O Le Faaola ma le Faamanatuga
Saunia e David L. Beck
Peresitene Aoao o Alii Talavou
A o e ai ma inu i le faamanatuga, e te faafouina lau feagaiga ia manatua pea le Faaola.
O a mea e te mafaufau i ai pe a e ai i le areto ma inu le vai o le faamanatuga po o le taimi foi e te saunia ai, faamanuia, pe tufa ai le faamanatuga? O le toatele o i tatou e mafaufau loloto i a tatou feagaiga ma le auala o loo tatou ola ai. Tatou te mafaufau i a tatou agasala ma tatalo mo le faamagaloga ma naunau ia faia ia sili atu.
O vaega taua nei o le sauniga o le faamanatuga. E le gata i lea, o loo i ai se isi mea e mafaufau loloto i ai—o se mea e matua loloto lava ma patino ua avea o se vaega o le tatalo o le faamanatuga lava ia. O le manatuaina lea o Iesu Keriso, o le Alo o le Atua, o le Faaola o le lalolagi. Ua folafola atu e i latou e aai i le areto ia “taumamafa i le faamanatuina o le tino o [le] Alo” ma ia “manatua pea o ia” (MF&F 20:77). E faapena foi, o i latou o e feinu i le vai e folafola atu e feinu “i le faamanatuina o le toto o [le] Alo” ma “manatua pea o ia” (MF&F 20:79).
O le filifiliga ina ia manatua le Faaola ma Lana Togiola ma le taulaga o se vaega autu o le sauniga. E pei ona aoao mai e Elder Jeffrey R. Holland o le Korama a Aposetolo e Toasefululua, “I le gagana faigofie ma le matagofie o le tatalo o le faamanatuga … e foliga mai o le upu aupito taua tatou te faalogoina o le manatua. … O le mea o loo faamamafaina i tatalo uma e lua e faapea o nei mea uma ua faia e manatua ai Keriso. I lo tatou auai ai [i le faamanatuga], tatou te molimau atu o le a tatou manatua pea o ia, ina ia i ai pea lona Agaga e faatasi ma i tatou.”1
Na faamamafa mai e le Faaola nei vaega e tasi ina ua Ia faavaeina le faamanatuga faatasi ma Ana Aposetolo i le taimi o le Paseka i Ierusalema i le po mulimuli o Lana galuega faaletino—le po lea na Ia puapuagatia ai mo i tatou i le Faatoaga o Ketesemane a o lei toe mafatia ai i luga o le satauro. Mo se faataitaiga, ina ua uma ona tuuina atu ia te i latou le areto e aai ai, sa Ia fetalai atu, “O lo’u tino lenei, ua foaiina atu mo outou: tou te faia le mea nei e fai ma faamanatuga ia te au” (Luka 22:19–20; tagai foi i le Mataio 26:26–28).
I le taimi o le aso muamua o le Faaola i totonu o sa Nifae i le laueleele o Amerika, na Ia aoao atu foi ia te i latou le sauniga o le faamanatuga. Sa Ia toe faatonuina foi i latou ia taumamafa ma feinu i le faamanatuina o Lona tino ma le toto ma ta’u atu ia te i latou e faapea a o latou faia, “o le a avea o se molimau i le Tama ua outou manatua pea au” (3 Nifae 18:7). Ona ia folafola atu lea ia i latou, “Ma afai tou te manatua pea au o le a outou maua lou Agaga e faatasi ma outou” (3 Nifae 18:7, 11).
O se faamanuiaga ofoofogia! I se lalolagi ua tumu i luitau ma faigata ma faaosoosoga o loo taumafai pea lava pea e taitaisese i tatou, o le a la se isi meaalofa e sili atu ona taua tatou te maua? E ala i le i ai o le Agaga e faatasi ma i tatou, e mafai ona tatou “iloa ai le moni o mea uma lava” (Moronae 10:5). O le a tuuina mai ia i tatou e lena mea le mana ma le poto e ola ai i le auala e finagalo le Alii tatou te ola ai, e faia ai filifiliga sa’o, e auauna ai ma le faamaoni, ma avea ai e faapei o Ia.
A o e auai i le faamanatuga i vaiaso taitasi, o le a se mea e mafai ona e faia ia manatua ai o ia? O le a se mea e mafai ona e faia ia manatua ai pea o Ia—i le vaiaso atoa, ma lou olaga atoa?
E mafai ona ou valaaulia outou e mafaufau loloto i na fesili ma faia se tautinoga e manatua pea le Faaola? O le a e maofa i le auala o le a ia suia ai lou olaga.