O Le Mea Tatou Te Talitonu I Ai
O Le Sefuluai e Fesoasoani i le Fausiaina o le Malo o le Atua
Tatou te talitonu i le tuuina atu o le tasi-vaesefulu o a tatou tupe maua i le Alii e fesoasoani ai e fausia Lona malo. O le tulafono o le sefuluai e manaomia ai lo tatou ositaulagaina o nisi o a tatou meatotino ina ia mafai ai ona olioli i faamanuiaga faaleagaga sili atu.
O le mataupu faavae o le sefuluai na faatinoina lava talu ona muai aoaoina le talalelei i le lalolagi. O Aperaamo, mo se faataitaiga, sa ia totogi atu sefuluai i le faitaulaga sili o Mekisateko (tagai Kenese 14:18–20). Sa poloaiina e le Alii Mose e aoao atu tagata e uiga i le sefuluai (tagai Levitiko 27:30–34). Mulimuli ane, ina ua asiasi atu le Faaola ia sa Nifaē, na Ia tuuina atu ia i latou le tulafono o le sefuluai (tagai 3 Nifae 24). Ma i o tatou aso, na Ia toefuataiina mai lenei poloaiga e ala i le Perofeta o Iosefa Samita (tagai MF&F 119).
Ina ia faataunuuina lenei poloaiga, tatou te tuuina atu le tasi-vaesefulu o a tatou tupe maua i le Alii e ala i taitai perisitua i le lotoifale. E auina atu tupe i le laumua o le Ekalesia, lea e fuafua ai e se aufono e aofia ai le Au Peresitene Sili, o le Korama a Aposetolo e Toasefululua, ma le Au Epikopo Pulefaamalumalu ia auala e faaaoga ai tupe paia (tagai MF&F 120).
O sefuluai e mafai ai e le Ekalesia ona fausia ma tausia malumalu ma falelotu, e lagolago ai seminare ma inisitituti, e tuuina atu ai meatotino mo tagata o le Ekalesia, ma lagolago ai le galuega faafaifeautalai, malumalu ma talafaasolopito o aiga.
Tatou te talitonu i le totogiina o sefuluai ma le loto i ai, “aua e alofa le Atua i le ua foai ma le loto malie” (2 Korinito 9:7). O le totogiina o se sefuluai o se auala lea e mafai ai ona tatou fesoasoani e fausia le malo o le Atua i le lalolagi ma faaali atu le agaga faafetai i le Tama Faalelagi mo le faamanuiaina o i tatou i mea uma ua tatou maua. Ae o le totogiina o sefuluai e aumaia ai faamanuiaga sili atu i o tatou olaga. E pei ona aoao mai Malaki: “Ina aumai ia mea e sefuluai a’i a outou mea uma lava i le fale e tuu ai mea; ina ia i ai mea e ‘ai i lo’u fale; ma ia outou tofotofo mai ia te a’u i lenei mea, ua fetalai mai ai Ieova o ‘au; pe ou te le toina pupuni o le lagi mo outou, ma sasaa atu le manuia mo outou, ina seia silisili ona tele (Malaki 3:10). E mafai ona oo mai faamanuiaga faaletino ma faaleagaga ia i latou uma o e totogiina se sefuluai faamaoni, e tusa lava pe afai e itiiti le tupe.
O sefuluai ma isi foai e tuuina atu i le Alii e ala i se tasi o le au epikopo po o le au peresitene o le paranesi.
E auina atu tupe o le sefuluai mai le uarota ma paranesi i le laumua o le Ekalesia, lea e filifili ai e se aufono e aofia ai le Au Peresitene Sili ia auala o le a faaaogaina ai nei tupe paia.
E totogi e le sefuluai le tau mo le fausiaina ma le tausiaina o malumalu ma falelotu.
E totogi e le sefuluai le faaliliuga ma le lolomiina o tusitusiga paia ma punaoa mo lesona.
E fesoasoani le sefuluai e totogi le aoga a le autalavou i aoga a le Ekalesia, seminare ma inisitituti o mataupu faalelotu.
Ata na tusia e David Habben