Ataata
O Se Vavega o le Kerisimasi
E alala le tusitala i Karolaina i Matu, ISA.
Sa tata pea lava lona fatu. E le o lelei tele e pei ona sa i ai muamua a o lei oso le mai fatu. Ae o loo tata pea.
Ata na tusia e Julie Rogers
E lagona le mafanafana o lou loto i le po nei. E moni lava na nutimomoia, uno’oa, ma saeia. Ae ua matagofie le faamafanafanaina. Ua matua ou lagonaina lava le agaga faafetai—le agaga faafetai ua matua loloto ma siomiaina e foliga mai o se āva fou ua tatalaina i lo’u agaga ia maua ai se avanoa, le agaga faafetai ua matua faatumulia ma patino ua le mafai ai ona taofia le tafe ifo i lalo i ou alafau o loimata o le filemu. O loo manava lo’u toalua. E mafai ona ou faalogo i ai, e loloto ma mālū.
I nai itula ua mavae, sa ou a’e ai i luga o lona moega i le falemai, ma lē amanaiaina ia kiki lemu mai i la ma pepe e toeitiiti fanau mai, ma maua ai sina vaimea i totonu o uaea uma na faapipii i lona fatafata lea na mafai ona taoto ai lo’u ulu. O le faalogologo i lona fatu o tata i lou taliga o se aafiaga o le a ou manatua pea e faavavau.
O loo tata pea lava lona fatu. E le o lelei tele e pei ona sa i ai muamua a o le i oso le ma’i fatu. Ae o loo tata pea.
O le mafanafana o moli mai laina o moli Kerisimasi lea na tautau solo i le potu na ou lagona ai le mafanafana i le tele o auala i lenei po. O lo latou susulu vaivai ua fatu ai se siosiomaga mafanafana, ae o le mafanafana moni ua oo mai i uo moni na loto e tuu a latou lava fuafuaga o le Po e sosoo ma le Kerisimasi ae o mai e teuteu [le potu] ina ua siitia ese Brian mai le potu tigaina. O le laau Kerisimasi e tolu futu (1 m) o loo tu i le faamalama o se faatusa lea o lo latou alofa.
E mafai faapefea ona ou faafetai i a ma uo? Pe o le a latou iloaina ea le tele o lou manaomiaina o i latou ma lou faafetai tele? A o liliu atu o’u manatu i lo’u toalua nai lo se isi mea, sa o latou alolofa i la’u fanau, faamamaina o loʼu fale, toe faatumu la’u pusa aisa, fai a’u tagamea, afifi a matou meaalofa o le Kerisimasi, ma aumaia le alofa ia te au e ala i ni opo, taumafataga i afiafi, kata o meaalofa, tupe, valaau i telefoni, feau tusitusia, imeli, savali, ato o laau paina ua sasala i manogi sinamoni, ma se atopa’u e tumu i mea teuteu. Sa o latou fetagisi faatasi ma au ma tatalo ma anapopogi. Ma o le faia o nei mea uma, sa o latou aumaia ia te au le meaalofa aupito sili ona taua e mafai ona latou tuuina mai: o o latou taimi. Oka sou alofa ia i latou uma!
Ou te manatu o le a ou moe lelei i le po nei, aua ua faatumulia a’u i le lotofaafetai e le muta mo i latou uma.
Ae e sili ai lou lagonaina o le agaga faafetai i le Alii mo le ola a lo’u toalua—o lona manava loloto, o lona fatu o loo pamuina le toto, o lona tino ma le agaga ola. O lona ola o la’u vavega lea o le Kerisimasi.