Ou Te Iloa o Loo Soifua o Ia

Saunia e Elder Melvin J. Ballard (1873–1939)

O Le Korama a Aposetolo e Toasefululua

O le a ou tuuina atu mea uma ua avea ai a’u, o mea uma ua ou faamoemoe o le a avea ai, ia lagona ai mea sa ou lagonaina muamua!

Ata

Frontal head and shoulders portrait of Jesus Christ. Christ is depicted wearing a pale red robe with a white and blue shawl over one shoulder. Light emanates from His face.

Ata o Keriso, saunia e Heinrich Hofmann, faaaloaloga a le C. Harrison Conroy Co.

Ou te fiafia lava e mafaufau i le tau na totogiina e lo tatou Tama o i le Lagi e tuuina mai ai ia i tatou le meaalofa o Lona Alo Pele, lena Alo agavaa a lo tatou Tama, o le na alofa tele i le lalolagi sa Ia foai mai ai Lona ola e togiola ai le lalolagi, e laveai ai i tatou ma fafaga i tatou faaleagaga a o tatou savavali i lenei olaga, ma saunia i tatou e o atu ma mau faatasi ma Ia i lalolagi e faavavau. …

Ou te manatua se aafiaga sa ou oo i ai … , na molimau mai i lo’u agaga i le moni o le maliu o [le Faaola], o Lona Faasatauroga, ma Lona Toetu, lea o le a le galo lava ia te au. …

… Sa ou oo i se tasi o afiafi i miti o le po i lena fale paia, le malumalu. Ina ua mavae se vaitau o le tatalo ma le olioli na logoina au e tatau ona ou maua le avanoa e ulufale atu ai i se tasi o ona potu, e feiloai ai ma se peresona mamalu, ma, a o ou ulu atu i le faitotoa, sa ou vaaia, a o nofo i luga o se tulaga maualuga, se tagata silisili ona mamalu faatoa ou vaai lava i ai ma ou te lei mafaufauina foi e i ai i lalolagi uma e faavavau.

A o ou latalata atu ina ia faailoa atu a’u, sa tulai o Ia ma laa e agai mai ia te a’u ma aao sa faaloaloa mai, ma Ia ataata a o Ia fetalai lemu mai i lo’u igoa. Afai ou te ola seia miliona o’u tausaga o le a le galo lava ia te a’u lena foliga fiafia. Sa Ia opo atu a’u i Ona aao ma sogi mai ia te a’u, ona fusimau lea o a’u i Lona fatafata, ma faamanuia ia te au, seia oo ina liu suavai su o o’u ivi! Ina ua maea ona Ia faia, sa ou faapa’u i Ona aao, ma, a o ou mulumulu i [Ona aao] i ou loimata ma sogi i ai, sa ou vaaia tulaga fao i aao o le Togiola o le lalolagi. O le lagona sa ia te a’u a o ou i ai i luma o Ia o le ua i ai mea uma i Ona aao, le mauaina o Lona alofa, Lana faamafanafanaga, ma Lana faamanuiaga o se aafiaga ana faapea e mafai ona ou mauaina na mea sa ou muai tofo i ai, o le a ou tuuina atu mea uma o ia te au, o mea uma ua ou faamoemoe o le a avea ai, ia ou toe lagona ai mea sa ou lagonaina i lena taimi!

… Ou te le o vaai ia Iesu i le taimi nei i luga o le satauro. Ou te le o vaaia le tuia o Lona muaulu i laau talatala po o Ona aao o pu pu i fao, ae ua ou vaai ia te Ia o ataata, ma aao o faaloaloa mai, ma fetalai mai ia i tatou uma: “O Mai ia te A’u!”