ដំណឹងល្អ ពី បុរាណ
ទ្រង់មានព្រះជន្មរស់ឡើងវិញ
ដេវីឌ អូ មិកឃេ បានកើតនៅ ថ្ងៃទី 8 ខែ កញ្ញា ឆ្នាំ 1873 ។ លោកត្រូវបានតែងតាំងធ្វើជាសាវកនៅថ្ងៃទី 9 ខែ មេសា ឆ្នាំ 1906 នៅអាយុ 32 ឆ្នាំ ហើយនៅថ្ងៃទី 9 ខែ មេសា ឆ្នាំ 1951 លោកត្រូវបានគាំឲ្យធ្វើជាប្រធានទីប្រាំបួននៃសាសនាចក្រ ។ ខាងក្រោមនេះ គឺជាការដកស្រង់ចេញពីសុន្ទរកថាដែលលោកបានផ្ដល់នៅសន្និសីទទូទៅ ខែ មេសា ឆ្នាំ 1966 ។ សម្រាប់សុន្ទរកថាទាំងមូល សូមមើលកំណត់ត្រាសន្និសីទ ខែ មេសា ឆ្នាំ 1966 ទំព័រ 55–59 ។
ជំនឿដែលឥតងាករេនៅក្នុងព្រះគ្រីស្ទ គឺជាតម្រូវការដ៏សំខាន់បំផុតនៅក្នុងពិភពលោកនាពេលបច្ចុប្បន្ននេះ ។
ប្រសិនបើអព្ភូតហេតុដ៏អស្ចារ្យមួយ គឺជាព្រឹត្តិការណ៍ជំនឿអរូបីយដែលមានលើសពីប្រាជ្ញាដែលមានកម្រិតរបស់មនុស្ស នោះដំណើររស់ឡើងវិញរបស់ព្រះយេស៊ូវគ្រីស្ទ គឺជាការអស្ចារ្យដ៏សម្បើមបំផុតជាងពេលណាៗទាំងអស់ ។ នៅក្នុងជំហរវាបង្ហាញពីអំណាចដ៏អស្ចារ្យនៃព្រះ និងអមតភាពរបស់មនុស្ស ។
ទោះបីជាដំណើររស់ឡើងវិញ គឺជាអព្ភូតហេតុមួយក៏ដោយ នៅតែមានន័យថា វាហួសពីការយល់ដឹងរបស់មនុស្សទៅទៀត ។ ដល់អស់អ្នកដែលទទួលស្គាល់ថាវាជាការពិត ប៉ុន្តែវាជាការបង្ហាញនៃច្បាប់ឯកសណ្ឋាននៃជីវិតប៉ុណ្ណោះ ។ …
ការស្ថាបនាវាជាការពិតថា ព្រះគ្រីស្ទបានយកព្រះកាយទ្រង់ ហើយបានលេចចេញមកក្នុងសិរីរុងរឿង ជាអង្គដែលបានរស់ឡើងវិញ នោះអ្នកឆ្លើយសំណួរជាយូរអង្វែងមកថា ៖ « បើមនុស្សស្លាប់ទៅ តើនឹងមានជីវិតរស់ឡើងទៀតឬ ? » ( យ៉ូប 14:14 ) ។
សាក្សីនៃ ដំណើររស់ឡើងវិញ
ការរស់ឡើងវិញជាក់ស្ដែងរបស់ព្រះគ្រីស្ទពីផ្នូរនោះ គឺជាការពិតយ៉ាងជាក់ច្បាស់ចំពោះពួកសាវកដែលបានស្គាល់ទ្រង់យ៉ាងជិតស្និទ្ធ ។ នៅក្នុងគំនិតរបស់ពួកគេ ពិតជាពុំមានការសង្ស័យទេ ។ ពួកគេគឺជាសាក្សីនៃការពិតនោះ ពួកគេបានដឹងដោយសារតែពួកគេបានឃើញផ្ទាល់ភ្នែក បានឮផ្ទាល់ត្រចៀកពួកគេ ហើយដៃពួកគេបានស្ទាបវត្តមានព្រះកាយនៃព្រះដ៏ប្រោសលោះដែលមានព្រះជន្មរស់ឡើងវិញ ។
ក្នុងឱកាសដែលពួកសាវកទាំងដប់មួយនាក់បានជួបជុំគ្នា ដើម្បីជ្រើសរើសម្នាក់ឲ្យជំនួសកន្លែងរបស់ យូដាសអ៊ីស្ការីយ៉ុត ពេត្រុសដែលជាប្រធានសាវកបានមានប្រសាសន៍ថា « ដូច្នេះ ក្នុងពួកអ្នក … ត្រូវឲ្យមានម្នាក់ទៀតធ្វើជាទីបន្ទាល់ ជាមួយនឹងយើង ពីដំណើរដែលទ្រង់មានព្រះជន្មរស់ឡើងវិញ » ( កិច្ចការ 1:21–22 ) ។ …
ក្នុងឱកាសមួយផ្សេងទៀត ពេត្រុសបានប្រកាសនៅមុខខ្មាំងសត្រូវរបស់គេ ជាក្រុមមនុស្សតែមួយដែលបានធ្វើគត់ព្រះយេស៊ូវនៅលើឈើឆ្កាងថា ៖ « ឱពួកសាសន៍អ៊ីស្រាអែលអើយ សូមស្តាប់ពាក្យនេះចុះ … ឯព្រះយេស៊ូវនេះ ព្រះបានប្រោសឲ្យទ្រង់មានព្រះជន្មរស់ឡើងវិញ ហើយពួកយើងនេះជាទីបន្ទាល់ពីទ្រង់ទាំងអស់គ្នា » ( កិច្ចការ 2:22, 32 ) ។ …
សាក្សីបន្ថែម
សាសនាចក្រនៃព្រះយេស៊ូវគ្រីស្ទ នៃពួកបរិសុទ្ធថ្ងៃចុងក្រោយ ឈរជាមួយនឹងពេត្រុស ប៉ុល យ៉ាកុប និងជាមួយនឹងពួកសាវកជំនាន់ដើមដទៃទៀត ដែលមិនត្រឹមតែបានទទួលយកដំណើររស់ឡើងវិញថាជាការពិតដ៏ជាក់ស្ដែងនោះទេ ប៉ុន្តែថែមទាំងជាការបំពេញបេសកកម្មដ៏ទេវភាពរបស់ព្រះគ្រីស្ទនៅលើផែនដីនេះផង ។
ដប់ប្រាំបីរយឆ្នាំ បន្ទាប់ពី ការសុគតនៅលើឈើឆ្កាងរបស់ព្រះយេស៊ូវ ព្យាការីយ៉ូសែប ស្ម៊ីធ បានប្រកាសថា ព្រះដែលមានព្រះជន្មរស់ឡើងវិញបានបង្ហាញអង្គទ្រង់ចំពោះលោក ដោយមានប្រសាសន៍ថា ៖ « ខ្ញុំបានឃើញតួអង្គពីរ ដែលមានរស្មី និងសិរីរុងរឿងដែលពុំអាចពណ៌នាបានឡើយ ឈរនៅលើអាកាស ពីលើរូបខ្ញុំ ។ តួអង្គមួយមានព្រះបន្ទូលមកខ្ញុំ ដោយហៅខ្ញុំតាមឈ្មោះ ហើយចង្អុលទៅតួរអង្គមួយទៀត ដោយមានព្រះបន្ទូលថា — នេះជា ព្រះរាជបុត្រា ដ៏ស្ងួនភ្ងារបស់យើង ។ ចូរស្ដាប់ទ្រង់ចុះ ! » ( យ៉ូសែប ស្ម៊ីធ — ប្រវត្តិ 1:17 ) ។ …
ប្រសិនបើទីបន្ទាល់របស់យ៉ូសែប ស៊្មីធ ឈរតែឯកឯង វានឹងដូចជាព្រះគ្រីស្ទបានមានបន្ទូលពីទីបន្ទាល់របស់ទ្រង់ នៅពេលដែលទ្រង់បានមានបន្ទូលពីអង្គទ្រង់ផ្ទាល់ ប៉ុន្តែព្រះយេស៊ូវមានទីបន្ទាល់របស់ព្រះ ហើយពួកសាវកមានទីបន្ទាល់ទ្រង់ ។ ហើយយ៉ូសែប ស៊្មីធ មានសាក្សីឯទៀត [ អ្នកដែល ] បានបញ្ជាក់អះអាងពីទីបន្ទាល់របស់[លោក] សេចក្ដីពិតដែលបានធ្វើឲ្យដឹងដោយការបង្ហាញព្រះកាយរបស់ទេវតាម៉ូរណៃដល់ពួកគេ ។ …
… សាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ[ក៏]ប្រកាសពីការនិមិត្តដ៏រុងរឿងរបស់ព្យាការី យ៉ូសែប ស៊្មីធដែរថា ៖
« ហើយឥឡូវនេះ បន្ទាប់ពីទីបន្ទាល់ជាច្រើន ដែលបានថ្លែងអំពីទ្រង់នេះ គឺជាទីបន្ទាល់ចុងក្រោយបង្អស់ ដែលយើងខ្ញុំសូមថ្លែងអំពីទ្រង់ ៖ គឺថាទ្រង់មានព្រះជន្មរស់ ! » ( គ និង ស 76:22 ) ។ …
នៅក្នុងពន្លឺនៃទីបន្ទាល់ដែលមិនបដិសេធបាន ដែលបានផ្ដល់ដោយពួកព្យាការីពីបុរាណ — ជាទីបន្ទាល់ចាប់តាំងពីប៉ុន្មានឆ្នាំជាបន្តបន្ទាប់ទៅនឹងព្រឹត្តិការណ៍នោះផ្ទាល់ — នៅក្នុងពន្លឺនៃវិរណៈដែលអស្ចារ្យបំផុតនៅក្នុងជំនាន់ដែលព្រះគ្រីស្ទនៅមានព្រះជន្មនោះ វាហាក់ដូចជាមានការលំបាកពិត ក្នុងការយល់ពីរបៀបដែលមនុស្សអាចនៅតែបដិសេធទ្រង់ ហើយអាចសង្ស័យពីអមតភាពរបស់មនុស្ស ។
អ្វីដែលយើងត្រូវការនៅសព្វថ្ងៃនេះគឺ
ជំនឿដែលឥតងាករេនៅក្នុងព្រះគ្រីស្ទ គឺជាតម្រូវការដ៏សំខាន់បំផុតនៅក្នុងពិភពលោកនាពេលបច្ចុប្បន្ននេះ ។ វាមានន័យជ្រាលជ្រៅជាងការមានអារម្មណ៍ទៅទៀត ។ វាគឺជាអំណាចដែលអាចបោះជំហានទៅជាសកម្មភាព ហើយវាជាកម្លាំងលើកទឹកចិត្តជាមូលដ្ឋានបំផុត ដែលគួរតែនៅក្នុងជីវិតមនុស្សម្នាក់ៗ ។ …
ប្រសិនបើមនុស្សនឹង « ធ្វើតាមព្រះហឫទ័យទ្រង់ » ជំនួសឲ្យការមើលទៅផ្នូរដ៏ងងឹត និងអាប់អួរដោយអស់សង្ឃឹមនោះ ពួកគេនឹងបង្វែរភ្នែករបស់ពួកគេទៅកាន់ស្ថានសួគ៌ ហើយដឹងថាព្រះគ្រីស្ទមានព្រះជន្មរស់ឡើងវិញហើយ ! …
សាសនាចក្រនៃព្រះយេស៊ូវគ្រីស្ទ នៃពួកបរិសុទ្ធថ្ងៃចុងក្រោយ ប្រកាសទៅដល់ពិភពលោកទាំងមូលថា ព្រះគ្រីស្ទ គឺជាព្រះរាជបុត្រារបស់ព្រះ ជាព្រះដ៏ប្រោសលោះនៃពិភពលោក ! គ្មានសិស្សពិតប្រាកដណាម្នាក់ដែលពេញចិត្តនឹងទទួលយក ទ្រង់ជាព្រះដែលបានបង្កើតដ៏អស្ចារ្យ គ្រូបង្រៀនដ៏ល្អ ឬសូម្បីតែជាមនុស្សម្នាក់ដ៏ឥតខ្ចោះនោះទេ ។ បុរសនៃកាលីឡេនេះ — មិនមែនជាន័យធៀបទេ, ប៉ុន្តែ ជាក់ស្ដែងជា — ព្រះរាជបុត្រារបស់ព្រះអម្ចាស់ដ៏មានព្រះជន្មរស់ ។ …
ពិតជាកើតជាថ្មី
គ្មាននរណាម្នាក់អាចដោះស្រាយដោយចិត្តស្មោះ ដើម្បីអនុវត្តការបង្រៀនរបស់ព្រះយេស៊ូវពីណាសារ៉ែត នៅក្នុងជីវិតប្រចាំថ្ងៃរបស់ខ្លួន ដោយគ្មានការចង់ផ្លាស់ប្ដូរខ្លួនទាំងមូលរបស់គេនោះទេ ។ ឃ្លាដែលថ្លែងថា « កើតជាថ្មី » មានអត្តសញ្ញាណជា្រលជ្រៅជាងអ្វីដែលមនុស្សជាច្រើនបានគិតទៅទៀត ។ … មនុស្សដែលមានសុភមង្គល គឺជាមនុស្សដែលបានដឹងពិតពីការលើកទឹកចិត្តនេះ អំណាចកែប្រែដែលមកពីការនៅជិតព្រះអង្គសង្គ្រោះនេះ ទៅជាបងប្អូនរបស់ព្រះគ្រីស្ទដែលមានព្រះជន្មនៅរស់វិញ ។ ខ្ញុំមានអំណរគុណ ដែលខ្ញុំដឹងថាព្រះយេស៊ូវ គឺជាព្រះដ៏ប្រោលោះ ។ …
សារខិលិតស្ដីពីដំណើររស់ឡើងវិញ … គឺជាការលួងលោមចិត្តដ៏ប្រសើរបំផុត ជាសេចក្ដីរុងរឿងបំផុតដែលមិនធ្លាប់បានផ្ដល់ឲ្យមនុស្សពីមុនមក ដោយសារតែពេលដែលសេចក្ដីស្លាប់ឆក់យកមនុស្សជាទីស្រឡាញ់ពីយើង ដួងចិត្តដែលពោរពេញទៅដោយទុក្ខព្រួយរបស់យើងត្រូវបានសម្រាល ដោយសេចក្ដីសង្ឃឹម និងការធានាដ៏ទេវភាពបានបញ្ជាក់នៅក្នុងពាក្យ ៖ « ទ្រង់មិនគង់នៅទីនេះទេ ដ្បិតទ្រង់មានព្រះជន្មរស់ឡើងវិញហើយ ! » [ សូមមើល ម៉ាថាយ 28:6; ម៉ាកុស 16:6 ] ។
ខ្ញុំដឹងដោយពេញក្នុងព្រលឹងខ្ញុំថា សេចក្ដីស្លាប់ត្រូវបានយកជ័យជំនះដោយព្រះយេស៊ូវគ្រីស្ទ ហើយដោយសារព្រះដ៏ប្រោសលោះរបស់យើងទ្រង់រស់ នោះយើងក៏ដូច្នេះដែរ ។