O Le Tali i Fesili Faigata Uma
Pe a feagai ma ni fesili faigata, e na o le tasi le fesili e sili ona taua.
O fesili tatou te feagai ai i le aluga o le olaga e le faigofie ona taliina i taimi uma. O nisi o luitau faaletagata lava ia ua ia i tatou—mo se faataitaiga, o le oti o se tamaitiiti, o le faalataina e se uo, po o se tulaga le manuia o mea tautupe—e masani lava ona le faigofie ona malamalama i ai, ma e tatou te manaomia le lagolago agaalofa a i latou e siomiaina i tatou. O nisi taimi o le tauiviga sili ona faigata i nei tulaga o le iloaina e alofa lo tatou Tama Faalelagi ia i tatou ma Na te le o faasalaina i tatou, e ui lava o le mafuaaga o le tofotofoga, pe afai e i ai lava se mafuaaga, o se mea tatou te le malamalama i ai i lenei taimi.
O nisi o fesili e sili ona faigata e oo mai pe a luitauina mea tatou te talitonu e faiga fesuisuiai faaleaganuu po o faamatalaga fou, o nisi taimi o faamatalaga sese, ia e osofaia ai i tatou e fili o le Ekalesia.I taimi faapena, e ono foliga mai ai ua le mausali lo tatou faavae o aoaoga faavae po o faavae o talafaasolopito e pei ona tatou mafaufau ai. Atonu e faaosoosoina i tatou e fesiligia ia upumoni ua tatou faaleano i ai ma aafiaga faaleagaga na faavae ai lo tatou faatuatua.
O le a le tatou mea e fai pe a ulufale atu le masalosalo i o tatou loto? O i ai moni ea ni tali i na fesili faigata?
Ioe, o loo i ai. O le mea moni, o tali uma—o tali sa’o uma—e faalagolago i le tali o le fesili e tasi lava: pe ou te faatuatuaina le Atua i lo o se isi lava tagata?
E Faatauvaa ae Le Faigofie
Mata e faatauvaa tele lena manatu? faigofie tele?
Masalo. E le iloagofie i taimi uma le upumoni, aemaise lava pe a tautava ma suiga ua tuuina mai i se auala faatosina. E masani lava e na o se vaega o le upumoni tatou te malamalama i ai, a o le upumoni atoa e le o malamalama lava i ai.Ma i le aoaoina, tatou te fetaiai ai ma le avanoa le lelei o le lafoa’ia o malamalamaaga le atoatoa ae maua ai le mafanafana seia oo mai i lenei taimi. Ae o le faatuatuaina o loo i le Atua ia tali uma, e alofa o Ia ia i tatou, ma o le a Ia tali mai i a tatou fesili uma—i Lana ala, i Lana lava taimi—e mafai ona faafaigofie ai la tatou sailiga. Atonu e le faigofie i taimi uma, ae ua na o le faalagolago i fautuaga a le Atua e mafai ai ona fesoasoani ia i tatou ia faatoilaloina lagona o le le mautonu.
I le konafesi aoao a le Ekalesia ia Oketopa 2013, na faia ai e Peresitene Dieter F. Uchtdorf, Fesoasoani Lua i le Au Peresitene Sili lenei matauga manino lelei:
“O se mea masani le i ai o fesili—o sina fatu itiiti o le fesili faamaoni ua tele ina tupu ae ma avea ma se laau mafalā o le malamalama. O loo i ai ni nai tagata o le Ekalesia o e, po o le a lava le taimi, e lei tauivi lava ma ni fesili matuia pe maaleale. O se tasi o faamoemoega o le Ekalesia o le faafailele lea ma atiae le fatu o le faatuatua—e oo lava i nisi o taimi i eleele matutu o le masalosalo ma le le mautonu. O le faatuatua o le faamoemoe lea mo mea e le vaaia ae ua moni.
“O le mea lea, ou uso e ma tuafafine pele—au uo pele—faamolemole, ia muamua e masalosalo i ou masalosaloga ae e te lei masalosalo i lou faatuatua. Ia le tatau lava ona tatou faatagaina le masalosalo e faapagotaina i tatou ma taofia ai i tatou mai le alofa paia, filemu, ma meaalofa ia e oo mai e ala i le faatuatua i le Alii o Iesu Keriso.”1
O Nisi o Mataupu Faavae Aoga
E faapefea la ona tatou feoai ma le masalosalo faamaoni i o tatou masalosaloga? E faapefea ona tatou taulaina lo tatou faatuatua i luga o le papa mautu o faaaliga ae le o luga o eleele oneone o malamalamaaga fesuisuiai pea o tagata? Atonu e fesoasoani e manatuaina ai mataupu faavae nei.
Mataupu Faavae 1: E Sili Atu le Silafia Le Mafuatia o le Atua Nai Lo Tatou. Pe a fetaiai ma ni fesili—pe faaletagata, faaleagafesootai, pe faaleaoaoga faavae—e mafai lava ona tatou faalagolago i le mea moni e faapea e le mafaitaulia mea e silafia e Le Foafoa o le atulaulau nai lo tatou. Afai Na te fetalai mai i se mataupu (ma o nisi taimi e Na te le faia ai), e mafai lava ona tatou faatuatuaina Ona manatu e sili atu le manino nai lo o tatou manatu.
“Aua o o’u manatu e le o outou manatu, o o’u ala e le o outou ala, ua fetalai mai ai Ieova.
“Aua e pei ona sili ona maualuga o le lagi i le lalolagi, ua faapea ona sili ona maualuga o o’u ala i o outou ala, ma o’u manatu e sili i o outou manatu” (Isaia 55:8–9).
Mataupu Faavae 2: Ua Faasoa Mai e le Atua Nisi o Lona Malamalama. O se taunuuga o le mataupu faavae 1 e faapea e faasoa mai e le Atua ia i tatou le tele o mea Na te silafia pe a tatou saunia e mauaina ma ua Ia saunia e tuuina mai. Pau lava le mea ia tatou saunia i tatou lava e mauaina, ona saili atu lea i ai. E tali e tusitusiga paia le tele o fesili. O se tasi o fiafiaga sili o lenei olaga o le aoaoina lea e le Agaga Paia a o Ia faaaogaina tusitusiga paia e faaali mai ai “lea fuaitau i luga o lea fuaitau, ma lea mataupu i luga o lea mataupu, o sina mea itiiti i i ma sina mea itiiti i o” (2 Nifae 28:30) e avea ma tali i a tatou suesuega ma le maelega.
O nisi o fesili, aemaise lava i le natura faaletalafaasolopito, o loo i ai faamatalaga talafeagai, ma o le tele o faamatalaga faamaoni e faaalia i suesuega, o le manino atili foi lena o la tatou vaai.
Ua faamanuiaina foi i tatou i le i ai o perofeta ma aposetolo soifua e aoao i tatou i lalo o musumusuga o le lagi. E le manaomia ona tatou “felafoaiina e pei o peau, ma feaveaiina i matagi uma lava o mataupu.” E mafai ona tatou faatuatuaina lo latou taitaiga aufaatasi o le a fesoasoani ia “tatou oo atu o i tatou uma lava ma le loto gatasi i le faatuatua ma le iloa lelei o le Alo o le Atua.” (Tagai Efeso 4:11–15.)
Mataupu Faavae 3: E Mafai Ona Tatou Faalagolago i le Alofa o le Atua. E sili atu le alofa o le Atua ia i tatou nai lo mea e mafai ona tatou mafaufauina. O i tatou o Lana fanau, ma Na te finagalo ia tatou toefoi atu i Lona afioaga o ni tagata matutua faamamaluina e mafai ona avea e faapei o Ia (tagai Mose 1:39). O fautuaga uma Na te tuuina mai ia i tatou ua tuuina mai faatasi ma le alofa sili ona loloto ia manuia ai i tatou e faavavau. E mafai ona tatou faalagolago atoa i lena alofa.
“Le Atua e, e maeu lava lou alofa! o le mea lea ua faatuatua ai tagata i le paolo o ou apaau” (Salamo 36:7).
Mataupu Faavae 4: E Manaomia ona Tatou Saili Atu mo Faamautinoaga Faaleagaga. Afai o le tele o le atamai o le lalolagi e foliga mai e feteenai ma le [atamai] o le Atua, e le tatau la ona faateia ai i tatou. E ui lava i lea, e tusa ai ma le mamanu paia, ua tatou ola i se lalolagi pa’ū lea ua vavae ese ai i tatou mai le afioaga ma le mafaufau o le Atua. O lea ituaiga o tulaga e mafai ona faafaigata ai le malamalama i mea a le Atua, aua “po o ai foi se tagata ua iloa mea a le tagata, ua na o le agaga o le tagata o loo i totonu ia te ia? e faapea foi ona le iloa e se tasi mea a le Atua, ua na o le Agaga o le Atua. …
“A e le talia e le tagata faaletino o mea a le Agaga o le Atua: aua o mea valea ia ia te ia, na te le mafai ona iloa: aua e faamasinoina faaleagaga” (1 Korinito 2:11, 14).
Afai e tatau ona tatou malamalama i mea a le Atua, e le mafai la ona tatou faalagolago tasi i le poto o le tagata e fai ai le galuega. E manaomia ona tatou maua le Agaga o le Atua “ina ia matou iloa mea ua foaifuaina mai e le Atua ia te i matou. … e aoaoina mai e le Agaga Paia; o loo faamatalaina mea faaleagaga i upu faaleagaga” (1 Korinito 2:12–13).
Pe a tatou papatiso ma faamauina o ni tagata o le Ekalesia a Keriso, e tuuina mai ia i tatou le meaalofa o le Agaga Paia. Faatasi ai ma lena meaalofa, e mafai ai ona tatou aoao mai le Agaga ma maua Lana faamaoniga mafanafana o le upumoni. O le mauaina o sea faamautinoaga faaleagaga e mautinoa lelei le aveesea ai o le masalosalo nai lo le faamasinoga sili o le faatalitonuina, ma e avanoa mo tagata uma o e sailia le upumoni e ala i le tatalo faamaoni, suesue ma le maelega, ma le usiusitai i poloaiga a le Alii.
“Ia outou ole atu, ona foaiina mai ai lea ia te outou; ia outou saili, ona outou maua ai lea; ia outou tuitui atu, ona toina ai lea ia te outou” (Mataio 7:7).
Mataupu Faavae 5: E Ono Manaomia ona Tatou Faatalitali i le Alii. O nisi taimi e le faamanuiaina ai a tatou taumafaiga a o tatou tauivi ina ia malamalama i o tatou tofotofoga ma fesili. E ui lava i a tatou taumafaiga silisili, e le mafai lava ona tatou malamalama. E foliga mai ua punitia le lagi. O le taimi la lena e mafai ai loa e lo tatou faalagolago atu i le Atua ona tatou maua le onosai e faatalitali ai ia te Ia. E le o fesili uma o le a taliina i se taimi vave po o lenei foi olaga. E le o tofotofoga uma o le a aveesea a o lei tuueseeseina le tino ma le agaga. Ae afai tatou te alolofa i le Atua i lo isi mea uma, afai tatou te faalagolago i Lona alofa mo i tatou, o le a mafai ona tatou tumau i le faatuatua seia oo mai lena aso e aveesea ai le veli ma manino mai ai mea uma lava.
“Ia e tuuina atu lou ala ia Ieova; ma faatuatua ia te ia; ona faia lava lea e ia.
“E faaalia e ia lau amiotonu e pei o le malamalama, ma lou faamasinoga e pei o le aoauli.
“Ia e faalologo i luma o Ieova, ma faamoemoe ia te ia” (Salamo 37:5–7).