Fas Presidensi Mesej
Wan Angka we I Stap Strong
I no longtaem i pas, mi bin gat janis blong sel long wan gudfala sip folem ol naesfala saed blong Alaska, long YSA. Taem we kapten i stap rere long ol samting blong sip i spendem naet long bei we i stap longwe be oli no spolem yet, hem i lukluk gud ples mo situesen, olsem taed i strong, wota i dip olsem wanem, mo sapos sip i stap longwe long ol samting we oli ol denja. Taem hem i glad se evri samting i oraet, hem i sakem angka i go daon blong sip i save stap sef mo angka i stap strong, blong lego ol pasenja oli gat janis blong lukluk ol naesfala kriesen blong God.
Taem mi bin stap luk folem saed i go long so, mi stat blong luksave se sip ia i stap muv we man i no luksave folem smol win mo taet. Be, sip i bin stap strong mo stap muv raon sloslo folem longfala blong rop mo paoa blong angka.
Kapten i no bin kipim angka antap long sip, rere blong sakem i go daon sapos nomo wan strong win i stap kam kolosap. No, hem i bin sakem angka olsem wan wei blong protektem sip mo protektem blong i no muv i go long ol wota we oli no sef o stap muv sloslo long sem ples nomo, mo ol pasenja mo ol man we oli wok long sip oli bin filim sef.
Taem we mi stap lukluk samting ia, i kam long mi se sapos i no bin wan janis blong wan parabol, bae mi neva save flaem wan plen.
From Wanem Yumi Nidim Ol Angka
Stamba tingting blong wan angka i blong kipim wan sip i stap sef mo stap sef long wan ples we i stret o blong help kontrolem sip long taem blong rabis weta. Be, blong winim impoten stamba tingting ia, blong gat wan angka nomo, i no inaf. Angka ia i mas strong, wan we yu save dipen long hem, mo save yusum gud long stret taem mo ples.
Wanwan man, woman, mo ol famle oli nidim ol angka tu.
Fasin blong agens i save kam olsem wan strong win blong karemaot yumi long rod mo pusum yumi i go fas long ol ston. Be samtaem, yumi stap tu long denja taem evri samting i soem se yumi stap sef—win i kwaet mo ol wota oli kwaet. Wanem i tru se, yumi save stap long bigfala denja taem yumi stap muvmuv sloslo i go mo muv ia i slo nomo we yumi no save luksave nating.
Gospel I Angka blong Yumi
Angka i mas hevi, mo i strong gud, mo oli lukaotgud long hem, i stap rere taem oli nidim. Antap long hemia, oli mas fasem i go long wan strong samting we i strong inaf long ol paoa we oli kam agens.
I tru, gospel blong Jisas Kraes i wan tru angka. Krieta blong yunives ia i bin rere from wan stamba tingting we i tabu, mo oli bin mekem blong ol pikinini blong Hem oli save folem gud rod mo stap sef.
Yumi save se gospel i plan blong God blong pemaot ol pikinini blong Hem mo tekem olgeta oli kambak long ples blong Hem, ?be hem i wanem moa?
Wetem save ia se hem i nomol long laef blong evri samting i muvmuv sloslo i go, yumi mas putum ol angka blong yumi oli stap strong, o hang strong long stamba blong trutok blong gospel. Oli no mas sakem isi nomo antap long sanbij blong hae tingting o i stap antap nomo long ol tras blong yumi.
Long manis ia, yumi gat janis blong harem ol wokman blong God long wan jeneral konfrens blong Jos. Ol toktok blong olgeta, we i go wetem ol skripja mo wetem Spirit we yumi save filim, i givim wan sef mo wan fandesen we i strong i stap we i gat ol valiu mo prinsipol blong laef we i no save finis, we yumi save fasem ol angka blong yumi long hem, blong mekem se yumi save stap strong mo sef long medel blong ol hadtaem mo tes blong laef.
Wan profet blong bifo Hileman i bin tijim: “Hem i long ston blong Ridima blong yumi, we i Kraes, Pikinini blong God, we yutufala i mas bildim fandesen blong yutufala; blong mekem se taem we devel bae i sendem aot ol strongfala win blong hem, yes, ol spia blong hem long wael win, yes, taem we ol ston blong aes blong hem mo strong win blong hem bae i foldaon long yutufala, bae i no gat paoa ova long yutufala blong pulum yutufala i go daon long bigfala hol blong sore mo sore tumas we i no gat en, from ston; long hem we yutufala i bin bildimap yutufala, we i wan sua fandesen, wan fandesen, long hem we sapos ol man i bildimap olgeta long hem oli no save foldaon” (Hileman 5:12).
Valiu ia blong Wan Angka we I Stap Strong
Laef i gat wan wei blong traem ol angka blong yumi mo temtem yumi blong go longwe sloslo. Be, sapos ol angka blong yumi oli stanap stret long ston blong Ridima blong yumi, bae oli hang strong— nomata paoa blong strong win, paoa blong taed, o ol wef oli bigwan olsem wanem.
I tru se, wan sip, oli no mekem blong i stap nomo long wan ples long wan wof, be hem i blong leftemap angka blong hem mo selaot i go long solwota blong laef. Be hemia i wan parabol blong tokbaot wan nara taem.
Blong naoia, hem i inaf blong mi save se angka blong gospel mo ston blong Ridima blong yumi bae i kipim yumi stap strong mo sef.
Wan kaen angka olsem bae i kipim yumi blong go longwe sloslo i go from ol denja mo ol rabis samting. Bae i givim yumi wan bigfala janis blong stap glad long ol defren samting blong laef we i naes bitim mak, mo i stap jenis oltaem.
Laef i naes mo i gud blong laef long hem. Win, strong win, mo strong wef oli save temtem yumi blong go longwe sloslo i go from ol denja we yumi save luk, o ol denja we yumi no save luk, be mesej blong gospel mo tabu paoa blong hem bae i kipim yumi long rod i gobak long sef wof blong Papa blong yumi long Heven.
Nao, bae yumi no mas lisin nomo long ol toktok blong Epril jeneral konfrens, be tu, yumi mas yusum ol mesej blong olgeta olsem wan angka we i stap strong insaed long evri dei laef blong yumi.
!Bae God i blesem mo i lidim yumi long spesel mo impoten wok ia!
Yusum Mesej Ia blong Tij
Gat tingting ia blong toktok raon long olsem wanem ol angka oli impoten long stori blong famle blong Lihae taem oli stap selaot i go long promes graon (luk long 1 Nifae 18). Ating bae yu wantem soem 1 Nifae 18:11–15, wan taem we oli fasem Nifae, Liahona i stop blong wok, mo sip i stap muv folem ol hevi strong win. ?Wanem ol risal we yumi stap fesem taem yumi no angka strong gud long gospel? Ating bae yu wantem blong soem tu 1 Nifae 18:21–22 mo toktok raon long olsem wanem yumi save faenem fasin blong stap sef taem yumi lukluk i go long Sevya.