Saunia e Agai i Luma

Saunia e Richard M. Romney, Mekasini a le Ekalesia

ma Mickey Shimomiya, Tokyo, Iapani

Siitia mai le Peraimeri i Alii Talavou po o Tamaitai Talavou? Siaki manatu nei mai le au 12-tausaga le matutua e toafitu o e o loo faia lena suiga.

Ua toeitiiti atoa lou 12. Ua tumu le olaga i suiga. I le lotu, o loo e siitia mai le Peraimeri i Alii Talavou po o Tamaitai Talavou. O lona uiga o le faatutuina o sini, tuuina atu o auaunaga, saunia mo le malumalu, aoao atili e uiga i le talalelei. Ae aua le atuatuvale! Fai mai isi o loo o’o foi i lea lava mea e tasi e ese le manaia.

Faatasia le Lua

O Aïolah V. o Farani o se Ofagapi e 12-tausaga le matua. E faapena foi lona uso o Evaline, lea e toe tasi le masina atoa lona 13. “Ua ou fiafia o loo i ai lo’u uso iinei e fesoasoani mai ia te au e siitia mai le Peraimeri i Tamaitai Talavou,” o le tala lea a Aïolah.

O se tasi o a latou mea e fiafia i ai o le Alualu i Luma o le Tagata Lava Ia, ae a la faitau e uiga i se sini se tasi, la te toē. “Aoao e ta se mea faifaaili,” fai mai ai le tusi.

“Ua autausaga o la tata,” fai mai ai Evaline. Ae sa latou talanoa ma lo la tina. Sa ia fesoasoani ia i laua ia iloa e mafai ona la faaogaina ia musika e faataunuu ai se isi sini: se auaunaga.

Ua sauni nei Aïolah ma Evaline e tātā i sauniga faamanatuga ma po o taleni, fai ni konaseti mo tamaiti ma tagata matutua, ma tātā mo faifeautalai pe a latou pepese.

“E manaia le Alualu i Luma o le Tagata Lava Ia,” fai mai ai Evaline. “E mafai ai ona e faia le mea e te fiafia i ai ma faia ai foi ni mea fou.”

Fai ni fesili

Sa saunia Brian R. o Arisona, ISA, e sefululua tausaga le matua, e tufa le faamanatuga mo le taimi muamua. Na te lei manao e faia se mea sese, o lea na ia fesili ai i isi e umia le Perisitua Arona i lana uarota e faamalamalama atu ni mea ia te ia.

“Oka so latou lelei,” sa ia fai mai ai. “Sa latou tau mai le mea ou te tu ai, le mea ou te alu i ai, ma le auala e tufa atu ai fata.”

Ae o le mea e sili atu ona taua, sa latou faamanatu atu ia te ia ia migao. “E manaomia ona tatou manatuaina le Faaola a o tatou tufaina atu le faamanatuga,” o le tala lea a Brian. “Afai tatou te faaaloalo, o le a fesoasoani i isi ia manatua foi o Ia.”

Na aoaoina e Brian e fiafia isi e fesoasoani ia te ia ia malamalama i ona tiute ma aoao e faia faalelei. “Tau o le fesili,” o lana tala lea. “O le siitia mai le Peraimeri i Alii Talavou e faigofie atu nai lo mea e te mafaufauina.”

Fai Ni Uo Fou

“Sa ou popole ina ua talosagaina au e le fesoasoani ia ou alu i le tolauapiga a Tamaitai Talavou a le siteki mo le taimi muamua,” o le tala lea a Nodoka T. o Okinawa, Iapani. “Sa ou filifili e tatalo. Ina ua uma la’u tatalo sa ou lagona le toafilemu, o lea sa ou filifili ai e alu.

“Mai le aso muamua, sa mafai ona ou faia ni uo fou. Sa matua lelei lava tamaitai talavou ma agalelei ia te au; e lei pine ae mou atu lo’u fefe. Ma sa ou aoao e faamama le vai, faia nonoa, faia fusiga, faatino ia mānava laveai, ma saili ia laau aina!”

Lagonaina le Taliaina

“O lo’u aso muamua i Tamaitai Talavou o lo’u aso fanau lea,” o le tala lea a Grace S. o Arisona, ISA. “Sa latou faia e pei o se mea telē ia i latou, ae sa tumau pea lo latou agalelei. Sa latou faia ni mea na ou lagona ai le taliaina.”

Sa talileleia foi o ia e lona faufautua. “Sa ia faamatala mai ia i matou ia mea na ia faia a o i ai o ia i Tamaitai Talavou,” na fai mai ai Grace. “Ma na faamalamalama mai le tamaitusi o le Alualu i Luma o le Tagata Lava Ia faatasi ma i matou taitoatasi, ina ia mautinoa matou te malamalama i ai.”

Aoaoina, Aoao Atu, ma Faasoa Atu

I le avea ai ma se tiakono fou, na talosagaina ai Josh W. o Iuta, ISA, e aoao atu se lesona e uiga i le avea ai ma se soo o Keriso. “Sa ou mauaina ni mau e uiga i le taimi na fagogota ai Peteru ma isi. Sa latou taumafai i le isi itu o le vaa ae sa lei maua se i’a,” o le tala lea a Josh. “Ona fetalai atu lea o le Faaola ia i latou e fagogota i le isi itu, ma sa latou maua ai le tele o i’a (tagai i le Luka 5:5–11 ma le Ioane 21:6–11). I la’u lesona la, sa matou faitaua ai le mea lena. Ona matou talanoaina lea o le auala e faapena ai mo i tatou. Pe a tatou o na o i tatou lava, o le a mafai ona tatou oo i faafitauli. Ae a tatou faalogo i le Alii, o le a Ia fesoasoani mai ia i tatou.”

Fai mai Josh o le aoaoina, aoao atu, ma le faasoa atu e taua i Alii Talavou. “I le Peraimeri na tatou aoao ai le tele o mea ma sa tele foi ni gaoioiga,” o lana tala lea. “O lenei la ua tatou aoaoina ni mea se tele ma faasoa atu. O lona uiga o le faia o le tele o mea i mea tatou te aoaoina.” Mo se faataitaiga, a maea se lesona o le perisitua, e asiasi atu Josh i se uo ua umi se taimi e lei toe sau i le lotu. “E faigaluega ona matua i Aso Sa, o lea e le o mai ai. Ae sa ou fai atu ia te ia e mafai ona ma o mai faatasi.”

O loo aoaoina e Josh le faamoemoega o Alii Talavou ma Tamaitai Talavou. “O loo faaali mai ai ia i tatou le auala e avea atili ai e faapei o le Faaola,” o lana tala lea. Ua ia iloa o le valaau e “o mai ia Keriso” o lona uiga o le agai i luga o se ala e amata i le papatisoga ma le faamauga, ma faaauau ai pea e agai atu i le malumalu, ma taitai atu ai i le ola e faavavau.

“Ua ou saunia e agai i luma,” o lana tala lea.

Galulue Faatasi i le Tiute i le Atua

E tele lava ina galulue faatasi ia John C. e sefululua tausaga le matua ma lona tama i galuega faatino. Mo se faataitaiga, sa la su’iina ni pine i luga o palanikeke o le a la faaaogaina pe a la o e tolauapi. O pine e mai i tolauapiga eseese ma gaoioiga na la auai ai i British Columbia, Kanata, i le nofoaga o loo latou nonofo ai.

“O Tamā o se fesoasoani sili,” o le tala lea a John. “E le mafai ona ou mafaufauina le faiga o galuega faatino a le Ekalesia e aunoa ma ia.”

Ina ua atoa le 12 o John, sa la iloiloina faatasi le tamaitusi o le Tiute i le Atua. E lei pine ae la oo i le vaega o aitema o le “Malamalama i Aoaoga Faavae” i le vaega o le Tiakono. “Sa faamalamalama mai e Tamā ia te au le uiga o ki o le perisitua ma le pule,” o le tala lea a John. Ma sa fesoasoani ai lena mea ia John e faataunuu se tasi o mea e manaomia.

Fai mai John, “Pe a e faia le Tiute i le Atua, ia faaaofia ai lou tama. Ua tele se fesoasoaniga a lo’u tama ia te au.”