo og sayop nga mga desisyon nga modala ngadto sa gidili nga mga dalan. Tungod niini, importante nga tabangan nato ang atong mga batan-on nga mag-andam daan kon unsay ilang isulti o buhaton kon ang uban mopakita og dili sakto o imoral nga pamatasan.
Ang among mga anak nag-eskwela sa mga eskwelahan diin adunay duha o tulo lang ka LDS nga mga bata. Sa pagsugod sa tuig sa pag-eskwela ug sa dili pa ang mga kalihokan sa eskwelahan, among gihisgutan sa among family home evening ang saktong tubag kon sila maanaa sa delikado nga mga sitwasyon. Amo silang gipangutana kon unsay ilang itubag sa ilang mga higala kinsa mosulti kanila, “Ayaw pagdrama-drama, gibuhat kini sa tanan,” “Ang inyong ginikanan dili masayud,” o “Ang kausa lang dili makaapekto.”
Among gihisgutan ang among tulubagon ngadto sa Ginoo.
Among gitudlo nga kita nagsunod sa ehemplo ni Kristo kon kita tarung og sininaan, naggamit og limpyo ug angay nga pinulongan, ug maglikay sa pornograpiya, nga karon angay itudlo sa mga bata sa Primary aron sila makabaton og putli nga kinabuhi.
Among gihisgutan ang kabahin ni Jose sa Ehipto, kinsa milayas sa dihang siya gitintal sa asawa ni Potiphar (tan-awa sa Genesis 39:7–12).
Ang tanan namong mga anak adunay kasinatian diin kining pagpangandam mahinungdanon, apan sa kasagaran ang ilang mga higala mipanalipod kanila tungod kay sila nasayud sa ilang mga baruganan ug pagtuo.
Sa dihang ang among anak nga babaye, si Kathryn, mitawag sa iyang inahan human mipalayo namo aron moeskwela sa kolehiyo, si Mary kanunay mosulti kaniya sa mga butang nga iyang naganahan pag-ayo kabahin sa Manluluwas. Kanunay gamiton ni Mary ang Iyang ehemplo ug kinaiya aron pagtabang sa problema nga gihisgutan ni Kathryn.
Nagtuo ko nga kita makapalambo og matarung nga mga anak sa bisan asang dapit sa kalibutan kon sila adunay lig-on nga pundasyon diha kang Jesukristo ug sa Iyang ebanghelyo. Si Nephi mihulagway sa pagtudlo sa iyang pamilya ug katawhan, nag-ingon, “Kami naghisgot kang Kristo, kami nalipay diha kang Kristo, kami nagsangyaw kang Kristo, kami nanagna kang Kristo, ug kami nagsulat sumala sa among mga panagna, nga ang among mga anak mahimo nga masayud sa unsa nga tinubdan sila mahimo nga mangita alang sa kapasayloan sa ilang mga sala” (2 Nephi 25:26).
Kon ato kining buhaton, kon ang atong mga anak mohimo og sayop nga mga pagpili, sila masayud nga ang tanan wala mawala ug sila makakaplag sa dalan balik sa balay. Gusto nakong ipaniguro kaninyo nga kamo ug ang inyong pamilya mapanalanginan samtang kamo maningkamot sa paglig-on sa matag miyembro sa inyong pamilya pinaagi sa hugot nga pagtuo diha kang Jesukristo.
Kon atong sundon ang tambag ni Elder Lee nga mahimong kahayag niadtong nagpalibut kanato, dili kita mahimong magpakaaron-ingon kon si kinsa kita. Ang atong pamatasan kinahanglang mopakita sa atong mga mithi ug pagtuo. Kon angay, kita kinahanglang moapil sa politikanhon nga mga kalihokan.
Ang pagkinabuhi nga angay alang sa rekomend sa templo, pagdawat sa mga ordinansa sa templo, ug pagkamatinud-anon sa atong mga pagkigsaad naghatag kanato og pokus ug panglantaw nga magpabilin diha sa dalan sa pakigsaad. Kon ang atong mga batan-on takus nga magkinabuhi aron sa pagpahigayon og mga bunyag alang sa patay, ang ilang kinabuhi matarung.
Kinahanglan nga atong itutok ang atong kusog sa paglig-on sa atong mga pamilya pinaagi sa paghisgot, paglipay, pagsangyaw, ug pagpanagna kang Kristo aron kita makatagamtam sa ganti sa matarung nga pamilya ug mahimong mahangturong nga pamilya.
Alang niadtong wala maminyo apan matarung nga nagkinabuhi, ang atong doktrina makapaniguro: “Ang matinud-anong mga miyembro kansang mga kahimtang wala motugot kanilang makadawat sa mga panalangin sa mahangturong kaminyoon ug pagkaginikanan niining kinabuhia makadawat sa tanang gisaad nga mga panalangin sa kahangturan, samtang gihuptan nila ang mga pakigsaad nga ilang gihimo ngadto sa Dios.”3
Ang Ganti sa Kalipay
“Unsay angay nakong ihatag sa akong mga anak aron magmalipayon ug magmalampuson sa kinabuhi?”
Si Lucifer nagmugna og peke o ilusyon sa kalipay nga wala mahiuyon sa pagkamatarung ug makapahisalaag kanato kon kita dili magmatngon. Daghan sa atong mga problema karon nahitabo tungod ang kalibutan nagpakatap og sayop nga kahulugan sa kalipay. Kita nasayud gikan sa Basahon ni Mormon nga kini nga problema anaa sa tanan nga mga henerasyon. Kita usab nasayud sa mga panalangin nga nagagikan sa pagsunod sa mga kasugoan.
Si Haring Benjamin misulat, “Ako nagtinguha nga kamo kinahanglan maghunahuna sa bulahan ug sa malipayon nga kahimtang niadto nga naghupot sa mga sugo sa Dios. Kay tan-awa, sila bulahan sa tanan nga mga butang, sa temporal ug sa espirituhanon; ug kon sila magpabilin nga matinud-anon hangtud sa katapusan sila pagadawaton ngadto sa langit, nga pinaagi niana sila mahimo nga mopuyo uban sa Dios diha sa usa ka kahimtang nga walay katapusan ang kalipay. O hinumdumi, hinumdumi nga kini nga mga butang tinuod; kay ang Ginoong Dios namulong niini” (Mosiah 2:41).
Sulod sa daghang katuigan ako nagsunod og usa ka proyekto sa pagsiksik nga gisugdan niadtong mga 1930. Sa sinugdanan, ang proyekto naglakip sa 268 ka mga lalaki sa usa sa pinakamaayo nga unibersidad kinsa regular nga gitun-an ang ilang kinabuhi. Sa wala madugay, ang mga babaye nahimong kabahin sa proyekto. Ang pagtuon milanat og mga 70 ka tuig. Ang orihinal nga tumong sa pagtuon mao ang pagkasayud kutob sa mahimo kabahin sa kalampusan ug kalipay.
Ang pagtuon nagpakita nga ang mga college entrance score ug grade average dili makatino sa kalampusan o kalipay sa ulahing bahin sa kinabuhi. Apan usa ka dapit diin may kalabutan pag-ayo mao ang kalipay sa bata pa uban sa pamilya. Ang malipayon, malampusong mga hamtong kasagaran mitaho nga ang ilang inahan dayag nga mosulti sa ilang paghigugma ug pagpangga ug dili mogamit og grabeng pagdisiplina. Ang ilang mga ginikanan nagpakita og pagpangga sa usag usa ug anaa ug maduolan sa ilang mga anak, diin sila adunay mainiton ug mapahayagon sa emosyonal nga paagi nga pakigrelasyon. Ang ginikanan nagmugna og lig-ong palibut sa pamilya ug gituohan nga nagtahud sa kabubut-on sa ilang mga anak.
Usa ka panapos nga basahon sa proyekto nga gimantala niadtong 2012 mitaho: “Daghang mga sukdanan sa kalampusan sa tibuok kinabuhi ang nakita, nga dili kaayo tungod sa pinansyal ug sosyal nga mga bintaha sa pagkabata apan mas tungod sa pinangga ug puno sa gugma nga pagkabata.” Ang mainitong kasinatian sa pagkabata mas may kalabutan sa pagkamalampuson kaysa kaintelihente, kahimtang sa panginabuhi, o sa pagka-atleta. Nakita usab diha sa proyekto nga “ang maayo nga mga panghitabo sa pagkabata modeterminar pag-ayo sa umaabut kaysa dili maayo nga mga panghitabo.”4
Ang proyekto sa kinatibuk-an nagpasabut nga bisan kon aduna pay lisud nga mga hagit ug adunay mga bati kaayo nga panghitabo, ang mga bata lig-on, ug ang pagsalig nga gimugna sa mahigugmaong relasyon sa ginikanan, ilabi na sa inahan, moresulta sa mahangturon, tibuok kinabuhi nga kalipay. Ang nakapaikag kanako, apan wala ko ikatingala, mao nga ang proyekto hingpit nga nahiuyon kon unsay gitudlo sa kasulatan ug sa Simbahan kabahin sa pamilya. Ang Simbahan naghatag og gibug-aton sa family home evening, pag-ampo sa pamilya, pagpadayag og gugma, panag-uban sa pamilya, ug mga tradisyon sa pamilya, nga mao ang mga matang sa kalihokan nga gipasabut sa proyekto nga makapahimo og malipayon, malampusong mga hamtong.
Gisugdan ni Nephi ang Basahon ni Mormon pinaagi sa pagpadayag og pasalamat alang sa “mga matarung nga ginikanan” (1 Nephi 1:1), apan ang tinuod nga leksyon mao nga kita ang modeterminar kon unsa kita nga matang sa ginikanan nga mamahimo aron ang atong kaliwatan malipayong motaho nga sila usab natawo sa mga matarung nga ginikanan.
Ang pinakaimportante nga butang nga inyong mahimo mao ang pagsiguro nga ang inyong mga anak ug kadtong inyong giamuma nasayud nga sila inyong gihigugma. Ang gugma mao ang importante nga sangkap sa kalipay.
Ang Ganti sa Pag-uswag dinhi sa Yuta
“Ang among pamilya wala kaayo molampos sa materyal nga mga butang. Tungod ba kay dili igo ang among pagkamatarung?”
Ang kasulatan klaro nga ang pagsunod sa mga kasugoan makapauswag kanato dinhi sa yuta. Apan ipaniguro ko kaninyo nga ang pag-uswag dinhi sa yuta dili ideterminar sa kadako sa inyong natigom sa bangko. Kini adunay mas labaw pa nga kahulugan kay niana.
Namulong ngadto sa iyang anak nga si Helaman, si propetang Alma nagtudlo, “tungod kay ikaw maghupot sa mga sugo sa Dios ikaw mouswag dinhi sa yuta; ug ikaw angay nga masayud usab, nga tungod kay ikaw wala maghupot sa mga sugo sa Dios ikaw isalikway gikan sa iyang atubangan” (Alma 36:30).
Basi niini, ang pagbaton sa Espiritu sa atong kinabuhi mao ang pinakaimportante aron sa pag-uswag dinhi sa yuta. Kon kita mosunod sa mga sugo, kita adunay pihong mga saad (tan-awa sa Mga Taga-Efeso 6:1–3). Ang Seksyon 89 sa Doktrina ug mga Pakigsaad, sama pananglit, nagsaad nga pinaagi sa pagsunod sa Pulong sa Kaalam, kita makatagamtam og mga panalangin sa panglawas ug dako nga mga bahandi sa kahibalo.
Ang paglahi sa usa ka elemento sa Pulong sa Kaalam, paglikay sa alkohol, nagtudlo nato og daghang butang. Ang pagtuon sa tibuok kinabuhi sa tawo nga akong gihisgutan kaganina nagpakita nga ang abuso nga paggamit sa alkohol nakaapekto sa usa sa matag tulo ka pamilya sa Amerika, maoy rason sa bayente singko porsyento sa tanang mga pag-admit sa mga ospital, ug dakong hinungdan sa kamatayon, diborsyo, pagkadaut sa panglawas, ug pagkamenos sa makab-ut.
Ang dugay nga pagtuon sa aktibong mga miyembro sa Simbahan sa California nagpakita nga ang mga babaye mabuhi pa og dugang 5.6 ka tuig ug ang mga lalaki dugang 9.8 ka tuig ikompara sa dili miyembro nga mga babaye ug lalaki sa U.S. Ang mga doktor nga nagpahigayon sa pagtuon nagpasabut nga ang usa sa rason mao ang pagsunod sa Pulong sa Kaalam. Ang pagsunod sa Pulong sa Kaalam nakapahimo kanato nga mouswag dinhi sa yuta.5
Sa akong pakig-istorya uban ni Presidente Gordon B. Hinckley (1910–2008) atol sa pagsakay sa eroplano padulong sa pagpahinungod og templo, siya malipayong mitaho nga ang Simbahan adunay pundo nga mapadaghan ang mga templo tungod kay ang mga Santos sa Ulahing mga Adlaw miuswag sa yuta. Isip matinud-anong mga tigbayad sa ikapulo, sila nakasangkap sa mga kapanguhaan sa pagtukod og mga templo.
Ang pag-uswag ug pagkaadunahan dili kanunay susama og kahulugan. Ang mas maayong kahulugan sa pag-uswag sa yuta sumala sa ebanghelyo mao ang pagbaton og igo alang sa atong mga panginahanglanon samtang nagtagamtam sa daghang panalangin sa Espiritu sa atong kinabuhi. Kon kita nagsangkap alang sa atong pamilya ug naghigugma ug nagserbisyo sa Manluluwas, kita makatagamtam sa ganti nga makabaton sa Espiritu ug mag-uswag dinhi sa yuta.
Ang Ganti sa Kalinaw
Ang pinakadakong saad sa ganti sa pagkamatarung klarong gihan-ay diha sa Doktrina ug mga Pakigsaad 59:23: “Apan hibaloi nga siya kinsa nagbuhat og mga buluhaton sa pagkamatarung makadawat sa iyang ganti, gani ang kalinaw niini nga kalibutan, ug kinabuhi nga dayon diha sa kalibutan nga umaabut.”
Sobra na sa 35 ka tuig ang milabay, si Presidente Kimball mitudlo nga dagkong kausaban ang mahitabo sa Simbahan tungod kay daghang “buotang mga babaye … ang mapaduol sa Simbahan sa tumang kadaghan.” Siya mideklarar, “Kini mahitabo sa kahimtang nga ang mga babaye sa Simbahan mopakita sa pagkamatarung ug sa ilang pagkamaayo og abilidad sa pagpahayag sa ilang kaugalingon ug … makita nga talagsaon ug lahi—sa malipayong paagi—gikan sa mga babaye sa kalibutan.”6
Kini sa tinuoray nahitabo ug magpadayon sa umaabut.
Ang Ginoong Dios sa tinuoray usa ka adlaw ug taming ug mohatag og grasya ug kahimayaan. Walay maayong butang ang ihikaw niadtong nagbuhat og matarung (tan-awa sa Salmo 84:11). Akong pag-ampo nga kamo moani sa mga ganti sa pagkamatarung samtang kamo matinud-anong nagsunod sa atong Ginoo ug Manluluwas nga si Jesukristo.
Kon kita dili magbantay, ang kalibutan makapahimo kanato sa pagtutok sa mga butang nga makapalayo kanato sa lawom nga espirituhanong pasalig.
Ang kalibutan nagtutok sa temporal nga komon nga mga isyu sa ekonomiya, apan kita kinahanglang motutok sa espirituhanong mga butang.
Ang gugma mao ang importante nga sangkap sa kalipay niining kalibutan.
Ang tinuod nga pag-uswag niining kalibutan moabut pinaagi sa pagbalanse sa pagsangkap sa atong mga pamilya samtang naghigugma ug nagserbisyo usab sa Manluluwas.
Paghulagway sa litrato pinaagi sa LiudmylaSupynska/iStock/Thinkstock; paghulagway sa babaye pinaagi sa Stockbyte/Thinkstock; paghulagway sa humay pinaagi sa ririe777/iStock/Thinkstock
paghulagway pinaagi sa Stockbyte/Thinkstock; Paghulagway sa litrato pinaagi ni Colin Ligertwood
Paghulagway sa litrato pinaagi ni Colin Ligertwood; paghulagway pinaagi sa Stockbyte/Thinkstock
Paghulagway pinaagi sa Stockbyte/Thinkstock; paghulagway sa litrato pinaagi sa Massonstock/iStock/Thinkstock