Mo Tamaiti Laiti
O Sina Vaega o le Kerisimasi i Aso Uma
E alala le tusitala i Iuta, ISA.
Sa afifi uma meaalofa ma tuu i lalo o le laau. Pe sa i ai?
“Ia maua se Kerisimasi sili ona fiafia! Faasalalau le fiafia i soo se mea!” (Children’s Songbook, 51).
Sa toeitiiti lava oo mai le Kerisimasi. Sa fiafia lava Amalie. E le toe umi ae mafai ona ia tatalaina ia meaalofa o loo i lalo o le laau!
I le afiafi faaleaiga sa oo ai le faasologa ia Tinā na te faia ai le lesona.
“Aisea tatou te avatu ai meaalofa i le Kerisimasi?” O le fesili lea a Tinā.
“Ona o le aso soifua lea o Iesu!” O le tala lea a Amalie.
“Pe le tatau ea la ona tatou avatu se meaalofa ia te Ia?” Na fai atu ai Tinā.
Na fesoasoani Tamā i le tuagane o Amalie o Noa e faitau se mau. Sa fai mai pe a tatou auauna atu i isi tagata, ua tatou auauna atu lena i le Atua (tagai Mosaea 2:17).
“Pe o le auauna atu i isi o le tuuina atu lea o se meaalofa ia Iesu?” Na fai atu ai Tinā.
Na lue le ulu o Noa.
“O le a se isi mea?”
“O le tausia o poloaiga,” o le tala lea a Amalie.
“Ia agalelei,” o le tala lea a Noa.
“Lelei tele ia manatu!” Na fai atu ai Tinā. “Sei o tatou taaalo i se taaloga. O le a ou fai atu se meaalofa na tuuina atu e se tasi ia Iesu. Ta’u mai ia te au pe e te iloa po o ai. Se’i tatou amata! O lenei tagata na tuuina atu ia kata o le Kerisimasi i le nofoaga autu mo le tausiga.”
Sa sii le lima o Noa. “O Amalie na faia le mea lena!”
“O lenei tagata na alu i le asiasiga a faiaoga o aiga.”
“O Papa lena,” o le tala lea a Amalie.
E lei umi ae na latou ta’ua le tele o meaalofa ua uma ona latou avatu i le Faaola.
“E mafai ona tatou tuuina atu ni meaalofa i aso uma,” o le tala lea a Tina.
O le taeao na sosoo ai ma ua oo i le taimi e tapena ai le fale. “Oi e leai,” o le tomumu lea a Amalie. Ona ia manatua lea. O le auauna atu i isi o se meaalofa! Afai na te fesoasoani ia Tinā, e tutusa lava ma le fesoasoani atu ia Iesu. Sa ia maua se fasi ieie ma solo ai luga o fata seia oo ina iila.
O le aso na sosoo ai sa maua e Amalie se tupe.
“O lau sefuluai e valu sene,” o le tala lea a Tinā.
Na toe manatua e Amalie. O le sefuluai o se poloaiga, o lea la o le totogiina o le sefuluai o se meaalofa. Sa ia tuuina le valu sene i totonu o lana fagu sefuluai.
Mulimuli ane i lena vaiaso sa fesoasoani Amalie e piki i luga ia aluga. Na tau’ai ese e lona tuagane pepe mai le nofoa. “O se isi meaalofa mo Iesu,” o lana tala lea.
I le Po e sosoo ma le Kerisimasi, na ta’u atu ai e Tinā ma Tamā ia Amalie ua la mitamita lava ia te ia. “Sa e tuuina atu ni meaalofa ia Iesu i le vaiaso atoa,” o le tala lea a Tamā. “Ua pei lena mea o le mauaina o sina Kerisimasi itiiti i aso uma.”
Alofa, Amalie
Alofa, Amalie
Alofa, Amalie
Alofa, Amalie
Ata na tusia e Dilleen Marsh