O La Matou Meaalofa Silisili o le Kerisimasi
Adriana Nava Navarro, Polivia
Sa oo i le Po e sosoo ma le Kerisimasi, ona faapotopoto lea o lo matou aiga e pei ona matou faia i tausaga uma e faamanatu ai. Na valaau faatasi i matou e Tama ina ua toeitiiti ta le sefululua i le vaeluapo, ma faapea mai o loo ia te ia se mea e faaali mai ia i matou.
Faatasi ai ma sauniuniga ma le sagisagi fiafia e tutupu i le Po e sosoo ma le Kerisimasi, sa matou le iloaina ai ma o’u uso, ma lo’u tina mea sa saunia e Tama mo lea taimi. I le taimi lava na matou faapotopoto faatasi ai ma le filemu, sa amata ona ia faaali mai nisi o ata faasolo.
I lana ata faasolo, lea na faaali ai se ata vali o le Faaola, o vaaiga o le Kerisimasi, ma upu na faaeteete le mamanuina, na faailoa mai ai e Tama lona alofa mo i matou. O lana polokalama na faamanatu mai foi ia i matou le uiga moni o le Kerisimasi ma le fiafia ma le agaga faafetai e tatau ona matou lagonaina mo le soifua mai o le Faaola. O se tasi o ata faasolo o se laau Kerisimasi felanulanuai na aofia ai foi ia upu, “O Lenei Kerisimasi o le alofa o Iesu Keriso o le a aumaia ai ia te au se olaga fou.”
O le vaega aupito sili ona taua o le polokalama a Tama na mulimuli mai ina ua ia faaaoga se ata faasolo o se ata vali o le Faaola e tuu mai ai ia i matou se tala fiafia. Ae sa le na o soo se tala fiafia; o le tala sili lava lea ona faafiafiaina. I luga ae o le Faaola na faaali mai ai upu nei “Ua ou filifili e papatiso i Le Ekalesia a Iesu Keriso o le Au Paia o Aso e Gata Ai.”
Sa iu lava ina filifili lo matou tama e auai i le Ekalesia! O se faaiuga faapena e ono faigofie mo nisi o tagata, ae sa le faigofie mo lo matou tama. Sa ia suesueina le talalelei ma aoao e uiga i le Ekalesia mo le 25 tausaga. E ui lava i a matou taumafaiga sili ona lelei ma le tele o lesona a faifeautalai, ae sa le’i papatisoina lava o ia. Sa matou le malamalama i le mafuaaga, ae sa matou iloa sa lei saunia o ia.
Ou te tautino atu na i ai ni taimi na ou lagona ai o le a le papatisoina lava lo’u tama. Peitai, i le taele o lo’u loto, ou te lei aveesea lava le faamoemoe, ma sa matou faaauau pea ona tatalo mo ia. I le Po e sosoo ma le Kerisimasi, na tali mai ai le Alii i a matou tatalo.
Ina ua faia e Tama lana faasilasilaga, i le taimi muamua na pau lava le mea na mafai ona matou faia o le fetagisi ona o le olioli. Sa matou lagonaina ni lagona fefiloi—o le fiafia, o le ofo tele, ma le lagona silisili i lagona uma, o se fiafiaga naua e faigata ona faamatalaina.
O le faasilasilaga a Tama sa le gata ina suia ai le Po e sosoo ma le Kerisimasi—ae na suia ai foi le olaga mo lo matou aiga atoa. O loo i ai pea mea e ao ona faia e alualu ai i luma le tagata lava ia faapea ma se aiga, ae ou te iloa o le a lelei atu lo matou agai i luma aua o lea ua matou faatasi i le Ekalesia.
Ou te matua faafetai i le Alii mo lenei faamanuiaga. I ni nai masina o le a faamauina ai i matou o se aiga i le malumalu. O le faasilasilaga a Tama sa mautinoa lava o se meaalofa aupito silisili lea o le Kerisimasi ua maua.
O le vaega aupito sili ona taua o le polokalama a Tama na mulimuli mai ina ua ia faaaoga se ata faasolo o se ata vali o le Faaola e tuu mai ai ia i matou le tala aupito sili ona faafiafiaina.