Unsa ang Atong Gituohan
Balaan ang Organisasyon sa Simbahan
Ang bag-ong mga miyembro sa Simbahan kanunay makadungog og mga pulong nga wala pa nila madungog kaniadto: mga yawe sa priesthood, pag-set apart, pagpandong sa mga kamot diha sa ulo, bunyag alang sa mga patay, Mutual, Relief Society, ug uban pa. Ug sila makadungog sa pamilyar nga mga pulong nga gigamit sa dili pamilyar nga mga pamaagi: deacon, patriarch, bishop, mga magtatambag, sakrament, calling, release, pagpamatuod, ordinansa, ug daghan pa.
Kon inyong makaplagan ang inyong kaugalingon nga anaa niana nga sitwasyon, ayaw kabalaka. Kon magsige na mo og simba, magtuon sa kasulatan ug mga leksyon, ug makig-interact sa mga miyembro sa Simbahan, mas inyong masabtan kining mga pulunga. Sa pagkakaron, ayaw pagduha-duha sa pagpangutana sa mga miyembro sa inyong ward o branch; ilang ikalipay ang pagpasabut kaninyo sa bisan unsang butang nga naglibog mo.
Ang mga pulong nga sama niini importante kay kini nagpakita sa doktrina, polisiya, buluhaton, ug organisasyon sa Simbahan, nga gikan sa kasulatan ug gipadayag ngadto sa modernong mga propeta. Ang Manluluwas naggiya sa Iyang Simbahan karon pinaagi sa pagpadayag sa Iyang kabubut-on ngadto sa Unang Kapangulohan (ang Presidente sa Simbahan ug sa iyang duha ka magtatambag) ug sa Korum sa Napulog Duha ka mga Apostoles. Ang Simbahan giorganisar sa samang paagi nga giorganisar kini sa Ginoo sa dihang anaa pa Siya dinhi sa yuta (tan-awa sa Mga Artikulo sa Hugot nga Pagtuo 1:6). Sama sa panahon diha sa biblia, kita adunay mga propeta, mga apostoles, mga sakop sa Seventy, mga misyonaryo kinsa magtrabaho nga tinagurha, ug mga bishop ug uban pang lokal nga mga lider.
Ang tanang nagserbisyo sa Simbahan mga boluntaryo. Sila gi-call (gihangyo sa pagserbisyo) pinaagi sa inspirasyon sa ilang mga lider. Moabut ang panahon nga kamo hatagan og calling—usa ka responsibilidad, usa ka oportunidad sa pagserbisyo. Samtang andam ninyo kining dawaton ug buhaton kini kutob sa inyong mahimo, ang Ginoo mopanalangin sa inyong mga paningkamot sa pagserbisyo sa Iyang mga anak. Bisan unsa pa ang inyong background, kamo makahatag og bililhong espirituhanong mga gasa. Isip miyembro sa Simbahan, kamo kabahin sa “lawas ni Kristo” (tan-awa sa 1 Mga Taga-Corinto 12). Ang inyong kontribusyon importante sa pagpadayon sa buluhaton sa Simbahan.
Mga paghulagway pinaagi ni David Habben
Ang mga lider sa inyong ward nagserbisyo isip kapangulohan (usa ka presidente ug duha ka magtatambag):
Ang bishop ug iyang duha ka magtatambag moporma sa bishopric ug magdumala sa ward.
Ang kapangulohan sa Relief Society nagserbisyo sa mga babaye sa ward ug nagtabang sa paglig-on sa ilang mga pamilya.
Ang kapangulohan sa elders quorum ug ang mga lider sa high priests group nagserbisyo sa mga lalaki sa ward ug nagtabang sa paglig-on sa ilang mga pamilya.
Ang kapangulohan sa Primary nagserbisyo sa mga bata, ug ang kapangulohan sa Young Men ug Young Women nagserbisyo sa mga batan-on nga nag-edad og 12-18.
Ang kapangulohan sa Sunday School nagdumala sa mga klase sa Sunday School ug nagtabang sa pagpalambo sa pagkat-on ug pagtudlo sa ebanghelyo sa ward.