ឥទ្ធិពលខាងវិញ្ញាណរបស់ ស្រ្តី

ដោយ ស្តាឡា អវើរឃែម បាត់ថ្លើរ

អ្នកនិពន្ធរស់នៅក្នុងរដ្ឋ យូថាហ៍ ស.រ.អា ។

តើយើងស្គាល់អំណាចនៃកម្លាំងខាងវិញ្ញាណរបស់យើងដែរឬទេ ?

រូបភាព

drawing of women with their arms around each other

បុត្រីនៃទេវតា ដោយខាតលីន ភីធើរសុន ហាមថតចម្លង

ស្ត្រីដ៏អស្ចារ្យ និងមានចិត្តរាបទាបជាច្រើននៅក្នុងសាសនាចក្រ បានខិតខំផ្ដល់ការបម្រើដោយពុំដឹងពីឥទ្ធិពលដ៏ទូលំទូលាយ ដែលជីវិតរបស់ពួកគេមាន — ជាគំរូនៃការបម្រើខាងសាច់ឈាម ប៉ុន្តែក៏ជាកេរ្ដិ៍ដំណែលនៃកម្លាំងខាងវិញ្ញាណផងដែរ ។ ស្រ្តីមា្នក់បែបនោះ ជាជីដូនរបស់ខ្ញុំ គឺឆែរី ភីធើរសិន ។ គាត់បានបម្រើយ៉ាងស្មោះត្រង់ នៅក្នុងការហៅបម្រើដ៏ស្ងាត់ស្ងៀមអស់មួយជីវិតរបស់គាត់ ។ ប្រសិនបើអ្នកសួរគាត់ គាត់នឹងអះអាងថាគាត់ពុំមានទេពកោសល្យជាច្រើន ដើម្បីផ្ដល់ជូនពិភពលោកទេ ។ ទោះជាយ៉ាងណាក្តី នៅពេលដែលខ្ញុំបានចាប់ផ្ដើមរៀនអំពីជីវិតរបស់គាត់ ខ្ញុំបានដឹងថាកម្លាំងខាងវិញ្ញាណរបស់គាត់មានឥទ្ធិពលមកលើជីវិតខ្ញុំដល់កម្រិតណា ។

ឪពុកម្ដាយរបស់ឆែរី បានឈប់ទៅចូលរួមនឹងសាសនាចក្រ ហើយបានលែងលះគ្នាពេលដែលគាត់នៅក្មេងនៅឡើយ ដូច្នេះគាត់បានធំឡើងជាមួយនឹងម្ដាយគាត់ គឺ ហ្ល្វ័ររិន ដែលតែងតែធ្វើការជានិច្ច ។ ហ្វ្ល័ររិន កាន់តែមិនត្រូវបានគេអើពើពេលដែលគាត់នៅក្មេង គាត់ត្រូវបានចិញ្ចឹមឲ្យធំឡើងនៅក្នុងសាលា ខណៈពេលដែលម្ដាយគាត់ គឺចចចា បានរស់នៅក្នុងជីវិតខាងលោកិយ ។ ថ្វីបើមានបញ្ហាក្នុងការអប់រំបីបាច់របស់នាង ឆែរីនៅតែសកម្មនៅក្នុងដំណឹងល្អ ចូលរួមក្នុងសាសនាចក្រដោយស្មោះត្រង់ជាមួយនឹងក្រុមគ្រួសាររបស់ជីដូនទួត គឺអេលីសាបិត ឬជាមួយមិត្តភក្ដិរបស់គាត់ ។ គាត់បានឃើញនៅក្នុងគ្រួសាររបស់គេ នូវអ្វីដែលគាត់ចង់បានសម្រាប់ខ្លួនគាត់ផ្ទាល់ដែរ ។ គាត់មិនបានដឹងច្បាស់ពីអ្វីដែលក្រុមគ្រួសារមួយគួរតែមានគុណសម្បត្តិបែបណាឡើយ ប៉ុន្តែគាត់បានដឹងពីគុណសម្បត្តិអវិជ្ជមាន ហើយគាត់បានប្តេជ្ញាថានឹងមានក្រុមគ្រួសារនៅថ្ងៃអនាគតឲ្យខុសពីនេះ ។

ជីតា ឌែល ជាស្វាមីរបស់ជីដូន ឆែរី របស់ខ្ញុំ — បានប្រាប់ខ្ញុំម្ដងនោះថា « ដើម្បីមានទីបន្ទាល់មួយ ចៅត្រូវតែចង់បានវា » ។ ឆែរី តែងតែចង់បានទីបន្ទាល់មួយនោះ ។ ទោះជាច្រើនឆ្នាំដំបូងនៃអាពាហ៍ពិពាហ៍របស់ពួកគាត់ត្រូវបានពោរពេញ ដោយការតស៊ូក្ដី ពួកគាត់បានប្ដេជ្ញាថានឹងនៅតែរឹងមាំជាក្រុមគ្រួសារ ។ ពួកគាត់ពុំសូវសកម្ម នៅឆ្នាំដំបូងនៃអាពាហ៍ពិពាហ៍របស់ពួកគាត់ ដោយសារតែកាលវិភាគការងាររបស់ ជីតា ឌែល ប៉ុន្តែការហៅបម្រើនៅក្នុងថ្នាក់កុមារ បានជម្រុញឲ្យឆែរីចាប់ផ្ដើមចូលរួមនៅក្នុងសាសនាចក្រ ហើយរយៈពេលខ្លីបន្ទាប់មក ជីតា ឌែលបានចូលរួមជាមួយគាត់នៅក្នុងសាសនាចក្រ ជាទីប្រឹក្សាកូរ៉ុមឌីកុនម្នាក់ ។ ពួកគាត់ទាំងពីរគឺសកម្ម និងរឹងមាំនៅក្នុងសាសនាចក្រចាប់តាំងពីពេលនោះមក ។ ការតាំងចិត្តដើម្បីបម្រើ និងការប្ដេជ្ញាដើម្បីបង្កើតក្រុមគ្រួសារដ៏រឹងមាំមួយរបស់ ឆែរី បានជួយម្ដាយខ្ញុំឲ្យក្លាយជាស្ត្រីរឹងមាំ ហើយគំរូរបស់ម្ដាយខ្ញុំ បានជួយកំណត់ជីវិតរបស់ខ្ញុំ ជាពិសេសនៅពេលដែលខ្ញុំ ចាប់ផ្ដើមក្រុមគ្រួសារផ្ទាល់ខ្លួនរបស់ខ្ញុំ ។

ក្នុងនាមជាស្ត្រី យើងអាចមានឥទ្ធិពលខាងវិញ្ញាណដ៏ជ្រាលជ្រៅ ទៅលើជីវិតរបស់អ្នកទាំងឡាយដែលនៅជុំវិញយើង ។ ពិតណាស់ យ៉ូសែប ស៊្មីធ បានបង្រៀនថា តួនាទីរបស់យើងគឺ « មិនត្រឹមតែដើម្បីជួយសង្គ្រោះជនក្រីក្រប៉ុណ្ណោះទេ តែដើម្បីសង្គ្រោះដល់ព្រលឹងផងដែរ » ។¹ ព្រះយេស៊ូវគ្រីស្ទ បានហៅស្ត្រីទាំងឡាយនៃសាសនាចក្ររបស់ទ្រង់ ដើម្បីក្លាយជាសិស្សរបស់ទ្រង់ និងដើម្បីឈររយ៉ាងរឹងមាំខាងវិញ្ញាណ ។ កម្លាំងខាងវិញ្ញាណ និងឥទ្ធិពលរបស់យើង មានសារៈសំខាន់ណាស់ នៅក្នុងដំណើររីកលូតលាស់នៃសេចក្ដីសង្គ្រោះ ហើយយើងត្រូវតែស្វែងរកឱកាសដើម្បីពង្រឹងដល់វិញ្ញាណអ្នកដែលនៅជុំវិញយើង ។ ពេលយើងធ្វើដូច្នោះ ឥទ្ធិពលនៃសេចក្ដីជំនឿ និងសេចក្ដីសុចរិតរបស់យើងនឹងនៅជាអង្វែងលើសពីអ្វីដែលយើងអាចមើលឃើញទៀត ។

បានហៅឲ្យធ្វើជាសិស្ស

អែលឌើរ ជេម អ៊ិ ថាល់មេហ្គ ( 1862–1933 ) នៃកូរ៉ុមនៃពួកសាវកដប់ពីរនាក់ បានសរសេរថា « ម្ចាស់ជើងឯកដ៏ធំបំផុតក្នុងពិភពលោករបស់ស្រ្តី និងភាពជាស្រ្តី គឺជាព្រះយេស៊ូវគ្រីស្ទ »² ជាឧទាហរណ៍ សូមគិតពីអ្វីដែលទ្រង់បានបង្រៀនកូនសិស្សស្រ្តីពីរនាក់របស់ទ្រង់ គឺនាងម៉ារា និងនាងម៉ាថា នៅក្នុងព្រះគម្ពីរសញ្ញាថ្មី ។ សៀវភៅ បុត្រី នៅក្នុងនគររបស់យើង ពន្យល់ថា ៖ « លូកា 10 មានរឿងពីម៉ាថាបើកទ្វារផ្ទះរបស់នាងទទួលស្វាគមន៍ព្រះយេស៊ូវ ។ នាងបានបម្រើព្រះអម្ចាស់ដោយយកចិត្តទុកដាក់ចំពោះតម្រូវការខាងសាច់ឈាមរបស់ទ្រង់ ហើយម៉ារាបានអង្គុយនៅឯចុងព្រះបាទារបស់លោកគ្រូ និងបានស្រូបយកការបង្រៀនរបស់ទ្រង់ ។

« នៅយុគសម័យដែលស្ត្រីជាទូទៅ ត្រូវបានគេរំពឹងឲ្យតែផ្ដល់ការបម្រើខាងសាច់ឈាមប៉ុណ្ណោះ ព្រះអង្គសង្គ្រោះបានបង្រៀន ម៉ាថា និងម៉ារាថា ស្ត្រីក៏អាចចូលរួមខាងវិញ្ញាណនៅក្នុងកិច្ចការរបស់ទ្រង់ដែរ ។ ទ្រង់បានអញ្ជើញពួកគេឲ្យក្លាយជាសិស្សទ្រង់ ហើយទទួលទាននូវសេចក្ដីសង្គ្រោះ ដែលជា ‹ ចំណែកយ៉ាងល្អ › ដែលនឹងមិនត្រូវដកចេញពួកគេឡើយ » ។³

ដូចជាម៉ាថា ពេលខ្លះយើងធ្វើកំហុសដោយការគិតថា តួនាទីចម្បងរបស់ស្ត្រីគឺ ដើម្បីផ្ដល់ការបម្រើខាងសាច់ឈាម ដូចជាការផ្ដល់ចំណីអាហារ ដេរប៉ាក់ និងសម្អាតសម្រាប់អ្នកដទៃទៀត ។ ការបម្រើនេះ គឺការលះបង់ដ៏មានតម្លៃ និងគួរឲ្យស្រឡាញ់ ទោះជាយ៉ាងណាព្រះអម្ចាស់ត្រូវការស្រ្តីនៃអំណាចខាងវិញ្ញាណ ដែលសេចក្ដីជំនឿ សេចក្ដីសុចរិត និងសេចក្ដីសប្បុរសភ្លឺចែងចាំងពេញមួយជីវិតរបស់ពួកគេ ជាងទ្រង់ត្រូវការបងប្អូនស្រ្តីដែលអាចដេរប៉ាក់ និងបម្អិនបាន ។ ទ្រង់ជ្រាបថាយើងម្នាក់ៗមានអ្វីច្រើនណាស់ ដើម្បីថ្វាយ ។ ព្រះយេស៊ូវគ្រីស្ទហៅ យើង ទាំងអស់គ្នាឲ្យអភិវឌ្ឍកម្លាំងខាងវិញ្ញាណ និងសមត្ថភាពរបស់យើង ដើម្បីទទួល និងប្រព្រឹត្តតាមវិវរណៈ ដើម្បីជួយឲ្យកិច្ចការរបស់ទ្រង់រីកចម្រើនទៅមុខ ។ លីនដា ខេ ប៊ើតុន ប្រធានសមាគមសង្គ្រោះទូទៅ បានមានប្រសាសន៍ទៅកាន់បងប្អូនស្រ្តីថា « អ្នកត្រូវបានបញ្ជូនមកកាន់ផែនដី ក្នុងគ្រាកាន់កាប់ត្រួតត្រានេះ ដោយសារតែគុណសម្បត្តិ និងអត្តសញ្ញាណរបស់អ្នក ហើយអ្នកត្រូវបានរៀបចំឲ្យធ្វើអ្វីហើយនោះ ! មិនថាសាតាំងនឹងល្បួងយើងឲ្យគិតខុសអំពីគោលតម្លៃរបស់យើងបែបណានោះទេ អត្តសញ្ញាណពិតរបស់យើង គឺថាយើងជាសិស្សនៃព្រះយេស៊ូវគ្រីស្ទ ! »⁴

រូបភាព

Drawing of Jesus with Mary and Martha

ព្រះអម្ចាស់ស្គាល់យើងទាំងអស់គ្នា និងស្ថានភាពរបស់យើង ហើយទ្រង់មានកិច្ចការសម្រាប់ឲ្យយើងធ្វើ នៅលើផែនដីនេះ ។ គ្មានបងប្អូនស្រ្តីណាដែលយល់ដឹងតិចពេក ឬមានទេពកោសល្យតិចពេកដើម្បីជាកម្លាំងខាងវិញ្ញាណ សម្រាប់សេចក្ដីល្អ និងនាំអ្នកដទៃមកកាន់ព្រះគ្រីស្ទនោះទេ ។ ជាមួយនឹងសក្ដានុពលដ៏ទេវភាពនេះ យើងមានទំនួលខុសត្រូវ ដើម្បីក្លាយជាអ្នកដឹកនាំខាងវិញ្ញាណនៅក្នុងគេហដ្ឋាន និងក្នុងសហគមន៍របស់យើង ។ អែលឌើរអិម រ័សុល បាឡឺដ នៃកូរ៉ុមនៃពួកសាវកដប់ពីរនាក់ បានប្រកាសថា « បងប្អូនស្រី្តទាំងអស់ នៅក្នុងសាសនាចក្រនេះ ដែលបានធ្វើសេចក្ដីសញ្ញាជាមួយនឹងព្រះអម្ចាស់ មាននូវសិទ្ធិអំណាចដ៏ទេវភាព ក្នុងការជួយសង្គ្រោះព្រលឹងទាំងឡាយក្នុងការដឹកនាំស្ត្រី នៃពិភពលោក ដើម្បីពង្រឹងគេហដ្ឋាន នៃស៊ីយ៉ូន និងស្ថាបនានគររបស់ព្រះ » ។⁵

យើងពុំចាំបាច់នៅក្នុងតំណែងខ្ពស់ ដើម្បីធ្វើកិច្ចការដែលមិនធម្មតាដើម្បីជួយអស់អ្នកដែលនៅជុំវិញយើងឲ្យធ្វើការសម្រេចចិត្ត ដែលនឹងដឹកនាំពួកគេខិតទៅកាន់តែជិតព្រះយេស៊ូវគ្រីស្ទ — ដែលជាតួនាទីដ៏សំខាន់របស់យើងនោះទេ ។ ទាំងអ្វីៗដែលធំជាងគេ និងតូចជាងគេបំផុត ដែលយើងធ្វើនៅក្នុងជីវិតរបស់មនុស្សម្នាក់ ឬពីរ សូម្បីតែនៅក្នុងគ្រួសាររបស់យើងផ្ទាល់ អាចមានឥទ្ធិពលយ៉ាងជ្រាលជ្រៅ ។

ស្រ្តីនៅក្នុងកិច្ចការនៃសេចក្តីសង្រ្គោះ

ទំនុកតម្កើងដ៏ជាទីស្រឡាញ់មួយបានច្រៀងថា « បេសកកម្មនៃទេវតា ត្រូវបានប្រទានដល់យើង ហើយយើងប្រកាសថានេះគឺជាអំណោយទាន »⁶ យើងមានអ្វីជាច្រើន ដើម្បីផ្ដល់ជូនដល់ជីវិតអស់អ្នកដែលយើងស្រឡាញ់ ។ អែលឌើរ រីឆាត ជី ស្កត នៃកូរ៉ុមនៃពួកសាវកដប់ពីរនាក់ បានចែកចាយដំណើររឿងនៃរបៀបដែលកម្លាំងខាងវិញ្ញាណរបស់ស្ត្រីពីរនាក់បានមានឥទ្ធិពលមកលើជីវិតរបស់លោក ។

« ពេលខ្ញុំនៅក្មេង ឪពុកខ្ញុំពុំមែនជាសមាជិកនៃសាសនាចក្រទេ ហើយម្ដាយខ្ញុំបែរជាពុំសូវសកម្មទៀត ។ … ប៉ុន្មានខែបន្ទាប់ពីខួបកំណើតប្រាំបីឆ្នាំរបស់ខ្ញុំ លោកយាយ វីតថល បានធ្វើដំណើរឆ្លងប្រទេស មកលេងយើង ។ លោកយាយមានកង្វល់អំពីមូលហេតុ ដែលខ្ញុំនឹងបងប្រុសខ្ញុំពុំបានទទួលបុណ្យជ្រមុជទឹកនៅឡើយ ។ ខ្ញុំមិនដឹងថាគាត់និយាយអ្វីខ្លះអំពីរឿងនេះទៅឪពុកម្ដាយខ្ញុំទេ ប៉ុន្តែខ្ញុំបានដឹងថា នាព្រឹកមួយ គាត់បាននាំបងប្រុសខ្ញុំ និងខ្ញុំទៅលេងសួនច្បារ ហើយបានចែកចាយអារម្មណ៍របស់គាត់អំពីសារៈសំខាន់នៃការទទួលបុណ្យជ្រមុជទឹក និងការទៅចូលរួមក្នុងព្រះវិហារទៀងទាត់ ។ ខ្ញុំមិនចាំនូវពាក្យសម្ដីជាក់លាក់ដែលគាត់និយាយទេ ប៉ុន្តែពាក្យពេចន៍គាត់ បានចាក់ចូលដល់ដួងចិត្តខ្ញុំ ហើយមិនយូរប៉ុន្មាន បងប្រុសខ្ញុំ និងខ្ញុំបានទទួលបុណ្យជ្រមុជទឹក ។ …

« លោកយាយបានប្រើការលើកទឹកចិត្ត និងការគោរពត្រឹមត្រូវ ដើម្បីជួយឪពុករបស់យើងឲ្យទទួលស្គាល់ សារៈសំខាន់នៃការនាំយើងទៅព្រះវិហារសម្រាប់ការប្រជុំទាំងឡាយរបស់យើង ។ គាត់បានជួយយើង ឲ្យដឹងពីតម្រូវការដើម្បីមានដំណឹងល្អ ក្នុងជីវិតយើងតាមគ្រប់វិធីត្រឹមត្រូវ » ។⁷

ប្រភពទីពីរនៃ កម្លាំងខាងវិញ្ញាណ គឺជែនីន ជាភរិយារបស់អែលឌើរ ស្កត ។ ពេលដែលពួកគេកំពុងតែដើរលេងជាមួយគ្នា ពួកគេបានចាប់ផ្ដើមនិយាយពីអនាគត ។ ជែនីន ជាអ្នកដែលបានធំឡើងនៅក្នុងផ្ទះអ្នកផ្សព្វផ្សាយសាសនាដ៏រឹងមាំមួយ បានបញ្ជាក់ពីបំណងចង់រៀបការជាមួយអ្នកត្រឡប់ពីផ្សាយសាសនា នៅក្នុងព្រះវិហារបរិសុទ្ធ ។ អែលឌើរ ស្កត ដែលពុំសូវបានគិតច្រើនអំពីការចេញបម្រើបេសកកម្មពីមុនមក ត្រូវបានប៉ះទង្គិចជាខ្លាំងពីពាក្យសម្ដីរបស់ ជែនីន ។ « ខ្ញុំបានទៅផ្ទះវិញ ហើយខ្ញុំមិនអាចគិតអំពីអ្វីផ្សេងទៀតសោះឡើយ ។ ខ្ញុំពុំអាចគេងលក់ពេញមួយយប់ ។ … បន្ទាប់ពីការអធិស្ឋានជាច្រើនលើក ខ្ញុំបានធ្វើការសម្រេចចិត្តដើម្បីជួបជាមួយនឹងប៊ីស្សពរបស់ខ្ញុំ ហើយចាប់ផ្ដើមបំពេញពាក្យសុំចេញបេសកកម្មរបស់ខ្ញុំ » ។⁸ ទោះជាជែននីន បានផ្ដល់ការណែនាំដល់គាត់ និងការជម្រុញដែលគាត់ត្រូវការក្ដី ជែននីន មិនដែលសូមឲ្យគាត់បម្រើបេសកកម្ម សម្រាប់នាងទេ ។ គាត់ស្រឡាញ់ខ្ញុំគ្រប់ល្មមដើម្បីចែកចាយ ពីជំនឿស៊ប់របស់គាត់ ហើយបានផ្ដល់ឱកាសដល់ខ្ញុំ ដើម្បីកំណត់យកទិសដៅនៃជីវិតផ្ទាល់របស់ខ្ញុំ ។ យើងទាំងពីរនាក់បានបម្រើបេសកកម្ម ហើយក្រោយមកបានផ្សារភ្ជាប់នៅក្នុងព្រះវិហារបរិសុទ្ធ ។ ភាពក្លាហាន និងការប្តេជ្ញាចិត្តរបស់ជែននីនចំពោះសេចក្តីជំនឿរបស់គាត់ បានធ្វើឲ្យមានការផ្លាស់ប្តូរយ៉ាងធំនៅក្នុងជីវិតរបស់យើងរួមគ្នា ។ ខ្ញុំជឿជាក់ថា យើងនឹងពុំរកឃើញសុភមង្គលដែលយើងឱបក្រសោប ដោយគ្មានសេចក្តីជំនឿដ៏រឹងមាំរបស់គាត់ទៅលើគោលការណ៍ នៃការបម្រើព្រះអម្ចាស់ជាមុនសិននោះទេ ។ គាត់គឺជាគំរូដ៏ល្អ និងសុចរិតមួយ !⁹

វាគឺជាឥទ្ធិពលខាងវិញ្ញាណរបស់បងប្អូនស្រ្តីដូចទេវតាទាំងនេះ នៅក្នុងជីវិតរបស់គាត់ដែលបានជួយបុរសវ័យក្មេងម្នាក់ — គឺអែលឌើរ ស្កត — ឲ្យធ្វើការសម្រេចចិត្តមួយចំនួនដ៏សំខាន់បំផុតនៅក្នុងជីវិតរបស់គាត់ ៖ ដើម្បីទទួលបុណ្យជ្រមុជទឹក ចេញទៅបម្រើបេសកកម្ម និងរៀបអាពាហ៍ពិពាហ៍នៅក្នុងព្រះវិហារបរិសុទ្ធ ។

យើងអាចជួយអ្នកដទៃដែលចង់ធ្វើការជ្រើសរើសដ៏ល្អបាន ដោយគំរូ ទង្វើ ពាក្យសម្ដី និងសេចក្ដីសុចរិតផ្ទាល់ខ្លួនរបស់យើង ។ បងស្រី ខារ៉ូល អិម ស្តេហ្វិន ទីប្រឹក្សាទីមួយក្នុងគណៈប្រធានសមាគមន៍សង្គ្រោះទូទៅ បានប្រកាសថា « យើងគឺជាបុត្រីនៃសេចក្ដីសញ្ញានៅក្នុងនគររបស់ព្រះ ហើយយើងមានទំនួលខុសត្រូវដើម្បីធ្វើជា ឧបករណ៍នៅក្នុងព្រះហស្តរបស់ទ្រង់ ។ … យើងចូលរួមក្នុងកិច្ចការនៃសេចក្ដីសង្គ្រោះ ជារៀងរាល់ថ្ងៃក្នុងរបៀបតូច និងសាមញ្ញដោយ — មើលការខុសត្រូវ ពង្រឹង និងបង្រៀនគ្នាទៅវិញទៅមក » ។¹⁰ នៅពេលដែលយើងពឹងផ្អែកទៅលើព្រះវិញ្ញាណ និងឆ្ពោះទៅមុខដោយចិត្តស្មោះ និងការខិតខំមានចិត្តរាបទាបដើម្បីជួយ អស់អ្នកដែលនៅជុំវិញយើងឲ្យខិតកាន់ជិតព្រះគ្រីស្ទ នោះយើងនឹងត្រូវបានដឹកនាំក្នុងអ្វីដែលយើងអាចធ្វើបាន និងបានផ្ដល់កម្លាំងដើម្បីធ្វើវា ហើយយើងនឹងមានអារម្មណ៍ថាមានសេចក្ដីអំណរដែលបាននាំបាននាំកូនចៅរបស់ព្រះអម្ចាស់មកកាន់ទ្រង់ ។

រូបភាព

drawing of a mother and baby

ការក្លាយជាឥទ្ធិពលខាងវិញ្ញាណ

ការស្គាល់ពីទំនួលខុសត្រូវរបស់យើង យើងប្រហែលជាអាចសួរដូចជាពួកសាវកពីបុរាណថា « តើយើងខ្ញុំត្រូវធ្វើដូចម្តេច » ( កិច្ចការ 2:37 ) ដើម្បីក្លាយជាឥទ្ធិពលខាងវិញ្ញាណ ? ក្នុងសន្និសីទទូទៅចុងក្រោយនេះ បងស្រី ប៊ើរតុនបានអញ្ជើញបងប្អូនស្ត្រីទាំងអស់ឲ្យស្រម៉ៃអំពី « សញ្ញា ‹ ប្រកាសរកជំនួយ › ខាងវិញ្ញាណមួយចំនួន ដែលទាក់ទងនឹងកិច្ចការនៃសេចក្ដីសង្គ្រោះ ៖

ប្រកាសរកជំនួយ ៖ ឪពុកម្ដាយឲ្យចិញ្ចឹមកូនចៅរបស់ពួកគេមកក្នុងពន្លឺ និងសេចក្ដីពិត
ប្រកាសរកជំនួយ ៖ កូនស្រី … , បងប្អូនស្រី … , មីង … , បងប្អូនជីដូនមួយ និងមិត្តភក្ដិពិតដើម្បីបម្រើជាអ្នកចង្អុលបង្ហាញ និងផ្ដល់ជំនួយនៅតាមផ្លូវនៃសេចក្ដីសញ្ញា
ប្រកាសរកជំនួយ៖ អ្នកទាំងឡាយដែលស្ដាប់ចំពោះការបំផុសគំនិតនៃព្រះវិញ្ញាណបរិសុទ្ធ ហើយធ្វើតាមការបំផុសដែលទទួលបាន
ប្រកាសរកជំនួយ ៖ អ្នកទាំងឡាយណាដែលរស់នៅតាមដំណឹងល្អប្រចាំថ្ងៃ តាមរបៀបតូចៗ និងសាមញ្ញ
ប្រកាសរកជំនួយ ៖ អ្នកធ្វើការស្រាវជ្រាវពង្សប្រវត្តិ និងកិច្ចការព្រះវិហារបរិសុទ្ធ ដើម្បីភ្ជាប់ក្រុមគ្រួសារដ៏អស់កល្បជានិច្ច
ប្រកាសរកជំនួយ ៖ អ្នកផ្សាយសាសនា និងសមាជិក ដើម្បីផ្សាយ ‹ ដំណឹងល្អ › — ជាដំណឹងល្អនៃព្រះយេស៊ូវគ្រីស្ទ
ប្រកាសរកជំនួយ ៖ អ្នកជួយសង្គ្រោះ ដើម្បីស្វែងរកអ្នកទាំងឡាយណា ដែលបានវង្វេងផ្លូវ
ប្រកាសរកជំនួយ ៖ អ្នករក្សាសេចក្ដីសញ្ញា ដើម្បីឈរឲ្យរឹងមាំចំពោះសេចក្ដីពិត និងភាពត្រឹមត្រូវ
ប្រកាសរកជំនួយ ៖ សិស្សពិតរបស់ព្រះអម្ចាស់ ព្រះយេស៊ូវគ្រីស្ទ »¹¹

កិច្ចការទាំងនេះពុំមែនជាអ្វីដែលថ្មីថ្មោងនោះទេ ប៉ុន្តែពេលយើងស្វែងរកឱកាសដើម្បី ចូលរួមនៅក្នុងកិច្ចការនៃសេចក្ដីសង្គ្រោះ យើងនឹងបង្កើនសមត្ថភាពរបស់យើង ដើម្បីជួយអស់អ្នកដែលនៅជុំវិញយើង ។ អែលឌើរ បាឡឺដ បានមានប្រសាសន៍ថា « គ្មានអ្វីនៅក្នុងលោកនេះដែលមានភាពផ្ទាល់ខ្លួនដូចជា ការបីបាច់ ឬការផ្លាស់ប្ដូរជីវិត ដូចជាឥទ្ធិពលនៃសេចក្ដីសុចរិតរបស់ស្ត្រីនោះទេ »¹² ពេលដែលយើងអភិវឌ្ឍអំណាចខាងវិញ្ញាណរបស់យើង តាមរយៈការអធិស្ឋាន និងការសិក្សាព្រះគម្ពីរផ្ទាល់ខ្លួន គោរពប្រតិបត្តិតាមយ៉ាងរឹងមាំ និងរក្សាសេចក្ដីសញ្ញារបស់យើងដោយស្មោះត្រង់ នោះយើងនឹងក្លាយជាឥទ្ធិពលនោះ ។

លើសពីអ្វីដែលយើងអាចមើលឃើញ

ប្រធាន ព្រិកហាំ យ៉ង់ ( 1801–1877 ) បានមានប្រសាសន៍ថា « តើអ្នកអាចប្រាប់ពីចំនួននៃសេចក្ដីល្អដែលម្ដាយ និងកូនស្រីទាំងឡាយរបស់អ៊ីស្រាអែលអាចធ្វើបានឬទេ ? ទេ វាមិនអាចទៅរួចទេ ។ និងសេចក្ដីល្អដែលពួកគេធ្វើ នឹងនៅជាមួយពួកគេអស់កល្បជានិច្ច »¹³

ការសម្រេចចិត្តដ៏សុចរិតរបស់ជីដូនខ្ញុំបានជះឥទ្ធិពលដល់ក្រុមគ្រួសាររបស់គាត់ជាច្រើនជំនាន់ ហួសពីអ្វីដែលគាត់អាចមើលឃើញនៅពេលគាត់ជាយុវរនារីទៀត ។ ទោះជាយ៉ាងណា ឥទ្ធិពលខាងវិញ្ញាណរបស់ស្ត្រីនៅក្នុងក្រុមគ្រួសារ លាតសន្ធឹងចូលទៅក្នុងអតីតកាល ជាច្រើនជំនាន់ទៀត ។ ឆែរីបានទទួលបានកម្លាំងខាងវិញ្ញាណផ្ទាល់ខ្លួនជាច្រើន ពីការសង្កេតជីដូនទួតរបស់គាត់ ( ជីដូនទួតទីបីរបស់ខ្ញុំ ) គឺ អេលីសាបិត ។ គំរូរបស់អេលីសាបិត នៃសេចក្ដីជំនឿ និងទីបន្ទាល់បានបញ្ចេញឥទ្ធិពលហួសពីពីរជំនាន់នៃភាពអសកម្មក្នុងការជួយចៅស្រីទួតរបស់គាត់ គឺ ឈឺរី ឲ្យត្រឡប់រកនិន្នាការនៃក្រុមគ្រួសារដែលបែកបាក់ និងការវិលមកសាសនាចក្រវិញ ។

ពេលដែលយើងក្លាយជាកម្លាំងខាងវិញ្ញាណចំពោះអស់អ្នកដែលនៅជុំវិញយើង នោះឥទ្ធិពលរបស់យើងនឹងលាតត្រដាងយ៉ាងធំហួសពីអ្វីដែលយើងអាចមើលឃើញទៀត ។ ប្រធាន ហ្គរដុន ប៊ី. ហ៊ិងគ្លី ( ឆ្នាំ 1910–2008 ) បានមានប្រសាសន៍ថា « យើងហៅស្ត្រីនៃសាសនាចក្រឲ្យឈររួមគ្នាសម្រាប់សេចក្ដីសុចរិត ។ ពួកគេត្រូវតែចាប់ផ្ដើមនៅក្នុងផ្ទះរបស់គេផ្ទាល់ ។ ពួកគេអាចបង្រៀនវានៅក្នុងថ្នាក់រៀនរបស់គេ ។ ពួកគេអាចបញ្ចេញសំឡេងនៅក្នុងសហគមន៍របស់គេ ។ …

« ខ្ញុំមើលឃើញថា ការណ៍នេះគឺជាសេចក្តីសង្ឃឹមមួយដ៏ភ្លឺត្រចះត្រចង់ នៅក្នុងពិភពលោកមួយ ដែលកំពុងធ្វើដំណើរឆ្ពោះទៅរកការបំផ្លាញខ្លួនឯង » ។¹⁴

នៅពេលដែលយើងបំពេញតាមបញ្ញត្តិនេះ កិច្ចការរបស់ព្រះអម្ចាស់នឹងត្រូវបានជម្រុញទៅមុខ ទាំងនៅពិភពលោកជុំវិញយើង និងសំខាន់បំផុត នៅក្នុងក្រុមគ្រួសាររបស់យើង និងជីវិតរបស់អ្នកទាំងឡាយដែលយើងស្រឡាញ់ ។

រូបភាព

Old photo of three women