ព្រះយេស៊ូវ បានប្រោសមនុស្សឃ្លង់ម្នាក់ឲ្យជា

ដោយ អ៊ែរិន សាន់ដឺសុន

អ្នកនិពន្ធរស់នៅក្នុងរដ្ឋ យូថាហ៍ ស.រ.អា ។

រៀនអំពីព្រះគម្ពីរសញ្ញាថ្មីរួមគ្នានៅឆ្នាំនេះ!

សូមគិតពីពេលវេលាមួយពេលដែលអ្នកឈឺ ។ តើមាននរណាម្នាក់ ធ្វើអ្វីមួយល្អដើម្បីជួយអ្នកមានអារម្មណ៍ប្រសើរឡើងទេ ?

នៅក្នុងព្រះគម្ពីរសញ្ញាថ្មី យើងអានពីរបៀបព្រះយេស៊ូវគ្រីស្ទបានបង្ហាញព្រះហឬទ័យសប្បុរសទៅកាន់មនុស្សដែលឈឺ ។ នៅថ្ងៃមួយ មានបុរសម្នាក់មានជម្ងឺស្បែកដ៏ឈឺចាប់ ដែលហៅថា ជម្ងឺឃ្លង់ បានចូលទៅព្រះយេស៊ូវ ។ គាត់បានដឹងថា ព្រះយេស៊ូវមានព្រះចេស្ដាដើម្បីប្រោសអ្នកគ្រប់គ្នាដែលឈឺឲ្យជា គាត់បានជឿថាព្រះយេស៊ូវ អាចប្រោសគាត់ឲ្យជា ។ ព្រះយេស៊ូវ បានពាល់មនុស្សឃ្លង់នោះ ហើយមានបន្ទូលថា « ឲ្យជាស្អាតទៅ » ( ម៉ាកុស 1:41 ) ។ ភា្លមៗបន្ទាប់ពីព្រះយេស៊ូវ បានមានព្រះបន្ទូលដូច្នេះ បុរសនោះត្រូវបានជាស្អាត ។

យើងអាចដើរតាមស្នាមព្រះបាទារបស់ព្រះយេស៊ូវ ដើយមានចិត្តសប្បុរស និងស្រឡាញ់អ្នកដទៃ ដែលមានជម្ងឺ និងសោកសៅ ។

រៀនថែមទៀតពី ៖ ដំណឹងល្អ

ព្រះគម្ពីរសញ្ញាថ្មី មានគម្ពីរពិសេសបួនដែលហៅថា ដំណឹងល្អ ដែលបានសរសេរដោយពួកសាវកខ្លះរបស់ព្រះយេស៊ូវ ។ ដំណឹងល្អប្រាប់អំពីពេលដែលព្រះគ្រីស្ទគង់នៅលើផែនដី ។ ដំណើររឿងពីការប្រោសមនុស្សឃ្លង់ឲ្យជា គឺនៅក្នុងដំណឹងល្អទាំងបីនេះ ។ វាមាននៅក្នុង ម៉ាកុស 1:40–42 ហើយក៏នៅក្នុង ម៉ាថាយ 8:2–4 និង លូកា 5:12–14 ។

គំនិតយោបល់សម្រាប់ការនិយាយក្នុងគ្រួសារ

អ្នកអាចប្រើតួអង្គនៅក្នុងព្រះគម្ពីរ នៅទំព័រ 74 ដើម្បីប្រាប់រឿងចេញពី ម៉ាកុស 1:40–42 ។ បន្ទាប់មក អ្នកអាចអាន យូដាស 1:22 ហើយរៀបផែនការដើម្បីធ្វើអ្វីមួយជាក្រុមគ្រួសារ ដើម្បីធ្វើឲ្យមានភាពផ្លាស់ប្តូរនៅក្នុងជីវិតរបស់មនុស្សម្នាក់ដែរ ។ ប្រហែលជាអ្នកអាចបម្រើនរណាម្នាក់ដោយសម្ងាត់ !

បទចម្រៀង ៖ « សូមប្រាប់ខ្ញុំពីរឿងព្រះយេស៊ូវ » ( សៀវភៅចម្រៀងកុមារ ទំព័រ 36 )

ខគម្ពីរ ៖ ម៉ាកុស 1:40–42

វីដេអូ ៖ សូមចូលទៅគេហទំព័រ Biblevideos.org ដើម្បីមើល « ព្រះយេស៊ូវប្រោសមនុស្សខ្វិនឲ្យដើររួចនៅថ្ងៃ សប្ប័ទ » ហើយ « ព្រះយេស៊ូវប្រោសមនុស្សខ្វាក់ពីកំណើតបានភ្លឺ » ។

ការដើរតាមជំហានរបស់ព្រះយេស៊ូវ

ជាមួយនឹងគ្រូសាររបស់អ្នក ដើរតួពីរបៀបអ្នកអាចបង្ហាញសេចក្ដីស្រឡាញ់ចំពោះអ្នកដទៃនៅក្នុងស្ថានភាពទាំងនេះ ។ សូមបង្កើតស្ថានភាពខ្លះដោយខ្លួនឯង !

មានក្រុមគ្រួសារថ្មីមួយបានផ្លាស់មកនៅក្នុងសង្កាត់របស់អ្នក ។
ក្មេងមួយចំនួនប្រព្រឹត្តកាចចំពោះក្មេងផ្សេងទៀតនៅសាលារៀន ។
ភ្ញៀវម្នាក់ដែលមិនស្គាល់នរណាម្នាក់នៅព្រះវិហារបានមកក្នុងថ្នាក់់កុមារ ។
ប្អូនប្រុស ឬប្អូនស្រីរបស់អ្នក គ្មាននរណាម្នាក់ដើម្បីលេងជាមួយ ។
ប្អូនតូច កំពុងយំ ហើយម្ដាយរបស់អ្នកកំពុងព្យាយាមធ្វើអាហារពេលល្ងាច ។
មនុស្សម្នាក់នៅក្នុងវួដ ឬសាខារបស់អ្នកឈឺ ហើយមិនអាចចេញពីផ្ទះបាន ។

ព័ត៌មានជំនួយនៅក្នុងព្រះគម្ពីរ

នៅក្នុង ម៉ាកុស 1:41 ពាក្យ ក្ដួលអាណិត ត្រូវបានប្រើ ។ ពេលខ្លះ មានពាក្យជ្រៅនៅក្នុងព្រះគម្ពីរបរិសុទ្ធ ដែលអ្នកមិនយល់ ។ ពេលអ្នកឃើញពាក្យដែលអ្នកមិនស្គាល់ អ្នកអាចប្រើមគ្គុទេសន៍នៅក្នុងព្រះគម្ពីរដើម្បីជួយអ្នក! ឧទាហរណ៍ អ្នកអាចរកមើលពាក្យ « ក្ដួលអាណិត » ដើម្បីរកថាវាមានន័យយ៉ាងណា ហើយដើម្បីរកខគម្ពីរផ្សេងទៀតដែលប្រើវា ។ តើពាក្យអ្វីផ្សេងទៀតដែលអ្នកអាចរកមើលនៅក្នុងរឿងអំពីព្រះយេស៊ូវប្រោសបុរសដែលកើតឃ្លង់ឲ្យជា ?