ដោយសារតែ យ៉ូសែប
ស្វែងយល់ពីវិធីប្រាំមួយយ៉ាងដែលជីវិតរបស់អ្នកផ្លាស់ប្ដូរ ( ឬអាច ) ដោយសារតែព្យាការីយ៉ូសែបស្ម៊ីធ ។
យ៉ូសែប ស៊្មីធ បានស្លាប់ជាង 170 ឆ្នាំមុនមកហើយ ។ លោករស់នៅបានតែ 38 ឆ្នាំ លោកបានចំណាយពេលជាច្រើននៃពេលវេលានោះ នៅកន្លែងជាច្រើនដែលអ្នកប្រហែលជានឹងមិនអាចរកឃើញ លុះត្រានៅលើផែនទីដែលលម្អិតបំផុត ។ ហើយអ្នកប្រហែលជាបានដឹងពីអ្វីៗជាច្រើនដែលលោកបានធ្វើនៅក្នុងជីវិតរបស់លោក ។ ប៉ុន្តែ តើអ្នកធ្លាប់បានគិតអំពីរបៀបដែលវាបានមានឥទ្ធិពលលើអ្នកដែរឬទេ ? ខណៈពេលដែលវិធីទាំងនោះមានច្រើនរាប់មិនអស់ អ្នកអាចចាប់ផ្ដើមជាមួយនិងវិធីទាំងប្រាំមួយនេះ ។
ដោយសារតែយ៉ូសែប ស៊្មីធ ៖
1. អ្នកយល់ថាព្រះ និង ព្រះយេស៊ូវគ្រីស្ទ គឺជាតួអង្គណាពិតប្រាកដ ។
ទោះបីមិនដោយសារយ៉ូសែប ស៊្មីធ ក៏អ្នកអាចនៅតែជឿលើព្រះ ជាព្រះវរបិតា និងលើព្រះយេស៊ូវគ្រីស្ទដែរ ។ អ្នកអាចមានទីបន្ទាល់ពីព្រះគម្ពីរបរិសុទ្ធ ។ ប៉ុន្តែ សូមគិតពីរបៀបដែលការយល់ដឹងរបស់អ្នកកាន់តែជ្រៅជ្រះ និងកាន់តែប្រសើរជាងមុនដោយសារតែការស្ដារឡើងវិញរបស់ យ៉ូសែប ស៊្មីធ — សាក្សីយ៉ាងក្លាហាន បញ្ជាក់ពីគម្ពីរមរមន គោលលទ្ធិនិងសេចក្ដីសញ្ញា និងមុក្ដាដ៏មានតម្លៃមហិមា ។ ឧទាហរណ៍ អ្នកដឹងពីអ្វីដែលមនុស្សភាគច្រើនមិនដឹង ៖ ថាព្រះសង្គ្រោះបានមានព្រះជន្មរស់ឡើងវិញ ហើយលេចនៅចំពោះមុខជនជាតិអាមេរិក — បញ្ជាក់នៅក្នុងពាក្យរបស់ទ្រង់ថាទ្រង់គឺជា « ព្រះនៃអ៊ីស្រាអែល [ និងជា ] ព្រះនៃផែនដីទាំងមូលតែមួយអង្គគត់ » ( នីហ្វៃទី 3 11:14 ) ។
សូមគិតពីរបៀបដែលទីបន្ទាល់នៃព្រះវរបិតាសួគ៌ និងនៃព្រះយេស៊ូវគ្រីស្ទរបស់អ្នកត្រូវបានពង្រឹងដោយសាក្សីដ៏មានអនុភាព នៃពួកព្យាការីដូចជានីហ្វៃ អាលម៉ា និងមរ៉ូណៃ — នោះមិនចាំបាច់និយាយអំពីយ៉ូសែប ស៊្មីធ ផងដែលបានប្រកាសថា « ទ្រង់មានព្រះជន្មរស់នៅ ! ដ្បិតយើងខ្ញុំបានឃើញទ្រង់ គង់នៅខាងស្ដាំព្រហស្តនៃព្រះ » ( គ និង ស 76:22–23 ) ។ នៅថ្ងៃដែលជំនឿនៅលើព្រះ និងព្រះយេស៊ូវគ្រីស្ទត្រូវបានផ្ចាញ់ផ្ចាល ហើយត្រូវបានបោះបង់ចោលជារឿយៗ វាគឺជាពរជ័ដើម្បីមានពន្លីបន្ថែមនេះ ។
2. អ្នកដឹងថាអ្នកជាកូនចៅរបស់ព្រះ — ហើយអ្នកដទៃក៏ដូច្នេះដែរ ។
ប្រហែលការពិតដែលសំខាន់បំផុតដែល យ៉ូសែប ស៊្មីធបានស្ដារឡើង គឺជាការពិតអំពីទំនាក់ទំនងរបស់យើងជាមួយព្រះ ។1 ទ្រង់ពិតជាព្រះបិតារបស់យើងមែន ។ តើអ្នកធ្លាប់ឈប់ ដើម្បីនឹងសញ្ជឹងគិតអំពីអ្វីដែលហូរចេញពីការពិតនោះទេ ? វាបានផ្លាស់ប្ដូរទស្សនៈដែលអ្នកមើលឃើញខ្លួនឯង ៖ ដោយមិនគិតពីអ្វីដែលលោកិយគិតពីអ្នក អ្នកដឹងថាអ្នកគឺជាបុត្រជាទីស្រឡាញ់របស់ព្រះ ដោយមានគុណសម្បត្តិរបស់ទ្រង់នៅក្នុងខ្លួនអ្នក ។ វាផ្លាស់ប្ដូរទស្សនៈរបស់អ្នកក្នុងការមើលទៅអ្នកដទៃ ៖ រំពេចនោះអ្នករាល់គ្នា — អ្នករាល់គ្នា — គឺជាបងប្អូនប្រុសស្រីរបស់អ្នក ។ វាផ្លាស់ប្ដូរទស្សនៈដែលអ្នកមើលទៅជីវិតផ្ទាល់ ៖ ក្ដីអំណររបស់វា និងការសាកល្បងទាំងអស់ គឺជាផ្នែកនៃផែនការរបស់ព្រះវរបិតាសួគ៌ ដើម្បីជួយអ្នកប្រែក្លាយដូចជាទ្រង់ ។ វាមិនមែនជាអ្វីដែលមិនល្អ ដែលអ្នកអាចច្រៀងនៅក្នុងថ្នាក់កុមារនោះទេ !2
3. គ្រួសារអ្នកអាចរស់នៅជាមួយគ្នាអស់កល្បជានិច្ច ។
ហេតុអ្វីបានជាមនុស្សជាច្រើនភាន់ច្រឡំ អំពីសារៈសំខាន់នៃអាពាហ៍ពិពាហ៍ និងក្រុមគ្រួសារ ? ប្រហែលជាពួកគេមិនដឹងពីគោលលទ្ធិ ដែលបានស្ដារឡើងវិញដោយយ៉ូសែប ស្ម៊ីធ ថាអាពាហ៍ពិពាហ៍ និងក្រុមគ្រួសារ គឺត្រូវបានតែងតាំងដោយព្រះ ហើយមានន័យថារស់នៅជាមួយគ្នាអស់កល្បជានិច្ច ( សូមមើល គ និង ស 49:15; 132:7 ) ។ ប្រពៃណីទាំងនេះវាមិនគ្រាន់តែជាទង្វើដែលមនុស្សបង្កើតឡើង ដែលហួសពីសង្គមឡើយ — វាជាផ្នែកមួយនៃបញ្ជាដ៏អស់កល្បជានិច្ចនៃស្ថានសួគ៌ ។ ហើយសូមអរគុណចំពោះកូនសោរបព្វជិតភាព និងពិធីបរិសុទ្ធនៅក្នុងព្រះវិហារបរិសុទ្ធ ដែលបានស្ដារឡើងវិញតាមរយៈយ៉ូសែប ស៊្មីធ ក្រុមគ្រួសារដ៏អស់កល្បរបស់អ្នកអាចចាប់ផ្ដើមនៅលើផែនដីនេះ ។
4. អ្នកមានសិទ្ធចូលទៅកាន់បព្វជិតភាព និងពរជ័យរបស់បព្វជិតភាព ។
ដោយសារព្រះបានស្ដារបព្វជិតភាពរបស់ទ្រង់ឡើងវិញតាមរយៈយ៉ូសែប ស៊្មីធ អ្នកអាចទទួលបុណ្យជ្រមុជទឹក និងទទួលយកអំណោយទាននៃព្រះវិញ្ញាណបរិសុទ្ធ ។ អ្នកអាចស្វែងរកពរជ័យបព្វជិតភាពនៃការប្រោសឲ្យជា ការលួងលោម និងការដឹកនាំ។ អ្នកអាចធ្វើសេចក្ដីសញ្ញាដ៏ពិសិដ្ឋដែលចងភ្ជាប់អ្នកនឹងព្រះ ។ ហើយអ្នកអាចរំឭកសេចក្ដីសញ្ញារបស់អ្នកសារជាថ្មី នៅរៀងរាល់សប្ដាហ៍ពេលអ្នកទទួលទានសាក្រាម៉ង់ ។ តាមរយៈពិធីបរិសុទ្ធទាំងឡាយនៃបព្វជិតភាព អំណាចនៃព្រះ ចូលមកក្នុងជីវិតរបស់អ្នក ( សូមមើល គ និង ស 84:20–21 ) ។ គ្មានអ្វីនឹងអាចធ្វើទៅបានដោយគ្មានកិច្ចការដែលសម្រេចបានតាមរយៈយ៉ូសែប ស៊្មីធឡើយ ។
5. អ្នកមានសេរីភាពពីការញៀននឹងសារធាតុគ្រោះថ្នាក់ទាំងឡាយ ។
ឬយ៉ាងហោចណាស់អ្នកអាចមានសេរីភាព បើអ្នកគោរពតាមវិវរណៈដែលយ៉ូសែប បានទទួលនៅក្នុងឆ្នាំ 1833 — ជាច្រើនឆ្នាំមុនពេលដែលថ្នាំជក់ត្រូវបានបញ្ជាក់ពីគ្លីនិក ថាវាបង្កឲ្យមានជម្ងឺមហារីកសួត ហើយគ្រឿងស្រវឹងត្រូវបានតភ្ជាប់ទៅនឹងជម្ងឺថ្លើមទៅទៀត ។ ពេលអ្នកមានព្យាការីបង្ហាញពីប្រាជ្ញានៃព្រះ តើហេតុអ្វីរង់ចាំប្រជ្ញានៃលោកិយដើម្បីតាមឲ្យទាន់វិញ ។ ច្បាប់សុខភាពបង្ហាញថាព្រះមិនត្រឹមតែយកព្រះទ័យទុកដាក់លើព្រលឹងយើងប៉ុណ្ណោះទេ តែទ្រង់ក៏យកព្រះទ័យទុកដាក់ដល់រាងកាយយើងផងដែរ ( សូមមើល គ និង ស 89 ) ។ ទីបំផុត ដូចវិវរណៈចំពោះយ៉ូសែប ស្ម៊ីធត្រូវបានបើកបង្ហាញឡើង ការទទួលរូបរាងកាយធ្វើឲ្យយើង មានលក្ខណៈសម្បត្តិកាន់តែច្រើនឡើង — ពុំមែនកាន់តែតិចនោះទេ — ដូចជាព្រះវរបិតាសួគ៌យើង ដែលមានរូបកាយជាសាច់និងឆ្អឹងដែរ ( សូមមើល គ និង ស 130:22 ) ។
6. អ្នកអាចដឹងពីការពិតសម្រាប់ខ្លួនឯងតាមរយៈព្រះវិញ្ញាណបរិសុទ្ធ ។
ពេលដែលយ៉ូសែប ដែលមានវ័យក្មេងបានឈានទៅក្នុងព្រៃពិសិដ្ឋនៅក្នុងឆ្នាំ 1820 ជំនឿជាទូទៅក្នុងចំណោមក្រុមជំនុំជាច្រើន គឺថាវិវរណៈជារឿងពីបុរាណប៉ុណ្ណោះ ។ ការនិមិត្តដំបូងរបស់យ៉ូសែបស្ម៊ីធ បានបង្ហាញថាជំនឿនោះខុស ។ ស្ថានសួគ៌បើកចំហរ — មិនតែចំពោះពួកព្យាការីទេ ។ អ្នកដែលមានសំណួរ អាចទទួលបានចម្លើយតាមរយៈការបន្ទាបខ្លួន និងព្យាយាមស្វែងរក ( សូមមើល គ និង ស 42:61; 88:63 ) ។ ឧទាហរណ៍ អ្នកអាចស្វែងរកដោយខ្លួនឯងថា យ៉ូសែប ស៊្មីធ គឺជាព្យាការីរបស់ព្រះ ដូចគ្នានឹងអ្វីដែល យ៉ូសែប ស្ម៊ីធបានរកឃើញដែរ ៖ ដោយសួរព្រះដោយខ្លួនលោកផ្ទាល់ ។
បញ្ជីនេះគឺគ្រាន់តែជាការចាប់ផ្ដើមប៉ុណ្ណោះ ។ តើអ្នកនឹងបន្ថែមអ្វី ? តើជីវិតរបស់អ្នកបានផ្លាស់ប្តូរយ៉ាងដូចម្តេចខ្លះ ដោយសារតែ យ៉ូសែប ស៊្មីធ ?